Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Marcos 3:1-35

  • Makinta mana haywariq runata Jesus sanoyachisqanmanta (1-6)

  • Achka-achka runakuna lamar quchapa patanpi kasqankumanta (7-12)

  • 12 apostolkunamanta (13-19)

  • Chuya espiritupa contranpi rimasqankumanta (20-30)

  • Jesuspa mamanmanta hinaspa wawqinkunamanta (31-35)

3  Jesusmi kaqllamanta yaykurqa yupaychana wasiman*, chaypim kachkarqa makinta mana haywariq runa.  Hinaptinmi fariseokunaqa* Jesusta qawarayachkarqaku chay runata sabado punchawpi sanoyachiptinqa tumpanankupaq.  Makinta mana haywariq runatañataqmi Jesus nirqa: “Hatarispayki kay chawpiman hamuy”, nispa.  Chaymantañataqmi fariseokunata nirqa: “Sabado punchawpiqa, imataq allin kanman: ¿Allin kaqta ruwaychu icha mana allin kaqta ruwaychu? ¿Vida* salvaychu icha wañuchiychu?”, nispa. Paykunañataqmi mana imatapas rimarirqakuchu.  Hinaptinmi piñakuywan paykunata qawarispan rumi sunqu kasqankumanta anchata llakikururqa, hinaspam chay runata nirqa: “Makikita haywariy”, nispa. Haywariykuptimi makinqa sanoyarurqa.  Chayta qawaykuspankum fariseokunaqa lluqsirurqaku, hinaspam Herodespa* qatiqninkunawan chaylla huñunakuspanku tanteanakurqaku Jesusta wañuchinankupaq.  Jesusñataqmi qatiqninkunawan kuska lamar quchapa kasqan lawman rirqaku, hinaptinmi Galileamanta hinaspa Judeamanta achka-achka runakuna qatirqaku.  Tukuy ima ruwasqanmanta uyariruspankum Jerusalenmanta, Idumeamanta, Jordan mayupa chimpankunamanta, Tiro hinaspa Sidon llaqtakunapa muyuriqninmantapas achka-achka runakuna asuykurqaku.  Chaymi qatiqninkunata nirqa taksa botechata paypaq alistanankupaq, chaynapi achkallaña runakuna mana ñitirunanpaq. 10  Jesusqa achkallaña runakunatam sanoyachirqa hinaptinmi llumpay unquqkunapas llachpaykuyta munaspanku muyuriqninpi ñitinakurqaku. 11  Mana allin espiritukunapas maypacha payta rikuspankum ñawpaqninpi qunqurakuykuspa kumuykurqaku, hinaspam qaparirqaku: “¡Qamqa Diospa churinmi kanki!”, nispanku. 12  Ichaqa chunkay-chunkaytam nirqa paymanta ama willakunankupaq. 13  Chaymantam Jesusqa urquman qispiruspan qayachimurqa akllasqankunata, chaymi paykunaqa paypa kasqanman rirqaku. 14  Hinaptinmi chunka iskayniyuq qarikunata huñuspan suticharqa: “Apostolkuna”, nispa. Paykunam puriqmasin kanan karqa, paykunatataqmi Diosmanta willakunankupaqpas kachanan karqa. 15  Qunantaqmi karqa atiytapas demoniokunata qarqunankupaq. 16  Chay chunka iskayniyuq akllasqan qarikunam karqaku: Simon, paytam suticharqa Pedrowan, 17  Zebedeopa churin Santiago, Santiagopa wawqin Juan (paykunatam suticharqa Boanerges nispa, chayqa “rayopa churinkuna” ninanmi), 18  Andres, Felipe, Bartolomey, Mateo, Tomas, Alfeopa churin Santiago, Tadeo, Simon Cananita* 19  hinaspa Judas Iscariote, paymi qipa tiempopi traicionarurqa. Chaymantam Jesusqa huk wasiman yaykurqa. 20  Hinaptinmi chaypipas kaqllamanta runakunaqa huñunakururqaku, chaymi paykunaqa manaña mikuytapas atirqakuchu. 21  Chayta yacharuspanmi Jesuspa ayllunkuqa pusamunankupaq rirqaku, paykunaqa nirqakum: “Locoyarunmi”, nispa. 22  Jerusalenmanta uraykamuq escribakunapas* nirqakum: “Payqa Beelzebubniyuqmi* kachkan, chaymi demoniokunataqa qarqun demoniokunapa kamachiqnin yanapaptin”, nispa. 23  Hinaptinmi Jesusqa paykunata qayaykuspan rikchanachiykunawan rimapayaspan nirqa: “¿Imaynataq satanasqa qarqunman satanastaqa? 24  Sichu huk gobierno rakinasqa kanman hinaspaqa manam takyanmanchu, 25  wasipi kaqkunapas rakinasqa kaspankuqa manam takyanmankuchu. 26  Chaynallataqmi satanaspas kikinpa contranpi hatariruspanqa hinaspa rakinasqa rikuriruspanqa mana takyanqachu, aswanqa chinkarunqam. 27  Kallpasapa runapa wasinmantaqa, manam pipas kapuqninkunataqa suwayta atinmanchu manaraq wasiyuqta chaqnachkaspanqa. Chaqnaruspallanmi wasintaqa suwarunman. 28  Chiqaptapunim nikichik: ‘Runakunaqa tukuy imamantam pampachasqa kanqaku, ima hucha ruwasqankumantapas hinaspa insultaspa ima mana allin rimasqankumantapas. 29  Chuya espirituta* insultaspa mana allin rimaqmi ichaqa mana haykapipas pampachasqachu kanqa, payqa wiñaypaq huchayuqmi kanqa’”, nispa. 30  Chaynatam Jesus nirqa “demonioyuqmi” nispa runakuna niptinku. 31  Chaymantam Jesuspa maman hinaspa wawqinkuna hamuruspanku hawapi sayarqaku, chaymi qayachimurqaku. 32  Ichaqa achkallaña runakunam Jesuspa muyuriqninpi tiyachkarqaku, chaymi paykuna nirqaku: “Mamaykiwan wawqikikunam hawapi kachkanku, paykunam maskasuchkanki”, nispa. 33  Payñataqmi nirqa: “¿Pitaq mamayqa, pitaq wawqiykunaqa?”, nispa. 34  Hinaspanmi muyuriqninpi tiyaqkunata qawariykuspan nirqa: “¡Qawaychik, kayqaya mamayqa hinaspa wawqiykunaqa! 35  Pipas Diospa munasqanta ruwaqmi wawqiyqa, paniyqa hinaspa mamayqa”, nispa.

Willakuykuna

Kaypiqa nichkan: “Sinagoga”, nispam. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Alma”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
“Cananita” ninanqa: “Ganaswan ruwaq”, ninanmi.
Qaway: Palabrakuna entiendenapaq listata.
“Beelzebub” sutiqa satanaspa huknin sutinmi.
Utaq: “Diospa atiyninta”. Qawaytaq: Palabrakuna entiendenapaq listata.