Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Lucas 13:1-35

  • Wanakuymanta utaq chinkachisqa kaymanta (1-5)

  • Mana ruruq higos sachawan rikchanachiymanta (6-9)

  • Unquq warmi sabado punchawpi sanoyasqanmanta (10-17)

  • Mostaza muhuwan hinaspa levadurawan rikchanachiymanta (18-21)

  • Kichki punkunta yaykunapaq kallpanchakunamanta (22-30)

  • Herodes “atuqwan” sutichasqa kasqanmanta (31-33)

  • Jerusalen llaqtamanta Jesuspa llakikusqan (34, 35)

13  Chay punchawkunapim wakin runakuna chaypi kachkarqaku. Paykunam Jesusman willakurqaku Galilea law runakuna ofrendankuta quchkaptinku chay runakunata Pilato wañurachisqanmanta.  Hinaptinmi paykunata Jesus nirqa: “¿Qamkunaqa piensankichikchu chayna wañuchisqa galileokuna llapallan galileokunamantapas aswan huchasaparaq kasqankuta?  Manam chaynachu. Chiqaptapunim nikichik: Qamkunapas mana wanakuspaykichikqa, llapallaykichikmi paykuna hina chinkachisqa kankichik.  Utaq, ¿piensankichikchu Siloam lawpi torre wichiykuspa ñitiruptin chunka pusaqniyuq wañuq runakuna Jerusalenpi llapallan runakunamantapas aswan huchasaparaq* kasqankuta?  Manam chaynachu. Chiqaptapunim nikichik: Qamkunapas llapallaykichikmi mana wanakuspaykichikqa paykuna hina chinkachisqa kankichik”, nispa.  Chaymantam huk rikchanachiyta paykunaman willaspan nirqa: “Huk runapam uvas chakranpi higos sacha tarpusqan karqa. Paymi rurunta maskaq rispan mana tarirqachu.  Chaymi uvas chakranpi llamkaqta nirqa: ‘Kimsa watañam kay higospa rurunta maskaq hamuni, ichaqa manam tarinichu. ¡Kuchuruyñayá! ¿Imanasqamá yanqaqa kanqa?’, nispa.  Hinaptinmi chakrapi llamkaq nirqa: ‘Patronlláy, huk watatawanraqyá saqiykuy muyuriqninta aspiruspay wanuta hinanaykama,  chaywan ruruptinqa allinmi kanqa, mana chayqa kuchurunkichiki’”, nispa. 10  Chaymantam Jesusqa huk kaqnin yupaychana wasipi* sabado punchawpi yachachichkarqa. 11  Hinaptinmi chaypi kachkarqa chunka pusaqniyuq wataña demoniopa unquchisqan warmi, paymi manaña imaynapas derechakuyta atispan kurkunpalla karqa. 12  Jesusñataqmi chay warmita qawaykuspan nirqa: “Mamalláy, chay unquynikimantam librasqaña kanki”, nispan. 13  Hinaspanmi makinkunata payman churaykuptin warmiqa chaylla derechakuruspan Diosta hatunchayta qallaykurqa. 14  Yupaychana wasipi kamachikuq runam ichaqa Jesuspa sabado punchawpi sanoyachisqanmanta piñakuspan runakunata nirqa: “Suqta punchawmi llamkanapaq punchawkunaqa, chay punchawkunapiyá hamuychik hinaspa sanoyachisqa kaychik, amayá sabado punchawpichu”, nispan. 15  Jesusñataqmi kutichispan nirqa: “¡Yaw iskay uyakuna! ¿Manachum qamkunaqa sabado punchawpi toroykichikta utaq asnoykichikta kacharispa yaku tomachiq pusankichik? 16  Hinaptinqa, ¿manachu kay warmiqa Abrahanpa churin kachkaspan chunka pusaqniyuq wataña satanaspa presochasqan kasqanmanta sabado punchawpi kacharisqa kanman karqa?”, nispa. 17  Chaynata Jesus niptinmi lliw enemigonkuna pinqakuyta qallaykurqaku, llapa runakunam ichaqa Jesuspa admirakuypaq tukuy ima ruwasqanwan kusikurqaku. 18  Jesusqa nirqataqmi: “¿Imaman rikchakuqtaq kanman Diospa munaychakuyninqa* hinaspa imamantaq tupachiyman? 