Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Juan 7:1-52

  • Ramada sutiyuq fiestapi Jesuspa kasqanmanta (1-13)

  • Fiestapi Jesuspa yachachisqanmanta (14-24)

  • Cristo pi kasqanmanta hukta-hukta rimasqanku (25-52)

7  Kaykunamanta qipatam Jesusqa tukuy Galilea lawpi purirqa, Judea lawman riytam ichaqa mana munarqachu judiokuna wañurachiyta munasqankurayku.  Ichaqa hichpallañam karqa judiokunapa Ramada sutiyuq fiestanku.  Chaymi wawqinkuna Jesusta nirqaku: “Kaymanta lluqsispayki Judeaman riy qatiqnikikunapas ruwasqaykikunata qawanankupaq.  Manamriki pipas runakunapa riqsisqan kayta munaspanqa pakallapiqa imatapas ruwanchu. Kaykunata ruwachkaspaqa llapa runakunamanyá riqsichikamuy”, nispanku.  Wawqinkunaqa manam Jesuspiqa iñirqakuchu.  Chayraykum paykunata Jesus nirqa: “Manaraqmi ñuqapa horay chayamunraqchu, qamkunapaqmi ichaqa ima tiempopas allinlla.  ¿Imamantamá qamkunataqa runakuna chiqnisunkichikman? Ñuqatam ichaqa chiqniwanku paykunapa mana allin ruwasqankumanta willaptiy.  Qamkunayá fiestamanqa riychik, ñuqaqa manaraqmi chay fiestamanqa risaqraqchu horay manaraq chayamusqanrayku”, nispa.  Paykunata chaynata niruspanmi Galileapi qipakurqa. 10  Wawqinkuna fiestaman pasaptinkuñam, paypas pakakuspallan rirqa mana pipa yachasqallan. 11  Chay fiestapim judiokuna maskayta qallaykuspanku nirqaku: “¿Maypitaq chay runaqa kachkan?”, nispanku. 12  Jesusmantam runakuna anchallataña rimarqaku, ichaqa upallallamantam. Wakinmi nirqaku: “Allin runam payqa”, nispanku. Hukkunañataqmi nirqaku: “Manam chaynachu, aswanqa runakunatam pantachin”, nispanku. 13  Ichaqa manam pipas paymantaqa runapa qayllanpiqa rimaqchu judiokunata manchakusqankurayku. 14  Chawpi fiesta pasayñam kachkarqa, hinaptinmi Jesusqa temploman rispan yachachiyta qallaykurqa. 15  Judiokunañataqmi admirasqa kaspanku nirqaku: “¿Imaynamá kay runaqa kayna yachayniyuqqa escuelallamanpas* mana richkaspanqa?”, nispanku. 16  Jesusñataqmi paykunata nirqa: “Ñuqapa yachachisqayqa manam kikiypachu aswanqa kachamuwaqniypam. 17  Pipas kachamuwaqniypa munayninta ruwayta munaspanqa yachanqam sichu yachachisqayqa Diosmanta kasqanta utaq kikillaymanta rimasqayta. 18  Pipas kikillanmanta rimaqqa kikillan alabasqa kaytam maskan, kachamuqnin alabasqa kananta maskaqmi ichaqa chiqapta riman, manataqmi mana allinpas paypiqa kanchu. 19  Moisesmi leytaqa qusurqankichik, ¿aw? Ichaqa manam mayqinnikichikpas chay leytaqa kasukunkichikchu. ¿Imanasqataq wañuchiwaytaqa munachkankichik?”, nispa. 20  Runakunañataqmi nirqaku: “Qamqa demonioyuqmi kanki. ¿Pitaq wañuchiyta munasuchkanki?”, nispa. 21  Chaymi Jesus nirqa: “Huk ruwaytam ñuqa ruwarqani, hinaptinmi qamkunaqa llapallaykichik admirasqallaña kachkankichik. 22  Chayrayku kaypi piensaychik: Moisesmi nirqa qari kaynikichikta señalachikunaykichikpaq, kayqa ñawpa abuelokunamantaraqmi karqa manam Moisespa tiempollanmantachu, qamkunapas sabadopim señalachikunkichik. 23  Moisespa leynin mana yanqachasqa kananpaqmi sabado kachkaptinpas runaqa qari kayninta señalachikun, ¿hinachkaptinchu ñuqapaq llumpayta piñakurunkichik sanoy-sanoyta runata sabado punchawpi sanoyarachisqaymanta? 24  Amañayá juzgaychikchu qawasqallaykichikman hinaqa, juzgaychikqa justiciaman hinayá”, nispa. 25  Chayraykum Jerusalen llaqtayuq wakin runakuna rimayta qallaykuspanku nirqaku: “Payqa runakunapa wañuchiy munasqanku runam, ¿aw? 26  Chaywanpas waqaya runakunapa qayllanpi rimachkan, ichaqa manam imatapas ninkuchu, ichachu kamachikuqkuna chiqaptapuni yacharunku payqa Cristo* kasqanta. 27  Ñuqanchikqa yachanchikmi maymanta kay runa kasqanta, Cristo hamuptinmi ichaqa mana pipas yachananchu karqa maymanta kasqanta”, nispa. 