Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Marcos 9:1-50

  • Jesuspa rikchaynin tikrakusqanmanta (1-13)

  • Demonioyuq warmata Jesus sanoyachisqanmanta (14-29)

    • Iñiyniyuq runapaq tukuy imapas atinallan kasqanmanta (23)

  • Wañukunanmanta Jesuspa yapamanta willakusqan (30-32)

  • Mayqanninku aswan riqsisqa kasqankumanta Jesuspa qatiqninkunapa atipanakusqanku (33-37)

  • Pipas contranchikpi mana kaqqa ñuqanchikwan kasqanmanta (38-41)

  • Imapas pantachiwasqanchikmanta (42-48)

  • Kachichasqa hina kananchikmanta (49, 50)

9  Chaymantapas paykunatam nirqa: “Chiqaptapunim nikichik: Kaypi sayaqkunamanta wakinqa manapunim wañunqakuchu Diospa munaychakuyninta* allin takyasqataña puntata rikunankukama”, nispa.  Suqta punchaw pasaruptinmi Jesusqa: Pedrota, Santiagota hinaspa Juanta pusarikuspan hatun urquman rirqa, chaypi paykunallawan kananpaq. Chaypim paykunapa qayllanpi Jesuspa rikchaynin tikrakururqa,  hinaptinmi hawanpi pachanpas yuraq-yuraq rikuriruspa kancharirqa. Manam ima pacha taqsanapas kay allpapiqa chaynataqa yuraqyachinmanchu.  Chaypitaqmi paykunaman rikuriykurqa Eliaswan Moisespas, paykunam Jesuswan rimachkarqaku.  Hinaptinmi Jesusta Pedro nirqa: “Yachachikuq*, ima sumaqmi kaypi kasqaykuqa. Ruwarusaqkuyá kimsa carpakunata: Hukninta qampaq, hukninta Moisespaq, huknintañataq Eliaspaq”, nispa.  Ichaqa llumpay mancharisqallaña kasqankuraykum Pedroqa mana imanakuytapas atirqachu.  Hinaptinmi puyu rikuriramuspan llantuyninwan paykunata tapaykurqa. Puyumantañataqmi kaynata nimurqa: “Paymi kuyasqay churiy, uyariychikyá”, nispa.  Chaymi muyuriqninkuta qunqayllamanta qawarispanku pitapas manaña rikurqakuchu, aswanqa Jesusllatañam rikurqaku.  Urqumanta uraykamuchkaptinkum Jesusqa chunkay-chunkayta kamachirqa rikusqankuta pimanpas ama willakunankupaq. Willakunankuqa karqa runapa churin* wañusqakunapa kasqanmanta kawsarimuptinñam. 10  Kamachisqantaqa kasukurqakum ichaqa kikinkupuram atipanakurqaku wañusqakunapa kasqanmanta hatarimuy ima ninan kasqanmanta. 11  Chaymantañataqmi tapuyta qallaykurqaku: “¿Imanasqataq escribakunaqa* ninku Elias puntata hamunanmanta?”, nispanku. 12  Jesusñataqmi nirqa: “Chiqaptapunim Eliasqa puntata hamunqa, hinaspam tukuy imata allichanqa. Ichaqa, ¿imaynanpitaq qillqasqa kachkan runapa churin tukuy imawan ñakarinanmanta hinaspa chiqnisqa kananmantapas? 13  Ñuqam ichaqa nikichik: Eliasqa ñam hamurunña, hinaptinmi paymanta qillqasqa kasqanman hina munasqankuta ruwarunku”, nispa. 14  Chaymantam, Jesuswan kimsan qatiqninkuna wakin qatiqninkunapa kasqanman chayaruspanku paykunapa muyuriqninpi rikururqaku achka-achkallaña runakunata. Rikururqakutaqmi iskay-kimsa escribakunatapas qatiqninkunawan atipanakuchkaqta. 15  Chaymantañataqmi Jesusta chaylla rikuruspanku chay runakuna admirakurqaku, hinaspam rimaykukunankupaq Jesusman kallparqaku*. 