Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Lucas 10:1-42

  • Qanchis chunka qatiqninkunata Jesuspa kachasqanmanta (1-12)

  • Mana kasukuq llaqtakuna llakipi kananmanta (13-16)

  • 70 qatiqninkuna kutimusqanmanta (17-20)

  • Jesusmi taytanta hatunchan humilde runakunata akllasqanmanta (21-24)

  • Samaria llaqtayuq allin runawan rikchanachisqanmanta (25-37)

  • Martata hinaspa Mariata Jesuspa watukusqanmanta (38-42)

10  Chaykunamanta qipatam Jesusqa qanchis chunka runakunatawan akllarqa, hinaspam iska-iskaytakama kamachispan ñawpachirqa paypa rinan llapallan llaqtakunaman chaynataq llaqtachakunamanpas.  Hinaspam paykunata nirqa: “Cosechanapaqqa achkallañam kachkan, cosechaqkunam ichaqa aslla. Chayraykuyá cosechapa dueñonta mañakuychik cosechanapaq llamkaqkunata kachamunanpaq.  Atuqkunapa* chawpinman ovejakunata kachachkaq hinam kachachkaykichik. Chaynaqa, ¡riychikyá!  Amayá apaychikchu alforjatapas, usutatapas, nitaq qullqi waqaychana piskachatapas, amataqyá rimakuykuspapas ñanpiqa qipaychikchu.  Maypipas wasiman yaykuspaykichikqa puntataraqyá niychik: ‘Kay wasipiyá hawkayay kachun’, nispa.  Chay wasipi hawka kay munaq runa kaptinqa hawkayaynikichikmi paypi kanqa. Mana chayqa hawkayaynikichikmi qamkunawan kanqa.  Yaykusqaykichik wasillapitaq qipakuychik imam qususqaykichikta mikuspa hinaspa tomaspa. Llamkaqqariki llamkasqanmantam chaskinan. Amayá huk wasimanta huk wasimanqa samapakuq riychikchu.  Chaymantapas, maypipas yaykusqaykichik llaqtapi chaskisuptikichikqa imam qususqaykichiktayá mikuychik,  hinaspa chay llaqtapi unquqkunata sanoyachiychik, chaymantapas niychikyá: ‘Diospa munaychakuyninmi* qamkunapa hichpaykichikpiña kachkan’, nispa. 10  Maypipas yaykusqaykichik llaqtapi mana chaskisuptikichikqa, hatun callenkunaman lluqsispayá niychik: 11  ‘Llaqtaykichikpa allpan chakiykuman huntaramusqantapas qamkunapa contraykichikpim taspikuniku. Chaywanpas yachaychikyá Diospa munaychakuynin hichparamusqanta’, nispa. 12  Nikichikmi: Chay punchawpiqa Sodoma llaqtaraqmi aswan llakipayasqa kanqa chay llaqtamantaqa. 13  ¡Ay imaynaraq kankichik Corazin hinaspa Betsaida sutiyuq llaqtakuna! Sichu Tiro hinaspa Sidon llaqtakunapi kay admirakuypaq milagrokuna ruwakunman karqa, hinaptinqa llaki pachawan churakuspankuchá uchpapi tiyaspanku unayña wanakunmanku karqa. 14  Chayraykum juicio punchawpiqa Tiro hinaspa Sidon llaqtakunaraq qamkunamantaqa aswan llakipayasqa kanqa. 15  ¡Yaw Capernaum llaqta! ¿Hanaq pachamanchu huqarisqa kanki? Manamá. ¡Sepulturamanmi* uraykunki! 16  Qamkunata uyariq runaqa ñuqatapas uyariwanmi. Qamkunata mana chaskisuqnikichikñataqmi ñuqatapas mana chaskiwanchu. Chaymantapas, ñuqata mana chaskiwaqqa kachamuwaqniytapas manam chaskinchu”, nispa. 17  Chaymantam qanchis chunka qatiqninkuna kusisqallaña kutiramuspanku nirqaku: “Señor, sutikita servichikuptiykum demoniokunapas kasuwanku”, nispanku. 18  Chaymi Jesus paykunata nirqa: “Satanastam rikuchkani hanaq pachamanta rayo hina wichimuqta. 19  Ñuqamiki atiyta qurqaykichik culebrakunatawan atuq-atuq* urukunata sarupanaykichikpaq, enemigopa tukuy atiynintapas vencenaykichikpaq, qamkunataqa manapunim imapas imanasunkichikchu. 20  Amayá demoniokuna kasususqaykichikmantachu kusikuychikqa. Kusikuychikqa hanaq pachapi sutikichik qillqasqa kasqanmantayá”, nispa. 21  Hinaptinmi chaylla chuya espiritupa* yanapakuyninwan Jesusqa anchallataña kusikurqa, hinaspam nirqa: “Hanaq pachapipas kay pachapipas munaychakuq taytáy, hukkunapa qayllanpim hatunchayki, qamqa kaykunatam sumaqta pakaykunki yachayniyuqkunamantawan yuyaysapakunamanta, hinaspam qawaykachinki warmachakuna hina humilde runakunaman. Arí taytalláy, chayna kananpaqmi qamqa tantearqanki”, nispa. 