Lucas 14:1-35

  • Punkipakuq runapa sabado punchawpi sanoyachisqa kasqanmanta (1-6)

  • Invitawaptinchik humilde kananmanta (7-11)

  • Wakchakunata invitaykunamanta (12-14)

  • Invitasqakunapa ruegakusqankuwan rikchanachiymanta (15-24)

  • Jesuspa qatiqnin kay sasa kasqanmanta (25-33)

  • Kachipa puchqu kaynin chinkasqanmanta (34, 35)

14  Huk kutipim Jesusqa huknin kamachikuq fariseopa* wasinmam sabado punchawpi mikuq yaykurqa, chay wasipi kaqkunañataqmi Jesusta qawarayachkarqaku.  Paypa ñawpaqninpim kachkarqa chakinpas makinpas punkisqa* runa.  Hinaptinmi Jesusqa Moisespa leyninmanta yachaqkunata hinaspa fariseokunata tapurqa: “Leypa nisqanman hinaqa, ¿allinchu kanman sabado punchawpi sanoyachiy icha manachu?”, nispan.  Paykunañataqmi mana imatapas rimarirqakuchu, hinaptinmi Jesusqa chay runapa hawanman makinta churaykuspan sanoyarachirqa, hinaspam pasakunanpaq nirqa.  Chaymantañataqmi paykunata nirqa: “Qamkunamanta, ¿mayqinnikichiktaq churikichik utaq toroykichik uchkuman wichiykuptin sabado punchawpi chaylla mana hurqunkichikchu?”, nispa.  Hinaptinmi mana imatapas niyta atirqakuchu.  Jesusqa qawarqataqmi invitasqa runakuna riqsisqa runakunapa tiyanankupaq kaqta akllakusqankuta, chaymi rikchanachiywan paykunata nirqa:  “Casarakuy convidoman rinaykipaq pipas invitasuptikiqa, amayá riqsisqa runakunapa tiyananpiqa tiyaruychu. Ichapas invitasuqnikiqa qanmanta aswan riqsisqa runataraq convidomanqa invitarqa,  hinaptinmi convidoman invitasuqniki hamuruspan nisunkiman: ‘Paymi kaypiqa tiyanqa’, nispa. Hinaptinmi qamñataq pinqakuywan qipallapiña tiyaq riwaq. 10  Invitasqa kaspaykiqa qipallapiyá tiyakuy, chaynapi invitasuqniki hamuruspan, ‘taytáy ñawpaqpi qamqa tiyakamuy’ nisunaykipaq. Hinaptinqa llapallan invitasqa kaqkunapa qayllanpim allin kanki. 11  Pipas hatunchakuqqa humillasqam kanqa, pipas humillakuqñataqmi hatunchasqa kanqa”, nispa. 12  Chaymantam mikuyman qayaqnin runatapas Jesusqa nirqa: “Mikunanpaq utaq cenananpaq pitapas qayaspaykiqa amayá amistadnikikunatawan wawqillaykikunatachu qayayqa, nitaq aylluykikunatawan apu vecinollaykikunatachu. Ichapas paykunaqa haykapipas kutichisunkiman hinaspa wasinman mikunaykipaq qayaykusunkiman. 13  Mikuyman qayaspaykiqa qayayá: Wakchakunata, wistukunata*, qiwi makiyuqkunata hinaspa ñawsakunata, 14  hinaspaqa kusisqam kanki, paykunapaqariki manam imanpas kanchu kutichipusunaykipaq. Pagoykitaqa chaskinki allin runakuna kawsarimuptinmi”, nispa. 15  Chay wasipi mikunankupaq qayasqakunamanta hukninmi, chayta uyariruspan Jesusta nirqa: “Kusisqamá pipas Diospa munaychakuyninpi* tantata mikuqqa”, nispa. 16  Hinaptinmi Jesus nirqa: “Huk runam tukuy imata yanuchispan achka runakunata nirqa wasinman mikuq rinankupaq. 17  Mikuy hora chayaramuptinmi, chay runaqa sirviententa kamachirqa, ‘hamuychik tukuy imam listoña kachkan’ nispa invitasqakunata nimunanpaq. 