Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Lucas 18:1-43

  • Juezman sapa kuti riq viudawan rikchanachiymanta (1-8)

  • Fariseomanta hinaspa impuesto mañaqmanta (9-14)

  • Jesusmanta hinaspa warmachakunamanta (15-17)

  • Kamachikuq apu runapa tapusqanmanta (18-30)

  • Wañukunanmanta Jesuspa yapamanta willakusqan (31-34)

  • Limosna mañakuq ñawsa sanoyasqanmanta (35-43)

18  Chaymanta rikchanachispanmi willarqa mana pisipaspa Diosta tukuy tiempo mañakuy allinpuni kasqanmanta,  nirqam: “Huk llaqtapim karqa Diosta mana manchakuq hinaspa runakunatapas mana respetaq juez.  Chay llaqtapiqa karqataqmi huk viudapas, chay viudam juezman ripayaspan nirqa: ‘Quejanakuqniywanyá justiciata ruwaykullaway’, nispan.  Juezqa unayña justicia ruwayta mana munachkaspanpas sunqullanpim nirqa: ‘Diosta mana manchakuq hinaspa runakunatapas mana respetaq kachkaspaypas,  kay viuda hamuspan sapa kuti rabiachiwasqanraykuyá justiciata ruwaykusaq, chaynapi amaña sapa kuti hamupayaspan umayta amaña nanachinanpaq’”, nispa.  Chaymantam señor Jesusqa nirqa: “Chay mana allin ruwaq juezpa nisqantayá umaykichikman churaychik.  Sichum chay juez justiciata ruwachkaptinqa, ¿manachu Diosqa tuta-punchaw mañakuq akllasqankunapaq justiciata ruwanqapuni paykunawan pacienciakuchkaspanqa?  Nikichikmi: Diosqa chayllam paykunapaq justiciata ruwanqa. Hinaptinqa, ¿yaqachu runapa churin* chayamuspan iñiyniyuq runakunata kay pachapi tarinman?”, nispa.  Chaymantapas wakin runakunam kikillanku allin runa kasqankuta piensaspanku hukkunata mana imapaq valeqta hina qawaqku, chaymi paykunamanpas huk rikchanachiyta willarqa: 10  “Iskay runakunam temploman rirqaku Diosta mañakuq, hukninmi karqa fariseo* hukninñataqmi impuestokuna mañaq. 11  Fariseom sayaykuspan simin ukullapi kaynata mañakurqa: ‘Dioslláy, wakin runakuna hina mana kasqaymantam agradecekuyki, ñuqaqa manam suwakunichu, manam mana allintaqa ruwanichu, manam hukwanqa pierdekunichu*, manataqmi kay impuesto mañaq runa hinachu kani, 12  semanapim iskay kutita ayunani, tukuy huñusqaykunamantapas sapa chunkamantam hukninta quni’, nispa. 13  Impuesto mañaq runañataqmi karuniqpi sayaykuspan hanaq pachata qawariytapas mana munarqachu, hinaspam qasqunta takakuspanraq nirqa: ‘Dioslláy, kay huchasapa runallaykitayá llakipayaykullaway’, nispa. 14  Nikichikmi: Diospa qawasqanman hinaqa kay runam wasinman kutikurqa fariseomantaqa aswan allin qawasqa. Pipas hatunchakuqqariki humillasqam kanqa, pipas humillakuqñataqmi hatunchasqa kanqa”, nispa. 15  Chaymantam runakunaqa warmachankutapas* aparqaku Jesus llachpaykunanpaq, qatiqninkunañataqmi chayta qawaspanku qaqchayta qallaykurqaku. 16  Jesusmi ichaqa paypa kasqanman warmachakunata qayaykuspan nirqa: “Warmachakunaqa hinayá ñuqaman hamuchunku, amayá harkaychikchu. Paykuna hina kaqkunapaqmi Diospa munaychakuyninqa*. 17  Chiqaptapunim nikichik: Diospa munaychakuyninta warmacha hina pipas mana chaskiqqa manapunim chaymanqa yaykunqachu”, nispa. 18  Chaymantam kamachikuq huk runañataq Jesusta tapuspan nirqa: “Allin yachachikuq, ¿imatataq ruwanay wiñay kawsayta chaskinaypaq?”, nispa. 19  Hinaptinmi Jesus nirqa: “¿Imanasqataq allin niwanki? Manam pipas allinqa kanchu aswanqa hukllam, payqariki Diosmi. 