Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Lucas 21:1-38

  • Wakcha viuda iskay uchuy qullqichankuna qusqanmanta (1-4)

  • IMAKUNA KANANMANTA SEÑALKUNA (5-36)

    • Guerrakuna, manchakuypaq terremotokuna, unquykuna hinaspa muchuykuna kananmanta (10, 11)

    • Jerusalenta tropakuna muyurirunanmanta (20)

    • Nacionkunapaq akllasqa tiempomanta (24)

    • Runapa churin hamunanmanta (27)

    • Higos sachawan rikchanachiymanta (29-33)

    • Qawan-qawanlla kanamanta (34-36)

  • Templopi Jesuspa yachachisqanmanta (37, 38)

21  Chaymantam Jesusqa qawarispan apukunata rikururqa qullqi churana cajakunapi ofrendanku churachkaqta.  Rikururqataqmi wakcha viudatapas, paymi mana ancha valorniyuq iskay qullqichakunata* chayman churaykurqa,  hinaptinmi Jesusqa nirqa: “Chiqaptapunim nikichik: Kay viudam wakcha kachkaspanpas llapallankumanta aswan achkataraq churaykun.  Apukunaqa llapallankum puchuqllantaña ofrendankutaqa churaykunku, kay viudam ichaqa wakcha kachkaspanpas kawsananpaq kaqta lliwta churaykun”, nispa.  Chaymantam suma-sumaq rumikunawan hinaspa Diosman qusqa kaqkunawan templo allichasqa kasqanmanta wakin runakuna rimachkaptinku,  Jesus nirqa: “Chayamunqam punchawkuna kay qawasqaykichik kaqkunamanta chulla rumillapas pirqasqa mana qipananpaq, lliwmi tuñichisqa kanqa”, nispa.  Hinaptinmi tapurqaku: “Yachachikuq, ¿haykapipunitaq chaykunaqa kanqa hinaspa ima señaltaq kanqa kaykuna kananmantaqa?”, nispa.  Hinaptinmi payñataq nirqa: “Cuidakuychikyá, yanqañataq pantachisunkichikman, achkam sutiypi hamuspanku ninqaku: ‘Paymi kani’, nispa. Ninqakutaqmi: ‘Tanteasqa tiempom hichparamunña’, nispa. Amam paykunataqa qatinkichikchu.  Chaymantapas guerrakuna hinaspa chaqwakuna kasqanmanta uyarispaykichikqa amayá mancharikuychikchu. Puntataqa chaykunaraqmi kanan, tukupaymi ichaqa mana chaypunillachu kanqa”, nispa. 10  Hinaspam paykunata nirqa: “Huk nacionmi peleanqa huk law nacionwan, chaynataq huk gobiernopas huk law gobiernowan, 11  kanqam manchakuypaq terremotokuna, kaypi-chaypi unquykuna hinaspa muchuykuna, kanqataqmi manchakuypaq kaqkuna hinaspa cielomanta hatun señalkunapas. 12  Kaykuna manaraq kachkaptinmi ichaqa qamkunata qatikachasunkichik hinaspam presocharususpaykichik entregaykusunkichik yupaychana wasikunaman* chaynataq carcelkunaman, chaymantapas sutiyraykum pusasunkichik kamachikuqkunaman hinaspa autoridadkunaman. 13  Chayqa kanqa iñisqaykichikmanta willakunaykichikpaqmi. 14  Chaynaqa amayá ñawpaqmantaraqqa tanteaychikchu imayna rimanaykichiktaqa, 15  ñuqam yachachisqaykichik imam rimanaykichikta, qusqaykichiktaqmi yachaytapas, chaynapim llapallan enemigoykichikkunapas contraykichikpi ima niytapas mana atinqakuchu. 16  Chaymantapas, qipanchasuqnikichikqa* kanqa taytallaykichikmi, wawqillaykichikmi, ayllullaykichikmi hinaspa amistadllaykichikmi, paykunam wakinnikichikta wañuchisunkichik. 17  Sutiyraykutaqmi qamkunataqa llapallan runakuna chiqnisunkichik. 18  Chayna kaptinpas, manam chulla chukchallaykichikpas umaykichikmantaqa chinkanqachu. 