Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Lucas 9:1-62

  • Diosmanta willakunankupaq 12 apostolninkunata Jesuspa yachachisqanmanta (1-6)

  • Jesusmanta uyariruspan Herodes mancharisqallaña kasqanmanta (7-9)

  • 5.000 runakunaman Jesuspa mikuchisqanmanta (10-17)

  • Jesusta ‘qamqa kanki Cristom’ nispa Pedro nisqanmanta (18-20)

  • Wañukunanmanta Jesuspa willakusqan (21, 22)

  • Jesuspa qatiqninkuna imayna kanankumanta (23-27)

  • Jesuspa rikchaynin tikrakusqanmanta (28-36)

  • Demoniopa munaychakusqan warma sanoyasqanmanta (37-43a)

  • Wañukunanmanta Jesuspa yapamanta willakusqan (43b-45)

  • Mayqanninku aswan riqsisqa kasqankumanta Jesuspa qatiqninkuna atipanakusqanku (46-48)

  • Pipas contranchikpi mana kaqqa ñuqanchikwan kasqanmanta (49, 50)

  • Samaria law llaqtachapi Jesusta mana chaskisqankumanta (51-56)

  • Jesusta imayna qatinamanta (57-62)

9  Chaymantam chunka iskayniyuq apostolkunata qayaykuspan atiyta qurqa llapa demoniokunata qarqunankupaq hinaspa unquqkunata sanoyachinankupaq.  Paykunatam kacharqa Diospa munaychakuyninmanta* willakamunankupaq hinaspa runakunata sanoyachimunankupaq,  hinaspam nirqa: “Viajepaqqa amam imatapas apankichikchu: Tanuwatapas, alforjatapas, tantatapas, qullqitapas nitaq mudakuna pachatapas.  Ichaqa maypipas wasiman yaykuspaykichikqa, chaypi qipakuychik llaqtamanta lluqsinaykichikkama.  Maypipas mana chaskisuptikichikqa chay llaqtamanta lluqsispaykichikyá chakikichikpi allpatapas taspikuychik pantaypi kasqankuta yachanankupaq”, nispa.  Chaymi paykunaqa rispanku sapa llaqtachakunapi purirqaku sumaq willakuyta willakustin hinaspa unquqkunata tukuy lawpi sanoyachistin.  Galilea distritota kamachiq Herodesmi* tukuy ima pasakusqanmanta uyarirurqa, hinaspam huktaña-huktaña runakuna rimaptinku llumpay mancharisqallaña kachkarqa. Wakinkunam rimarqaku wañusqanmanta Juan kawsariramusqanta,  wakinkunañataq Elias rikuriramusqanta, wakinkunañataqmi rimarqaku ñawpa tiempopi Diosmanta willakuqkunamanta* huk kaqnin kawsariramusqanta.  Chaymi Herodes nirqa: “Juantaqa ñuqam kunkanta qurururqani, hinaptinqa ¿pitaq kanman chay runaqa? ¿Pimantataq chaykunata rimachkanku?”, nispa. Chaymi rikuykuyta munarqa. 10  Apostolkuna kutiramuspankum tukuy ima ruwasqankumanta Jesusman willakurqaku. Hinaptinmi paykunata pusarikuspan Betsaida llaqtaman pasakurqa mana runapa kasqanman. 11  Runakunam ichaqa yacharuspanku qatirqaku. Payñataqmi chay runakunata allinta chaskiykuspan Diospa munaychakuyninmanta willarqa, unquqkunatapas sanoyachirqam. 12  Tardeykuptinñataqmi chunka iskayniyuq apostolkuna Jesusman asuykuspan nirqaku: “Chunniqmi kay kasqanchikqa, niykuyá runakunata pasakunanpaq chaynapi hichpapi llaqtachakunaman hinaspa chakrakunaman rispanku samapakunanku wasita hinaspa mikunankuta maskamunankupaq”, nispa. 13  Jesusñataqmi nirqa: “Qamkunayá imallatapas quychik mikunankupaq”, nispa. Hinaptinmi paykunaqa nirqaku: “Manam imaykupas kanchu, kapuwachkankuqa pichqa tantawan iskay challwallaykum, kay llapallan runakunaman mikuchinaykupaqqa rinaykuch kanman mikuy rantiq”, nispanku. 14  Chaypiqa karqaku yaqa pichqa waranqa qarikunam. Jesusmi ichaqa qatiqninkunata nirqa: “Runakunata yaqa pichqa chunkatakama tiyachiychik”, nispa. 15  Paykunañataqmi kasukuspanku llapallan runakunata tiyachirqaku. 16  Hinaptinmi pichqa tantakunatawan iskaynin challwakunata hapiykuspan hanaq pachata qawarirqa, hinaspam graciasta qurqa, chaymantañataqmi partiykuspan qatiqninkunaman qurqa runakunaman aypunankupaq. 