28  Hinaptinmi Jesusqa templopi yachachichkaspan kallpawan nirqa: “Qamkunaqa riqsiwankichikmi, yachankichiktaqmi maymanta kasqaytapas. Chaymantapas ñuqaqa manam kikillaymantachu hamurqani, kachamuwaqniyqa chiqapmi, qamkunam ichaqa mana riqsinkichikchu. 29  Ñuqaqa riqsinim paypa rantinpi hamusqayrayku, paymi ñuqataqa kachamuwarqa”, nispa. 30  Chaymi imayna hapirunankupaq tantearqaku, ichaqa manam pipas hapirqachu manaraq horan chayamusqanrayku. 31  Chaywanpas chay runakunamantam achkallaña paypi iñispanku nirqaku: “Cristo chayaramuspanqa manam kay runapa milagrokuna ruwasqanmanta mastaqa ruwanmanchu, ¿aw?”, nispanku. 32  Fariseokunam* uyarirurqaku Jesusmanta runakuna chayna rimapakusqankuta, hinaspam fariseokunaqa riqsisqa sacerdotekunapiwan guardiakunata kamachirqaku Jesusta hapimunankupaq. 33  Chaymi Jesus nirqa: “Kachamuwaqniyman manaraq richkaspaymi qamkunawanraq kasaq, ichaqa pisi tiempollañam. 34  Maskawankichikmi ichaqa manam tariwankichikchu, maymi kasqaymanqa manam qamkunaqa hamuyta atiwaqchikchu”, nispa. 35  Hinaptinmi judiokuna ninakurqaku: “¿Maymantaq kayqa riyta piensachkan ñuqanchik mana tarinanchikpaqqa? ¿Icha griegokunapa kasqanpi chiqisqa kaqkunata judiokunamanchu riyta piensachkan griegokunata yachachinanpaq? 36  ¿Ima niytataq munachkan, ‘maskawankichikmi ichaqa manam tariwankichikchu, maymi kasqaymanpas qamkunaqa manam hamuwaqchikchu’ nispanqa?”. 37  Fiestapa tukupaynin hatun punchawpim Jesusqa sayaykuspan kallpawan nirqa: “Pipas yakunayachikuqqa ñuqaman hamuspanyá tomachun. 38  Ñuqapi iñiq runamantaqa Diospa qillqanpa nisqanman hinam, ‘ukunmanta kawsay qukuq yaku mayu hinaraq tuqyamunqa’”, nispa. 39  Chaytaqa nirqa chuya espiritumantam*, chay espiritutam paypi iñiqkuna chaskinankupaqña kachkarqaku, ichaqa Jesus manaraq hanaq pachaman risqanraykum espiritutaqa manaraq chaskirqakuchu. 40  Chayraykum chay rimasqanta uyariq wakin runakuna nirqaku: “Hamunanmi karqa Diosmanta willakuq* runa, payqa chiqaptapunim chay willakuq runa”, nispa. 41  Wakin runakunañataqmi nirqaku: “Payqa Cristom”, nispanku. Hukkunam ichaqa nirqaku: “Cristoqa manamá Galileamantachu hamunan karqa, ¿aw? 42  ¿Manachu Diospa qillqanqa nichkan Davidpa mirayninmanta hinaspa Davidpa yachanan* Belen llaqtachamanta Cristo hamunanta?”, nispa. 43  Chaymi Jesusrayku runakuna mana acuerdopichu karqaku. 44  Wakinmi hapiruyta munarqaku ichaqa manam pipas atirqachu. 45  Chayraykum guardiakunaqa kutirqaku riqsisqa sacerdotekunaman hinaspa fariseokunaman, hinaptinmi paykunaqa guardiakunata nirqaku: “¿Imanasqataq mana pusamurqankichikchu?”, nispanku. 46  Hinaptinmi guardiakunañataq nirqaku: “Wamaqmi kayqa, manam haykapipas pay hinaqa pipas rimarqachu”, nispa. 47  Chaymi fariseokuna nirqaku: “Manachá qamkunapas engañarachikamunkichikchu, ¿aw? 48  Manachá kamachikuqkunamanta nitaq fariseokunamantaqa chullallapas paypiqa iñirunchu, ¿aw? 49  Moisespa leynin mana riqsiq kay runakunam ichaqa ñakasqa kanku”, nispa. 50  Ñawpaqtaraq Jesusman riq Nicodemom fariseokunapa huknin karqa, paymi fariseokunata nirqa: 51  “Chaskisqanchik Moisespa leyninman hinaqa manam pitapas juzgachwanchu kikinta manaraq uyarichkaspaqa nitaq ruwasqantapas manaraq yachachkaspaqa, ¿aw?”, nispa. 52  Hinaptinmi paykuna nirqaku: “Qampas manam Galileamantachu kanki, ¿aw? Diospa qillqanta allinta estudiay hinaspayá cuentata qukuy Diosmanta willakuq* Galileamanta mana hamunanta”, nispa*.

Willakuykuna

Kaypi escuelamanta rimaspanqa, religionmanta yachachiq escuelamantam rimachkan.
Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Diospa atiyninmantam”. Qawaytaq: Palabrakuna entiendenapaq listata.
Utaq: “Profeta”. Qawaytaq: Palabrakuna entiendenapaq listata.
Utaq: “Tiyanan”.
Utaq: “Profeta”.
Ñawpaq tiempopi respetasqa achka qillqakunapim mana kanchu pichqa chunka kimsayuq versiculomanta pusaq capitulopa chunka hukniyuq versiculokama.