Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Marcos 4:1-41

  • DIOSPA KAMACHIMUSQANTA IMAKUNAWAN JESUS RIKCHANACHISQANMANTA (1-34)

    • Tarpuqwan rikchanachisqanmanta (1-9)

    • Imanasqa Jesus rikchanachiykunawan yachachisqanmanta (10-12)

    • Tarpuqwan rikchanachisqan ima ninan kasqanmanta (13-20)

    • Mecherotaqa canasta ukupi mana churanamanta (21-23)

    • Imayna tupusqanchikman hina tupusqa kananchikmanta (24, 25)

    • Muhu tarpuq puñusqanmanta (26-29)

    • Mostaza muhumanta (30-32)

    • Rikchanachiykunawan yachachisqanmanta (33, 34)

  • Sinchi wayrata Jesus hawkayachisqanmanta (35-41)

4  Kaqllam Jesusqa yachachiyta qallaykurqa lamar quchapa patanpi, hinaptinmi nana-nanaq runakuna paypa kasqanman huñunakaramurqaku. Chaymi payqa boteman siqaspan tiyaykurqa quchapa patanmanta karuniqpi, llapa runakunañataqmi lamar quchapa patallanpi kachkarqaku.  Hinaptinmi rikchanachiykunawan tukuy imamanta yachachiyta qallaykurqa, yachachispanmi nirqa:  “Uyariychikyá. Huk runam tarpuq rirqa.  Tarpuchkaptinmi wakin muhuqa ñanman wichirqa, chaymi urpikuna* hamuspan mikururqa.  Wakin muhuñataqmi wichirqa mana ancha allpayuq ranrakunaman, chaymi utqayllaman* wiñaramurqa mana ancha allpa kasqanrayku.  Ichaqa inti llumpayta rupamuptinmi chakiyta qallaykurqa* hinaspam mana sapiyuq kasqanrayku chakirurqa.  Wakin muhuñataqmi kichkakunapa kasqanman wichirqa, kichkakunañataqmi wiñaramuspan iquyarachirqa, hinaptinmi mana rururqachu.  Wakin muhukunam ichaqa allin allpaman wichirqa, chaymi wiñaspan chulla muhullamanta rururqa kimsa chunkata, suqta chunkata hinaspa pachakta”, nispa.  Chaymantam nirqaraq: “Pipas rinriyuqqa uyarichunyá”, nispa. 10  Sapallan kachkaptinmi chunka iskayniyuq qatiqninkunawan muyuriqninpi runakuna tapuyta qallaykurqaku rikchanachiykunawan rimasqanmanta. 11  Chaymi payqa nirqa: “Qamkunam yanapasqa kankichik Diospa munaychakuyninmanta* pakasqa kaqkunata entiendenaykichikpaq, wakinkunapaqmi ichaqa tukuy imapas kachkan rikchanachiykunallapi, 12  chaynapi qawaspapas mana qawanankupaq, uyarispapas mana entiendenankupaq hinaspa Diosman haykapipas mana kutirikuptinku mana pampachasqa kanankupaq”, nispa. 13  Chaymantapas paykunatam nirqa: “Kay rimasqay rikchanachiyta mana entiendespaykichikqa, ¿imaynamá wakin rikchanachiykunataqa entiendewaqchik? 14  Tarpuq runaqa Diospa palabrantam tarpun. 15  Wakin runakunaqa kanku ñanpi wichiq muhu hinam, Diospa palabranta uyariruptillankum satanasqa hamuruspan sunqunkupi tarpusqa Diospa palabranta qichurun. 16  Wakin runakunañataqmi kanku ranraman wichiq muhu hina, Diospa palabranta chaylla uyariruspankum kusikuyllawanña chaskinku. 17  Ichaqa mana sapichasqa kasqankuraykum mana unaytachu takyanku, chaymi Diospa palabranrayku sasachakuykuna kaptin hukmanyarunku utaq chiqnisqa kaspanku hukmanyarunku. 18  Wakinkunañataqmi kanku kichkakunapa kasqanman wichiq muhu hina. Paykunaqa kanku Diospa palabranta uyariqkunam, 19  ichaqa sunqunkumanmi yaykurun kay pachapi kaqkunamanta afanakuy, kapuqniyuq kaywan engañachikuy hinaspa tukuy imakunata munapayay, tukuy chaykunam uyarisqanta iquyarachin, chaymi mana rurunchu. 