22  Jesusqa nirqataqmi: “Tukuy imakunatam taytayqa quykuwan. Ñuqa churitaqa manam pipas riqsiwanchu aswanqa taytallaymi, chaynataqmi pim taytay kasqantaqa mana pipas allintaqa riqsinchu, aswanqa ñuqa churillanmi hinaspa churipa riqsichiyta munasqan runallam”, nispa. 23  Chaymantam qatiqninkunaman muyuriykuspan paykunallata nirqa: “Mayna kusisqam qawasqaykichikkunata qawaq runakunaqa. 24  Nikichikmi: Diosmanta achka willakuqkunawan* kamachiqkunam qawasqaykichikta rikuyta munarqaku ichaqa manam rikurqakuchu, uyarisqaykichiktapas uyariytam munarqaku, ichaqa manam uyarirqakuchu”, nispa. 25  Chaymantañataqmi Moisespa leyninmanta allin yachaq runa pantachinanpaq sayariykuspan nirqa: “Yachachikuq, ¿imatataq ruwanay wiñay kawsayta chaskinaypaq?”, nispan. 26  Hinaptinmi Jesusñataq nirqa: “¿Imataq qillqasqa kachkan Moisespa leyninpi? ¿Ima ninmi leesqaykipi?”, nispa. 27  Chay runañataqmi nirqa: “‘Jehova* Diosnikitam kuyanayki tukuy sunquykiwan, tukuy vidaykiwan*, tukuy kallpaykiwan hinaspa tukuy yuyaynikiwan’. ‘Runamasikitapas kuyanaykim kikikita hina’”, nispa. 28  Jesusñataqmi nirqa: “Allintam nirunki. Chaynaqa, ‘hinallayá chayta ruway hinaspam wiñay kawsayta tarinki’”, nispa. 29  Ichaqa allin ruwaq kasqanta qawachiyta munaspanmi chay allin yachaq runaqa Jesusta nirqa: “Chiqaptapuniqa, ¿pitaq runamasiyqa?”, nispan. 30  Chaymi Jesus nirqa: “Huk runam Jerusalenmanta Jerico llaqtaman uraykuchkaspan suwakunawan tuparurqa, hinaptinmi chay suwakunaqa pachanta llatanaruspanku llapa imanta qichururqaku, hinaspam maqaparuspanku wañunayachkaqtaña saqiruspa pasakurqaku. 31  Chay ñannintam huk sacerdote uraykuchkarqa, hinaspanmi rikuruspan huk lawninta pasakurqa. 32  Chaynallataqmi Leviy casta runapas uraykamurqa, hinaspanmi rikuruspan huk lawninta pasakurqa. 33  Chayninta illaq Samaria llaqtayuq runam ichaqa chay runapa kasqanman chayarurqa, hinaspanmi qawaykuspan llakipayarikurqa. 34  Chaymi asuykuspan aceitewan hinaspa vinowan heridankunata hampiykurqa, chaymantam latapawan wankuykurqa. Hinaspam uywanman sillaykachispan samapakuna wasiman apaspan cuidarqa. 35  Chaymantam paqarinnintinta iskay denario* nisqa qullqita hurquykuspan wasiyuqman quykurqa hinaspam nirqa: ‘Atiendeykuy, kay qusqaymanta mastapas gastaptikiqa kutimuspaymi pagapusqayki’, nispa. 36  Hinaptinqa kay kimsan runakunamanta, ¿mayqintaq qampaq kanman suwakunapa makinman wichiykuqpa runamasinqa?”, nispa. 37  Hinaptinmi chay runa nirqa: “Llakipayaqnin kaqmi”, nispan. Chaymi Jesus nirqa: “Chaynaqa qampas chaynatayá ruwamuy”, nispa. 38  Chaymantam hinalla richkaptinku Jesusqa huk llaqtachaman yaykururqa. Chaypim Marta sutiyuq warmi wasinpi samaykachirqa. 39  Martapam karqa Maria sutiyuq ñañan, paymi Jesuspa ñawpaqninpi tiyaykuspa rimasqanta uyarirqa. 40  Martam ichaqa tukuy imata ruwaspan manaña haypakurqachu. Chaymi Jesusman asuykuspan nirqa: “Señor, ¿manachu imapas qukusunki tukuy imata ruwanaypaq ñañay sapallayta saqiruwasqanmanta? Chaynaqa, niykuyyá yanapawananpaq”, nispa. 41  Hinaptinmi Jesusñataq nirqa: “Marta, Marta, tukuy ima ruwaywan manaña haypakuspaykim muspaypi hinaña kachkanki. 42  Manam tukuy imataraqchu ruwanaqa, aswanqa hukllatam. Mariaqa allinnin kaqtam akllakurun, chaytaqa manam pipas qichunqachu”, nispa.

Willakuykuna

Kaypiqa nichkan: “Lobo”, nispam. Kay animalqa atuq kaqllam, ichaqa aswan hatunmi.
Utaq: “Gobiernonmi”. Qawaytaq: Palabrakuna entiendenapaq listata.
Utaq: “Hades”. Qawaytaq: Palabrakuna entiendenapaq listata.
Utaq: “Alacran”.
Utaq: “Diospa atiyninpa”. Qawaytaq: Palabrakuna entiendenapaq listata.
Utaq: “Profetakunawan”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Almaykiwan”. Qawaytaq: Palabrakuna entiendenapaq listata.
Huk denario nisqa qullqiqa huk punchaw llamkaypa pagonmi karqa. Qawaytaq: Palabrakuna entiendenapaq listata.