19  Aguantasqaykichikraykum vidaykichikta* salvankichik. 20  Chaymantapas Jerusalen llaqtata tropakuna muyurirusqanta rikuspaykichikqa, yachaychikyá purmachisqa kaynin hichparamusqanta. 21  Hinaspaqa Judeapi kaqkunayá urqukunaman ayqichunku, Jerusalen llaqtapa chawpinpi kaqkunapas lluqsichunkuyá, chakrakunapi kaqkunapas amayá llaqtamanqa yaykuchunkuchu, 22  kay punchawkunaqa justicia ruwanapaq punchawkunam, chaynapi tukuy ima qillqakusqan cumplikunanpaq. 23  ¡Ay imaynaraq kanqaku chay punchawkunapi wiksayuq warmikuna hinaspa ñuñuq wawayuq warmikunapas! Kay pachapimiki llumpa-llumpay ñakariy kanqa, kay llaqtapas castigasqam kanqa, 24  espadawanmi wañuchisqa kanqaku hinaspam lliw nacionkunaman preso apasqa kanqaku. Hinaptinmi Jerusalenta nacionkuna sarupanqa, nacionkunapaq akllasqa tiempo cumplikunankama. 25  Kanqataqmi señalkuna intipi, killapi hinaspa lucerokunapi, kay pachapiñataqmi nacionkuna llakillawanña kanqaku hinaspam mana ima ruwaytapas atinqakuchu lamar qucha qaparisqanrayku hinaspa olakuna huqarikusqanrayku. 26  Runakunañataqmi kay pachaman tukuy ima chayamunanmanta musyakuspanku mancharikunqaku desmayanankukama, cielokunapi kaqkunapas taspipasqam kanqa. 27  Hinaptinmi runapa churinta* rikunqaku atiywan hinaspa hatun kanchariywan puyupi hamuchkaqta. 28  Tukuy chaykuna pasayta qallaykuptinqa sayarispayá umaykichikta huqariychik librasqa kaynikichik hichparamusqanrayku”, nispa. 29  Chaymantam huk rikchanachiyta paykunaman nirqa: “Qawariychik higos sachatawan wakin sachakunatapas. 30  Chikllimuqta qawaspaykichikqa yachankichikmi tarpuy tiempo hichparamusqanta. 31  Chaynallataqyá qamkunapas kaykuna kasqanta qawaspaykichikqa yachaychik Diospa munaychakuynin* kayllapiña kasqanta. 32  Chiqaptapunim nikichik: Kay tiempopi runakunaqa manapunim chinkanqachu tukuy kaykuna kanankama. 33  Cielowan kay pachapas chinkanqam, rimasqaykunam ichaqa manapuni chinkanqachu. 34  Aswanqa allintayá qawakuychik, chaynapi mana haykapipas mikukuyllapi, tomakuyllapi hinaspa tukuy imamanta afanakuyllapi kanaykichikpaq, yanqañataq chay punchawqa qunqayllata hawaykichikpiña kanman 35  tuqlla hina. Chay punchawqa enteron pachapi llapallan yachaqkunamanmi* chayamunqa. 36  Tukuy tiempo Diosta ruegakuspayá qawan-qawanlla kaychik, chaynapi tukuy kaykuna hamuqmanta lluptinaykichikpaq hinaspa runapa churinpa qayllanpi kanaykichikpaq”, nispa. 37  Punchawmi Jesusqa templopi yachachiq, tutanñataqmi chaymanta pasaspan Olivos muqu sutiyuq urqupi samapakuq. 38  Llapa runakunañataqmi temploman temprano riqku payta uyarinankupaq.

Willakuykuna

Kaypiqa nichkan: “Iskay lepton qullqichakunata”, nispam. Qawaytaq: Palabrakuna entiendenapaq listata.
Kaypiqa nichkan: “Sinagoga”, nispam. Qawaytaq: Palabrakuna entiendenapaq listata.
Utaq: “Traicionasuqnikichikqa”.
Utaq: “Almaykichikta”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Gobiernon”. Qawaytaq: Palabrakuna entiendenapaq listata.
Utaq: “Tiyaqkunamanmi”.