Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Marcos 2:1-28

  • Suchu runata Jesus sanoyachisqanmanta (1-12)

  • Leviy sutiyuq runata Jesus qayasqanmanta (13-17)

  • Ayunomanta tapusqanku (18-22)

  • Sabado punchawta Jesus munaychakuq kasqanmanta (23-28)

2  Ichaqa, iskay-kimsa punchawmantam Capernaum llaqtaman Jesusqa kaqlla kutirqa, hinaptinmi wasipiña tarikusqanmanta willakurqaku.  Chaymi achka runakuna huñunakaramurqaku punkutapas manaña yaykuy atinakama, hinaptinmi payqa sumaq willakuymanta willakuyta qallaykurqa.  Chaymanmi tawa runakuna suchu runata wantuspa aparqaku.  Ichaqa Jesusman asuykachiytam mana atirqakuchu achkallaña runakuna kasqanrayku, chaymi wasipa qatanta hurquruspanku uchkururqaku kamas Jesuspa kasqan lawta hinaspam chaynintaña suchuta chakanapi uraykachirqaku.  Paykunapa iñiyninta Jesus qawaykuspanmi chay suchuta nirqa: “Churilláy, huchaykikunaqa pampachasqañam”, nispa.  Chaypitaqmi tiyachkarqaku wakin escribakunapas*, hinaspam sunqullankupi nichkarqaku:  “¿Imanasqataq kay runaqa chaynata rimachkan? Diostam kamichkan. Diosllamiki hucha pampachaytaqa atinman”, nispanku.  Jesusmi ichaqa kikinkupura chayna piensasqankuta chaylla yacharuspan nirqa: “¿Imanasqataq sunquykichikpi chaynata nichkankichik?  ¿Mayqintaq aswan allin kanman, suchuta ‘huchaykikunam pampachasqaña’ niychu, icha ‘hatarispa chakanaykita aparikuspa puriy’ niychu? 10  Ichaqa qawankichikmi runapa churinqa* kay pachapi huchata pampachanaypaq atiyniyuq kasqayta”, nispa. Hinaspam suchuta nirqa: 11  “Ñuqam niki: Hatarispaykiyá chakanaykita huqarispa wasikiman ripukuy”, nispa. 12  Chaywanmi payqa hatarirurqa hinaspanmi llapallanku qawachkaptin chakananta chaylla huqarispan puristin lluqsirqa. Chaymi lliw runakuna admirakuspanku Diosta hatuncharqaku, hinaspam nirqaku: “Manam haykapipas kaynataqa rikurqanchikchu”, nispanku. 13  Chaymantam kasqallan Jesusqa lamar quchapa patanta richkarqa, hinaptinmi payman llapa runakuna hamuptin payñataq yachachirqa. 14  Chayninta richkaspanmi Alfeopa churin Leviyta rikururqa impuesto mañananpi tiyachkaqta, hinaspanmi nirqa: “Qatiqniyyá kay”, nispan. Chaymi payñataq hatarispan qatirqa. 15  Chaymantañataqmi Leviypa wasinpi mikuchkarqa*. Chaypitaqmi impuesto mañaq achkallaña runakunawan huchasapakunapas Jesuswan, hinaspa qatiqninkunawan mikuchkarqaku, paykunamantapas achkam Jesustaqa qatirqaku. 16  Chaypim fariseokunapa* qatiqnin escribakuna* qawarqaku huchasapakunawan hinaspa impuesto mañaqkunawan mikuqta, hinaspam Jesuspa qatiqninkunata tapurqaku: “¿Payqa mikunchu impuesto mañaqkunawan hinaspa huchasapakunawan?”, nispanku. 17  Hinaptinmi chayta uyariruspan Jesusqa nirqa: “Sano kaqkunaqa manam doctortaqa necesitankuchu, unquqkunam ichaqa necesitanku. Hamurqaniqa manam allin runakunata qayanaypaqchu aswanqa huchasapakunata qayanaypaqmi”, nispa. 18  Juanpa chaynataq fariseokunapa qatiqninkunaqa ayunaqkum, chaymi Jesusman asuykuspanku nirqaku: “¿Imanasqataq qatiqnikikunaqa mana ayunankuchu Juanpa chaynataq fariseokunapa qatiqninkuna hinaqa?”, nispanku. 19  Jesusñataqmi nirqa: “¿Yaqachum amistadninkunawanraq novio kachkaptin amistadninkuna ayunanmanku? Paykunawanraq novio kanankamaqa manam ayunanmankuchu. 20  Ichaqa chayamunqam punchaw paykunamanta novio qichusqa kananpaq, hinaptinmi chay punchawpi chayraq ayunanqaku. 21  Manam pipas mawka pachataqa remendanmanchu musuq latapawanqa, chaynata ruwaptinqa musuq kaqmi chintiruspan mawka pachata astawan llikirunman. 22  Chaymantapas manaraq puqusqa vinotaqa manam mawka odrekunapiqa pipas churanmanchu. Chayna kaptinqa mawka odrekunatachá vino tuqyarachinman, hinaptinmi vinopas usunman hinaspa odrekunapas mana valeqña rikurirunman. Chaymi manaraq puqusqa vinotaqa musuq odrekunapi churana”, nispa. 23  Sabado punchawta trigo ukunta Jesus richkaptinmi qatiqninkunaqa ristin trigopa espiganta* rachuyta qallaykurqaku. 24  Chaymi fariseokuna nirqaku: “¿Imanasqataq paykunaqa ruwachkanku sabado punchawpi mana ruwanataqa?”, nispanku. 25  Payñataqmi nirqa: “¿Manachu haykapipas leerqankichik mana imanpas kaptin puriqmasinkunapiwan yarqaymanta kaspan Davidpa imam ruwasqanta? 26  Riqsisqa sacerdote Abiatarmanta willakuypi hinam, payqa Diospa wasinman yaykuruspan Diospaq kaq tantata mikururqa hinaspam runankunamanpas aypurqa, chay tantataqa manam paykunaqa mikunankuchu karqa, aswanqa sacerdotekunallam”, nispa. 27  Chaymantapas nirqam: “Diosqa manam sabadoraykuchu runataqa unancharqa, aswanqa sabado punchawtam runarayku rikurichirqa, 28  chaymi runapa churinqa* sabado punchawtapas munaychakun*”, nispa.

Willakuykuna

Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Mesapi tiyachkarqa”.
Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Rurunta”.
Qaway: Palabrakuna entiendenapaq listata.
Kaypiqa nichkan: “Sabado punchawpapas señornin”, nispam.