16  Hinaptinmi paykunata Jesus tapurqa: “¿Imamantataq qatiqniykunawan atipanakuchkankichik?”, nispa. 17  Chaymi huk kaqnin runa nirqa: “Yachachikuq, qanmanmi churiyta pusamurqani mana rimachiq demonioyuq kasqanrayku, 18  maypipas hapiruspanmi pampaman wikapan, hinaptinmi churiyqa siminmanta pusuqullataña aqtuspan kiruntapas kirichichichin hinaspam mana kallpayuqña rikurirun. Qatiqnikikunatam nirqani churiymanta demoniota qarqunankupaq, ichaqa manam atirqakuchu”, nispa. 19  Chaymi Jesus nirqa: “Yaw, mana iñiyniyuq runakuna*, ¿haykapikamataq qamkunawan kasaq? ¿Haykapikamataq aguantasqaykichik? Kayman pusamuwaychik chay warmachata”, nispa. 20  Chaymi warmata pusarqaku. Hinaptinmi demonioqa rikuruspan warmata pampapi chutaykacharachirqa, chaymi wikapakuspan pusuqullataña siminmanta aqturqa hinaspan chutaykachakurqa. 21  Hinaptinmi Jesusqa warmapa taytanta tapurqa: “¿Hayka tiempoñataq churikiqa kayna kachkan?”, nispa. Chaymi pay nirqa: “Warmacha kasqanmantapacham, 22  wañurachinanpaqmi achka kutita ninamanpas yakumanpas wichiykachin. Imallatapas ruwayta atispaykiqa llakipayaykuwaykuyá, hinaspayá yanapaykullawayku”, nispa. 23  Jesusñataqmi nirqa: “¿Imanasqataq ninki ‘atispaykiqa’ nispa? ¡Iñiyniyuq runapaqqa tukuy imapas atinallanmi!”, nispa. 24  Chaymi warmachapa taytan qaparispan chaylla nirqa: “¡Iñinim! ¡Ichaqa yanapaykuwayá aswan iñiyniyuq kanaypaq!”, nispa. 25  Locollamanña kallpaspanku* runakuna paykunaman asuykamusqanta Jesus rikuruspanmi, chay demoniota kaynata qaqcharqa: “Mana rimachiq hinaspa mana uyarichiq demonio, kamachikim paymanta lluqsinaykipaq hinaspa amaña haykapipas kaqmanta yaykunaykipaq”, nispa. 26  Chaymi qaparirachispan hinaspa achka kutita chutaykacharachispan demonioqa lluqsirurqa, hinaptinmi warmaqa wañusqa hina rikurirurqa, chaymi yaqa llapallan runakuna nirqaku: “¡Wañurunmi!”, nispa. 27  Jesusñataqmi makinmanta hapiykuspan aysariykurqa, hinaptinmi warmaqa sayarirurqa. 28  Chaymi wasiman yaykuruptinku qatiqninkuna sapallanpi Jesusta tapurqaku: “¿Imanasqataq ñuqaykuqa demonio qarquyta mana atirqanikuchu?”, nispanku. 29  Jesusñataqmi paykunata nirqa: “Diosta mañakuspallam kayna demoniotaqa qarquchwan”, nispa. 30  Chaymanta lluqsispankum Galilea lawninta pasarqaku, Jesusmi ichaqa mana munarqachu maypi kasqanta pipas yachanankuta. 31  Chay risqankupim payqa qatiqninkunata kaynata yachachirqa: “Runapa churinqa runakunapa makinmanmi entregasqa kanqa, hinaptinmi wañuchinqaku. Ichaqa wañuchiptinkupas kimsa punchawmantam hatarimunqa”, nispa. 32  Paykunam ichaqa chayna nisqanta mana entienderqakuchu, manchakurqakutaqmi tapuykuytapas. 33  Chaymantañataqmi Capernaum llaqtaman chayarurqaku. Hinaptinmi wasipi kachkaptinku paykunata tapurqa: “¿Imamantataq ñanpi atipanakurqankichik?”, nispa. 