17  Chaymi saksanankukama llapallanku mikurqaku. Puchuqtapas chunka iskayniyuq canastatam huñurqaku. 18  Chaymantam Jesusqa Diosta sapallanpi mañakuchkarqa, hinaptinmi qatiqninkuna asuykurqaku, chaymi paykunata tapurqa: “¿Pi kasqaytataq runakunaqa ninku?”, nispan. 19  Paykunañataqmi nirqaku: “Wakinmi ninku bautizaq Juan kasqaykita, hukkunañataq Elias kasqaykita, wakinñataqmi ninku ñawpa tiempopi Diosmanta willakuqkunamanta* huk kaqnin kawsarimuq kasqaykita”, nispa. 20  Chaymi Jesus nirqa: “Qamkunaqa, ¿pi kasqaytataq ninkichik?”, nispa. Hinaptinmi Pedro nirqa: “Qamqa kanki Diospa kachamusqan Cristom*”, nispan. 21  Hinaspam paykunata rimapayaspan chunkay-chunkayta avisarqa chaymanta ama pimanpas willakunankupaq. 22  Jesusqa nirqataqmi: “Runapa churinqa* tukuy imapim ñakarichisqa kanqa. Chaynallataqmi paytaqa qipanchanqaku autoridadkuna, riqsisqa sacerdotekuna hinaspa escribakunapas*. Chaymantapas wañuchiptinkum kimsa punchawmanta kawsarimunqa”, nispa. 23  Chaymantam llapallanta nirqa: “Pipas qatiwayta munaqqa amaña kikillanpaq kawsaspayá, sapa punchaw ñakarichiqnin qirunta* qipikuykuspa hinalla qatiwachun. 24  Pipas vidanta* salvay munaqqa wañunqam, pipas ñuqarayku wañuqmi ichaqa kawsanqa. 25  Chaynaqa, ¿imatataq runaqa hurqukunman kay pachapi tukuy imatapas hayparuspan vidantañataq pierderuspan utaq imapas pasaruptinqa? 26  Ñuqamanta hinaspa rimasqaykunamanta pinqakuqmantaqa runapa churinpas pinqakunqam kanchariyninpi chayamuspan. Pinqakunqataqmi hanaq pacha taytapa hinaspa chuya angelkunapa kanchariyninpi chayamuspanpas. 27  Chiqaptapunim nikichik: Kaypi sayaqkunamanta wakinqa manapunim wañunqakuchu Diospa munaychakuyninta puntata rikunankukama”, nispa. 28  Chaykuna rimasqanmanta yaqa pusaq punchaw pasaruptinmi Jesusqa urquman qispirqa Diosta mañakuq, Pedrota, Juanta hinaspa Santiagota pusarikuspan. 29  Mañakuchkaptinmi rikchaynin tikrakururqa, pachanpas ñawita pinqachiq yuraq-yuraqmi rikurirurqa. 30  Karqataqmi paywan rimaq iskay qarikunapas, paykunam karqaku Moises hinaspa Elias. 31  Paykunam kancharichkaq rikuriruspanku rimarqaku kay pachamanta Jesus imayna ripukunanmanta, chayqa kanan karqa Jerusalenpim. 32  Pedroñataqmi paywan kaqkunapiwan puñuywan aysachikuchkarqa, ichaqa allinta rikchariruspankum rikururqaku Jesuspa kancharisqanta hinaspa paywan sayaq iskay qarikunata. 33  Kay qarikuna Jesusmanta pasakuchkaptinkum, Jesusta Pedro nirqa: “Yachachikuq, ima sumaqmi kaypi kasqaykuqa, chayrayku kimsa carpata ruwarusaqku: Hukninta qampaq, hukninta Moisespaq, huknintañataq Eliaspaq”, nispa. Pedroqa manam musyakurqachu imam rimasqantaqa. 34  Chaykunata rimachkaptinmi puyu rikuriramuspan llantuyninwan paykunata tapaykurqa. Puyupa chawpinpi rikuriruspankum mancharikurqaku. 35  Hinaptinmi puyumantañataq kaynata nimurqa: “Paymi churiy, paymi akllasqay. Uyariychikyá”, nispa. 36  Chayna rimay uyarikuruptinmi Jesusqa sapallanña rikurirurqa. Paykunam ichaqa upallalla karqaku, hinaspam ima rikusqankutapas chay punchawkunapiqa pimanpas mana willakurqakuchu. 37  Paqarinnintintam urqumanta uraykamuptinku achka-achka runakuna Jesuswan tuparurqaku. 38  Hinaptinmi paykuna ukumanta huknin runa qaparispan nirqa: “Yachachikuq, ama hina kaspaykiyá sapallan churillayta qawaykapullaway, 39  paytam demonio hapiruspan qunqayllamanta qaparichin, siminmanta pusuquta aqtuchispanmi chutaykachachin hinaspam heridaparun, chaynatam sapa kuti ruwan. 40  Chaymi qatiqnikikunata ruegakurqani chay demoniota qarqunanpaq, ichaqa manam atirqakuchu”, nispa. 