19  Diospa munaychakuyninqa rikchakunmi huertanpi runapa tarpusqan mostaza muhuman*. Chay muhu wiñaruspanmi sacha hina rikurirun hinaptinmi alton pawaqkunapas kallmankunapi tapachakunku*”, nispa. 20  Chaymantapas nirqataqmi: “¿Imawantaq rikchanachisaq Diospa munaychakuyninta? 21  Diospa munaychakuyninqa rikchakun lliw masa puqunankama huk warmipa kimsa tupuy* harinapi chapurusqan levaduramanmi”, nispa. 22  Chaymantapas Jesusqa Jerusalenman rispanmi llaqtan-llaqtan hinaspa llaqtachakunapipas yachachistin purirqa. 23  Hinaptinmi huk runa Jesusta nirqa: “Señor, ¿asllachu salvakunqaku?”, nispa. Payñataqmi nirqa: 24  “Anchatayá kallpanchakuychik kichki punkunta yaykunaykichikpaq. Nikichikmi: Achkallañam yaykuyta munanqaku, ichaqa manam atinqakuchu. 25  Maypacham wasiyuq hatariruspan punkunta llavewan wichqaruptinqa qamkunam hawapi sayachkaq qiparunkichik, hinaspam punku takayta qallaykunkichik: ‘Señor kichaykullawayku’, nispa. Hinaptinmi wasiyuq nisunkichik: ‘Maymantachá qamkunaqa kankichikpas’, nispa. 26  Hinaptinmi qamkunaqa ninkichik: ‘Ñawpaqnikipim mikurqaniku hinaspa tomarqaniku, hatun ñanniykupitaqmi yachachirqankipas’, nispa. 27  Chaymi wasiyuq nisunkichik: ‘¡Maymantachá qamkunaqa kankichikpas, qayllaymanta llapallaykichik pasawaychik mana allin ruwaqkuna!’, nispa. 28  Qamkunam waqankichik hinaspa kiruykichiktapas kirichichichinkichik Diospa munaychakuyninpi Abrahanta, Isaacta, Jacobta hinaspa Diosmanta llapallan willakuqkunata* qawaspaykichik, qamkunam ichaqa hawapi kankichik. 29  Chaymantapas runakunam hamunqaku intipa qispimunan hinaspa intipa siqaykunan lawmanta chaynataq norte hinaspa sur lawmanta, hinaspam Diospa munaychakuyninpi mesapi tiyaykunqaku. 30  Qipapi kaqkunam puntapi kanqaku, puntapi kaqkunañataqmi qipapi kanqaku”, nispa. 31  Chayna kachkaptinmi wakin fariseokuna Jesusman asuykuspa nirqaku: “Kaymanta lluqsispa pasakuy, Herodesmi* wañuchiyta munasuchkanki”, nispa. 32  Hinaptinmi payñataq nirqa: “Rispaykichikyá chay atuqta nimuychik: ‘Payqa demoniokunatam qarquchkan hinaspam kunanpas paqarinpas unquqkunata sanoyachinqa, minchañam tukunqa’, nispaykichik. 33  Chayna kaptinpas ñuqaqa, kunanpas paqarinpas hinaspa minchapas maymi rinaytam hinalla rinay, manam Diosmanta willakuqqa* wañuchisqachu kanan Jerusalenmanta hawapiqa. 34  ¡Jerusalen! ¡Jerusalen! Qamqa Diosmanta willakuqkunatam* wañuchinki. Qanman kachamusqa runakunatam rumikunawan chuqapanki. ¡Rapran ukupi llapallan chiwchichankunata huñuchkaq wallpa hinam runaykikunata achka kutipi huñuyta munarqani, ichaqa manam munarqankichu! 35  Chayraykum wasikichikta Diosqa saqinqa. Nikichikmi: Manapunim rikuwankichikchu ‘bendecisqayá kachun Jehova* Diospa sutinpi hamuqqa’ ninaykichikkama”, nispa.

Willakuykuna

Kaypiqa nichkan: “Debekuqraq”, nispam.
Kaypiqa nichkan: “Sinagoga”, nispam. Qawaytaq: Palabrakuna entiendenapaq listata.
Utaq: “Gobiernonqa”. Qawaytaq: Palabrakuna entiendenapaq listata.
Kayqa Israel lawpi uchuychalla muhucham, tawa metro mastam wiñan.
Utaq: “Qisachakunku”.
Utaq: “Kimsa hatun tupuy”. Chayqa karqa yaqa chunka kilom.
Utaq: “Profetakunata”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Profetaqa”.
Utaq: “Profetakunatam”.
Qaway: Palabrakuna entiendenapaq listata.