34  Paykunañataqmi upallalla karqaku, ñanpi kikinkupura pim aswan riqsisqa kasqankumanta atipanakamusqankurayku. 35  Chaymi tiyaykuspan chunka iskayniyuq qatiqninkunata qayaspan nirqa: “Pipas puntapi kayta munaqqa llapankupa sullkanmi hinaspa llapallanpa serviqninmi kanan”, nispa. 36  Chaymantañataqmi qatiqninkunapa chawpinkupi huk warmachata sayaykachirqa hinaspam makinkunata hombrochanman churaykuspan nirqa: 37  “Pipas ñuqapa sutiypi kayna warmachakunamanta mayqillantapas chaskiqqa ñuqatam chaskiwan, pipas ñuqata chaskiwaqqa manam ñuqallatachu chaskiwan aswanqa chaskintaqmi kachamuwaqniytapas”, nispa. 38  Juanmi nirqa: “Yachachikuq, huk runatam rikuramuniku qampa sutikipi demoniokunata qarquqta. Hinaptinmi harkakurqaniku ñuqanchikwan mana purisqanrayku”, nispa. 39  Jesusñataqmi nirqa: “Amayá harkakuychikchu, manam pipas ñuqapa sutiypi milagrokunata ruwachkaspanqa ñuqamanta mana allintaqa chayllaqa rimanmanchu, 40  pipas mana contranchikpi kaqqa ñuqanchikwanmi kachkan. 41  Chiqaptapunim nikichik: Pipas Cristopa kasqaykichikrayku huk vaso yakullatapas haywaykusuqnikichikqa chaskinqapunim premionta. 42  Ichaqa ñuqapi iñiq kay uchuychakunamanta hukninta pipas huchallichiqpaqqa, aswan allinmi kanman asnopa muyuchisqan molino rumita kunkanman wataruptinku lamar quchaman wischusqa kaynin. 43  Makiki haykapipas pantachisuptikiqa* kuchukuruyá, allinqa kanman kawsay vidaman mana makiyuq yaykuynikim iskaynin makintin gehena* nisqaman rinaykimantaqa, chaypiqa ninapas mana amachay atinam. 44  *⁠—⁠— 45  Chakiki pantachisuptikipas kuchukuruyá, allinqa kanman kawsay vidaman mana chakiyuq yaykuynikim iskaynin chakintin gehenaman wischusqa kanaykimantaqa. 46  *⁠—⁠— 47  Chaynallataq ñawiki pantachisuptikiqa wikaparuy, allinqa kanman Diospa munaychakuyninman chullalla ñawiyuq yaykuynikim iskaynin ñawintin gehenaman wischusqa kanaykimantaqa, 48  chaypiqa manam urukunapas wañunchu nitaqmi ninapas amachakunchu. 49  Imaynam mikuyman kachita hinanku, chaynam runakunaman nina tallikaykamunqa. 50  Kachiqa allinpunim ichaqa haykapipas qamyayaruptinqa*, ¿imawantaq kutichiwaqchik puchqu kayninta? Kachiyuqyá kaychik hinaspayá llapallaykichik hawkalla kaychik”, nispa.

Willakuykuna

Utaq: “Gobiernonta”. Qawaytaq: Palabrakuna entiendenapaq listata.
Kaypiqa nichkan: “Rabi”, nispam.
Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Raskirqaku”.
Utaq: “Kay tiempopi runakuna”.
Utaq: “Raskispanku”.
Kaypiqa nichkan: “Urmachisuptikiqa”, nispam.
Chayqa karqa Jerusalenpa hawa lawninpi basura kañananku sitiom. Qawaytaq: Palabrakuna entiendenapaq listata.
Kay versiculokunaqa manam kanchu ñawpa tiempo qillqakunapiqa. Wakin bibliakunapi kaspanqa manam Diospa yanapayninwan qillqasqachu.
Kay versiculokunaqa manam kanchu ñawpa tiempo qillqakunapiqa. Wakin bibliakunapi kaspanqa manam Diospa yanapayninwan qillqasqachu.
Utaq: “Qaymayaruptinqa”.