41  Jesusñataqmi nirqa: “Yaw, mana iñiyniyuq hinaspa mana allin ruwaq runakuna*, ¿haykapikamataq qamkunawan kasaq hinaspa aguantasqaykichik? Churikita kayman pusamuway”, nispa. 42  Maypacham warma asuykuchkaptinmi demonioqa pampaman chamqaruspan llumpaysuta chutaykachachirqa. Jesusñataqmi chay demoniota qaqcharqa, hinaspam warmata sanoyarachispan taytanman quykurqa. 43  Chaymi llapallanku Diospa hatu-hatun atiyninwan admirasqallaña karqaku. Tukuy chaykuna ruwasqanwan llapallanku admirasqallaña kachkaptinkum qatiqninkunata Jesus nirqa: 44  “Kay rimasqaykunata allinta uyarispaykichik ama qunqaychikchu. Runapa churinqariki runakunapa makinman entregasqa kananpaqmi kachkan”, nispa. 45  Qatiqninkunam ichaqa chayna nisqanta mana entienderqakuchu. Chayqa karqa paykunapaq pakasqa kasqanraykum, manchakurqakutaqmi chay nisqanmanta tapuytapas. 46  Chaymantam paykunaqa atipanakuyta qallaykurqaku mayqinninku aswan riqsisqa kasqankumanta. 47  Jesusñataqmi sunqunkupi tanteasqankuta yachaspan warmachata qayaykuspan waqtanpi sayaykachirqa, 48  hinaspam paykunata nirqa: “Pipas sutiypi kay warmachata chaskiqqa ñuqatapas chaskiwanmi, pipas ñuqata chaskiqniyqa kachamuwaqniytapas chaskinmi. Llapallaykichikmanta sullka hina kaqmi riqsisqa kaqqa”, nispa. 49  Chaymi Juan nirqa: “Yachachikuq, huk runatam rikumurqaniku qampa sutikipi demoniokuna qarquqta. Hinaptinmi harkakurqaniku ñuqanchikwan mana purisqanrayku”, nispa. 50  Jesusñataqmi nirqa: “Amayá harkakuychikchu, pipas contranchikpi mana kaspaqa ñuqanchikwanmi kachkan”, nispa. 51  Hanaq pachaman rinanpaq punchaw hichpallaña kaptinmi Jesusqa mana iskayrayaspan Jerusalenman rinanpaq tantearurqa. 52  Chaymi wakin qatiqninkunata puntata rinankupaq nirqa. Hinaptinmi paykunaqa rispanku Samaria lawpi llaqtachaman yaykururqaku Jesus chayamunanpaq llapa imata alistanankupaq. 53  Chaypi runakunam ichaqa Jesusta mana chaskirqakuchu Jerusalenman rinanpaqpuni tanteasqanrayku. 54  Qatiqnin Santiagowan Juanñataqmi chayta yacharuspanku nirqaku: “Señor, ¿munankichu hanaq pachamanta nina uraykamuspan kay runakunata hukllata chinkarachinanpaq ninaykuta?”, nispa. 55  Paymi ichaqa muyuriykuspan paykunata qaqcharqa. 56  Hinaptinmi huk llaqtachamanña rirqaku. 57  Ñanta richkaptinkuñataqmi huk runa Jesusta nirqa: “Maymanña riptikipas ñuqaqa qatisqaykim”, nispan. 58  Hinaptinmi Jesusñataq nirqa: “Kanmi atuqkunapa uchkun, kantaqmi alton pawaqkunapa tapan*, runapa churinpam ichaqa mana kanchu maypi puñuykunanpaqpas”, nispa. 59  Chaymantam huk runata nirqa: “Qatiqniyyá kay”, nispan. Runañataqmi nirqa: “Señor suyaykuway, taytaytaraq puntata pamparamusaq”, nispa. 60  Jesusñataqmi nirqa: “Wañusqakunayá wañuqninkunata pampachunku, qamyá ichaqa rispayki Diospa munaychakuyninmanta tukuy hinastinpi willakamuy”, nispa. 61  Huk runapas nirqam: “Señor qatisqaykim, ichaqa saqiykuwayraqyá wasiypi kaqkunamanta puntata despedikaykamunayta”, nispan. 62  Hinaptinmi Jesusñataq nirqa: “Pipas takllawan yapuchkaspan qipapi saqisqankunata qawariq runaqa manam Diospa munaychakuyninpaq hinachu”, nispa.

Willakuykuna

Utaq: “Gobiernonmanta”. Qawaytaq: Palabrakuna entiendenapaq listata.
Payqa karqa Herodes Antipasmi. Qawaytaq: Palabrakuna entiendenapaq listata.
Utaq: “Profetakunamanta”. Qawaytaq: Palabrakuna entiendenapaq listata.
Utaq: “Profetakunamanta”.
Qaway: Palabrakuna entiendenapaq listata.
Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Kaspinta”. Qawaytaq: Palabrakuna entiendenapaq listata.
Utaq: “Almanta”. Qawaytaq: Palabrakuna entiendenapaq listata.
Utaq: “Kay tiempopi runakuna”.
Utaq: “Qisan”.