20  Qamqa yachankim Diospa kamachikuyninkunata, chaypim nichkan: ‘Ama hukwan pierdekuychu*, ama wañuchiychu, ama suwakuychu, ama llullata willakuychu hinaspa tayta-mamaykita respetay’”, nispa. 21  Hinaptinmi chay runa nirqa: “Tukuy chaykunataqa mozo kasqaymantapacham kasukurqani”, nispa. 22  Chayta uyariruspanmi Jesusñataq nirqa: “Chaywanpas, kaytaraqmi ruwanayki kachkan: Tukuy imaykikunata rantikuruspayki* chay qullqita wakchakunaman aypuykariy, chaymi hanaq pachapi kapuqnikikuna kanqa, hinaspayá hamuspa qatiqniyña kay”, nispa. 23  Chayta uyariruspanmi chay runaqa llumpa-llumpayta llakikururqa apullaña kasqanrayku. 24  Hinaptinmi Jesusñataq chay runata qawarispan nirqa: “¡Mayna sasachá kanqa qullqisapa runakunapa Diospa munaychakuyninman yaykuyninkuqa! 25  Diospa munaychakuyninman apu runapa yaykunanmantaqa camelloraqchá sirana agujapa rinrinta yaykurunman”, nispa. 26  Chayta uyariqkunam nirqaku: “Hinaptinqa, ¿pitaqsi salvakuyta atinman?”, nispanku. 27  Hinaptinmi Jesus nirqa: “Runakunapaq mana atinan kaqkunaqa Diospaqqa atinallanmi”, nispa. 28  Pedroñataqmi nirqa: “Kayqaya ñuqaykuqa imaykutapas saqiruspa qatichkaykiku”, nispa. 29  Chaymi Jesus nirqa: “Chiqaptapunim qamkunata nikichik: Wasinta, warminta, wawqi-paninkunata, tayta-mamanta hinaspa churinkunata Diospa munaychakuyninrayku pipas saqiqqa, 30  kay tiempopim aswan achkataraq chaskinqa, hinaspa hamuq tiempopiñataq* wiñay kawsayta”, nispa. 31  Chaymantam chunka iskayniyuq apostolkunata huk lawman pusaspan nirqa: “Jerusalenmanmi qispichkanchik, chaypim cumplikunqa runapa churinmanta Diosmanta willakuqkunapa* tukuy ima qillqasqanku. 32  Huk law nacionniyuqkunapa makinmanmi entregaykunqaku, hinaptinmi asipayanqaku, desprecianqaku chaynataq tuqaykunqaku. 33  Azoteruspankuñataqmi wañurachinqaku, kimsa punchawmantam ichaqa kawsarimunqa”, nispa. 34  Chayna kaptinpas rimasqankuna paykunamanta pakasqa kasqanraykum ima ninan kasqanmantaqa mana imaniraqllatapas entienderqakuchu. 35  Jerico llaqtamanña Jesus asuykuchkaptinñataqmi ñawsa runa ñanpa patanpi limosnata mañakuspan tiyachkarqa. 36  Chaymi llapa runakunapa chaynin risqanta uyariruspan tapukurqa ima kasqanmanta. 37  Hinaptinmi nirqaku: “¡Nazaret llaqtayuq Jesusmi kayninta richkan!”, nispanku. 38  Chaymi payqa qayakuspan nirqa: “¡Davidpa churin Jesus, llakipayariykullawayá!”, nispa. 39  Chaymi punta riqkunañataq upallananpaq qaqchayta qallaykurqaku. Paymi ichaqa astawanraq qayakurqa: “¡Davidpa churin, llakipayariykullawayá!”, nispa. 40  Hinaptinmi Jesusqa sayaykuspan kamachirqa chay runata payman pusamunankupaq. Hinaptinmi chay runa asuykuptin Jesusqa tapurqa: 41  “¿Imatataq qampaq ruwanayta munanki?”, nispan. Chay runañataqmi nirqa: “Señor, ñawillaytayá qawariykachiy”, nispa. 42  Chaymi Jesus nirqa: “Ñawikiyá qawarikuchun, iñiyniyuq kasqaykiraykum sanoyarunki”, nispa. 43  Hinaptinmi chay runapa ñawinqa chaylla qawarikururqa, chaymi Diosta hatunchastin Jesusta qatikuyta qallaykurqa. Chayta rikuspankum llapallan runakunapas Diosta hatuncharqaku.

Willakuykuna

Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Waqllikunichu”.
Kaypiqa nichkan: “Wawachankutapas”, nispam.
Utaq: “Gobiernonqa”. Qawaytaq: Palabrakuna entiendenapaq listata.
Utaq: “Waqllikuychu”.
Utaq: “Vendespayki”.
Qaway: Palabrakuna entiendenapaq listata.
Utaq: “Profetakunapa”. Qawaytaq: Palabrakuna entiendenapaq listata.