20  Wakin runakunam ichaqa kanku muhupa wichisqan allin allpa hina, paykunam Diospa palabranta uyarinku hinaspa kusikuyllawanña chaskinku, chaymi chulla muhullamanta rurunku kimsa chunkata, suqta chunkata hinaspa pachakta”, nispa. 21  Jesusqa nirqataqmi: “¿Yaqachum mecherotaqa churanmanku canasta ukupi utaq cama ukupi? Manamá. Achkitaqa alto patachapim churana. 22  Manam imapas pakasqaqa kanmanchu tiempo pasaptin mana rikurichisqa kananpaq hinaqa, manataqmi imapas suma-sumaq pakasqaqa kanmanchu mana yachakunanpaq hinaqa. 23  Pipas rinriyuqqa uyarichunyá”, nispa. 24  Nirqataqmi: “Uyarisqaykichikta umaykichikman churaychik. Imayna tupusqaykichikman hinam qamkunapas tupusqa kankichik. Qamkunamanqa yapasunkichikraqmi. 25  Kapuqniyuqqa astawanraqmi chaskinqa, mana kapuqniyuqmi ichaqa kapuqnintapas qichuchikunqa”, nispa. 26  Kaytapas nirqataqmi: “Diospa munaychakuyninqa rikchakun chakrapi muhu tarpuq runamanmi, 27  paymi sapa tuta puñun hinaspa sapa punchaw hatarin, muhuñataqmi wiñaramuspan hatunta wiñan, chay runam ichaqa mana yachanchu imayna wiñasqanta. 28  Kikillanmantam allpaqa as-asllamanta kawsayta qispichin: Puntatam rapillataraq*, chaymantam espigataña hinaspañataq rurutaña. 29  Puquruptinñataqmi chay runaqa rutuyta qallaykun cosecha chayaramusqanrayku”, nispa. 30  Huktawanmi nirqa: “¿Imawantaq Diospa munaychakuynintaqa tupachichwan utaq imawan rikchanachispataq entiendechichwan? 31  Mostaza muhuwanmi*, chay muhuqa kay pachapi llapallan muhukunamantapas allpapi tarpuna aswan uchuychalla muhum, 32  tarpuruptinkum ichaqa wiñamuspan llapallan mikuna yuyukunatapas masyarunraq, kallmankunapas hatuntam wiñan hinaptinmi alton pawaqkunapas chaypi tiyaspanku llantukunku”, nispa. 33  Jesusqa chayna rikchanachiykunawanmi Diospa palabranmanta entiendenankukama yachachirqa. 34  Mana rikchanachiywanqa manam paykunamanqa rimapayarqachu, qatiqninkunamanmi ichaqa tukuy imamanta sapallankupi entiendechirqa. 35  Chay punchaw tutaykuqtam paykunata nirqa: “Hakuchik quchapa wak law patanman”, nispa. 36  Chaymi qatiqninkunaqa runakunata aviaruspanku Jesusta botepi pusarqaku, chaypiqa karqam huk botekunapas. 37  Hinaptinmi manchakuypaq llumpay sinchi wayra qallakuykurqa, yakupas huqarikuspam boteta nisyu-nisyuta laqyarqa, chaymi yakuqa boteman yaqaña huntaykuchkarqa. 38  Jesusñataqmi botepa qipa lawninpi sawnakuykuspan puñuchkarqa. Hinaptinmi rikchachispanku nirqaku: “¡Yachachikuq!, ¿manachu imapas qukusunki wañuy patapiña kasqanchikmanta?”, nispanku. 39  Chaymi rikchariruspan wayrata qaqcharqa hinaspa lamar quchata nirqa: “¡Upallaspayki hawkayay!”, nispa. Hinaptinmi wayra sayaruptin lliw hawkayarurqa. 40  Chaymi paykunata nirqa: “¿Imanasqataq llumpayta manchakunkichik? ¿Manaraqchu iñiynikichik kan?”, nispa. 41  Paykunam ichaqa llumpayta mancharikuspanku ninakurqaku: “¿Pitaq kay runaqa kanman wayrapas lamar quchapas kasunanpaqqa?”, nispanku.

Willakuykuna

Utaq: “Urpitukuna”.
Utaq: “Apurawllaman”.
Utaq: “Tawirurqa”.
Utaq: “Gobiernonmanta”. Qawaytaq: Palabrakuna entiendenapaq listata.
Utaq: “Llaqillataraq”.
Kayqa Israel lawpi uchuychalla muhucham, tawa metro mastam wiñan.