18  Hinaptinmi mana rinankupaq llapallanku nirqaku pampachaykunanpaq. Punta kaqmi nirqa: ‘Pampachaykullaway, chakratam rantiruni chaymi qawaq rinay kachkan’, nispa. 19  Hukninpas nirqam: ‘Pampachaykullaway, pichqa yunda* torotam rantiruni chaymi qawamunay kachkan’, nispa. 20  Hukninñataqmi nirqa: ‘Chayllaraqmi casarakuruni chaymi riyta mana atiymanchu’, nispa. 21  Chaymi sirvienteqa patronman asuykuspan tukuy chaykunata willarqa. Hinaptinmi patronqa piñakurqa hinaspam sirviententa nirqa: ‘Hatun callekunaman hinaspa kichki callekunaman chaylla rispayki pusamuy: Wakchakunata, suchukunata, qiwi makiyuqkunata, ñawsakunata hinaspa wistukunata*’, nispa. 22  Sirviente kutiramuspanmi nirqa: ‘Patronlláy, kamachiwasqaykiman hinam ruwaramuni, chaywanpas wasikiqa manaraqmi huntanraqchu’, nispa. 23  Patronñataqmi sirviententa nirqa: ‘Chaynaqa ñankunaman hinaspa chakrakunaman rispaykiyá imaynapas runakunata pusamuypuni wasiy hunta kananpaq. 24  Qamkunatam nikichik: Manam ñawpaq qayasqay runakunamantaqa mayqinpas mikuyniytaqa mallinqachu’”, nispa. 25  Chaymantam achkallaña runakuna Jesuswan kuska richkarqaku, hinaptinmi paykunaman muyuriykuspan nirqa: 26  “Ñuqaman hamuqmanta pipas: Taytanta, mamanta, señoranta, churinkunata, wawqi-paninkunata hinaspa kikinpa vidantapas* mana chiqnispanqa manam qatiqniyqa kanmanchu. 27  Pipas qatiwaqniy ñakarichiqnin qirunta* mana qipispanqa manam qatiqniyqa kanmanchu. 28  Qamkunamanta mayqinnikichikpas wasi* hatarichiyta munaspanqa, tiyaykuspanmi puntataraq hayka gastananmanta tantean: ‘¿Qispirachinaykamachu llapa imay hayparuwanqa?’, nispan. 29  Mana chayqa cimientota churaruspanmi mana qispichinmanchu, hinaptinmi llapallan qawaqninkuna payta asipayanmanku, 30  hinaspam ninmanku: ‘Kay runaqa hatarichiyta qallaykuspanmi mana tukunchu’, nispanku. 31  Utaq, ¿mayqin kamachiqtaq guerraman rispanqa tiyaykuspan puntata hukkunata mana tapukunchu, chunka waranqa soldadonkunawan iskay chunka waranqa soldadoyuq kamachiq enemigonta vencey utaq mana vencey atinanmanta? 32  Mana atinanmanta musyakuspanmi enemigon karullapiraq kachkaptin comisionta kachan hawkallaña kanankupaq. 33  Chaynaqa, chiqaptapunim nikichik: Manam mayqinnikichikpas qatiqniyqa kawaqchikchu tukuy imaykichikta mana saqispaqa. 34  Kachiqa allinpunim, ichaqa kachi qamyayaruptinqa*, ¿imawantaq kutichiwaqchik puchqu kaynintaqa? 35  Manañam servinchu allpapaqpas nitaq wanupaqpas, aswanqa wischunallapaqñam. Pipas rinriyuqqa uyarichunyá”, nispa.

Willakuykuna

Qaway: Palabrakuna entiendenapaq listata.
Kaypiqa nichkan: “Hidropesia unquy”, nispam. Chayqa cuerpopi yaku takyaruptin punkisqanmi.
Utaq: “Wiqrukunata”.
Utaq: “Gobiernonpi”. Qawaytaq: Palabrakuna entiendenapaq listata.
Utaq: “Pares”.
Utaq: “Wiqrukunata”.
Utaq: “Almantapas”. Qawaytaq: Palabrakuna entiendenapaq listata.
Utaq: “Kaspinta”. Qawaytaq: Palabrakuna entiendenapaq listata.
Kaypiqa nichkan: “Torre”, nispam.
Utaq: “Qaymayaruptinqa”.