Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Juan 21:1-25

  • Qatiqninkunaman Jesuspa rikurisqanmanta (1-14)

  • Jesusta Pedro ‘kuyaykim’ nisqanmanta (15-19)

    • ‘Chitachaykunata michiy’ nispa Jesuspa kamachisqanmanta (17)

  • Jesuspa kuyasqan qatiqninqipa punchawpi imayna kananmanta (20-23)

  • Tukupayninmanta (24, 25)

21  Chaymantam Jesusqa kaqmanta qatiqninkunaman rikuriykurqa Tiberiades lamar quchapa patanpi, kaynam rikuriykusqanqa karqa:  Kuskam kachkarqaku Simon Pedro, Mellizowan sutichasqa Tomas, Galilea law Cana llaqtamanta Natanael, Zebedeopa churinkuna hinaspa Jesuspa iskay qatiqninkunapas.  Simon Pedrom paykunata nirqa: “Risaqyá challwa hapiq”, nispa. Hinaptinmi paykunaqa nirqaku: “Ñuqaykupas qanwanyá risaqku”, nispanku. Chaymi lluqsiruspanku boteman siqarurqaku, ichaqa manam chay tutaqa chullallatapas challwarqakuchu.  Chaymantam achikyamuchkaptin Jesusqa lamar quchapa patanpi sayachkarqa, qatiqninkunam ichaqa mana musyakurqakuchu Jesus kasqantaqa.  Hinaptinmi Jesusqa paykunata nirqa: “Churillaykuna, manam imapas* mikunaykichikpaq kanchu, ¿aw?”, nispan. Paykunañataqmi nirqaku: “¡Manam!”, nispanku.  Hinaptinmi paykunata Jesus nirqa: “Botepa alliq* lawninman mallata wischuychik hinaspaqa tarinkichikmi”, nispa. Chaymi paykunaqa chay mallata wischurqaku, ichaqa manam hurquyta atirqakuchu achkallaña challwa kasqanrayku.  Chayraykum Jesuspa kuyasqan qatiqninqa Pedrota nirqa: “¡Payqa señormi!”, nispan. Hinaptinmi Simon Pedroqa señor kasqanta yacharuspan mana pachayuq kasqanrayku hawan pachanta hinakuykuspan lamar quchaman pawaykurqa.  Wakin qatiqninkunam ichaqa taksa botechapi hamurqaku challwakunata malla huntata aysamuspanku, paykunaqa manam lamar quchapa patanmanta karupichu kachkarqaku, aswanqa yaqa isqun chunka metrollapim*.  Botemanta lamar quchapa patanman lluqsiruspankuñataqmi sansa ruwasqapa hawanpi rikururqaku challwata, rikururqakutaqmi tantatapas. 10  Hinaptinmi paykunata Jesus nirqa: “Chayllaraq hapimusqaykichik challwakunamanta wakinta apamuychik”, nispa. 11  Chaymi Simon Pedroqa boteman siqaruspan lamar quchapa patanman mallata hurqumurqa huntallaña hatun challwayuqkunata, chaypiqa karqa pachak pichqa chunka kimsayuq challwakunam. Achkallaña kaptinpas mallaqa manam llikikurqachu. 12  Jesusñataqmi paykunata nirqa: “Hamuspayá mikuykuychik”, nispa. Señor kasqanta yachasqankuraykum mayqin qatiqninpas mana atirqachu “¿pitaq kanki?” nispa tapuytaqa. 13  Jesusmi asuykuspa tantata hapiykuspan paykunaman quykarirqa, chaynatam ruwarqa challwawanpas. 14  Kaywanqa wañusqanmanta kawsarimusqan qipatam kimsakamaña Jesusqa qatiqninkunaman rikuriykurqa. 15  Mikuyta tukuruptinkum Simon Pedrota Jesus nirqa: “Juanpa churin Simon, ¿kaykunamanta mastachu kuyawanki?”, nispa. Payñataqmi nirqa: “Arí señor, qamqa yachankim kuyasqaytaqa”, nispa. Hinaptinmi Jesus nirqa: “Chitachaykunatayá michiy”, nispa. 16  Yapamantam Jesusqa payta nirqa: “Juanpa churin Simon, ¿kuyawankichu?”, nispa. Payñataqmi nirqa: “Arí señor, qamqa yachankim kuyasqaytaqa”, nispa. Hinaptinmi Jesus nirqa: “Ovejachaykunatayá michiy”, nispa. 17  Kimsakamaña tapuspanmi kaqllamanta nirqa: “Juanpa churin Simon, ¿kuyawankichu?”, nispa. Kimsa kutikamaña: “¿Kuyawankichu?”, nispa tapuptinmi Pedroqa hukmanyarurqa. Hinaspam nirqa: “Señor, qamqa tukuy imatam yachanki, qamqa yachankipunim kuyasqaytaqa”, nispa. Hinaptinmi Jesus nirqa: “Ovejachaykunatayá michiy. 18  Chiqaptapunim niki: Mozoraq kaspaykiqa kikikim pachakurqanki hinaspam maymi munasqaykikunapi purirqanki, machuyaruptikim ichaqa makikita haywariptiki hukña pachachisunki hinaspam mana munasqayki lawkunaman pusasunki”, nispa. 19  Chaynataqa nirqa Pedro imayna wañukusqanwan Diosta hatunchananmanta qawachinanpaqmi. Chaynata niruspanmi Jesusqa Pedrota nirqa: “Hinallayá qatiway”, nispa. 20  Pedrom muyuriykuspan Jesuspa kuyasqan qatiqninta rikururqa qipan hamuchkaqta, chay kuyasqan qatiqninqa ñawpaqtam cenachkaptinku Jesuspa qasqun lawman waqtapakuykuspan nirqa: “Señor, ¿pitaq traicionasuqnikiqa?”, nispan. 21  Payta rikuruspanmi Pedroqa Jesusta nirqa: “Señor, ¿imatataq payqa ruwanqa?”, nispan. 22  Jesusñataqmi nirqa: “Hamunaykama hinalla kananta munaptiyqa, ¿imataq qamtaqa qukusunki? Qamqa hinallayá qatiway”, nispa. 23  Chaymi qatiqninkuna rimanakuyta qallaykurqaku, chay kuyasqan qatiqnin mana wañunanmanta. Jesusqa rimachkarqa manam qatiqnin mana wañunanmantachu, aswanqa nirqa: “Hamunaykama hinalla kananta munaptiyqa, ¿imataq qamtaqa qukusunki?”, nispam. 24  Jesuspa chay qatiqninmi kaykunamanta willakurqa hinaspa kaykunamanta qillqarqa, hinaspapas yachanchikmi paypa willakusqanqa chiqap kasqanta. 25  Kachkantaqmi Jesuspa achkallaña wakin ruwasqankunapas. Tukuy chaykunamanta haykapillapas sapakamamanta qillqakuptinqa, manachusmi piensasqayman hinaqa kay pachapas* haypanmanchu llapallan qillqasqakunata churanapaqqa.

Willakuykuna

Utaq: “Ni huk challwallapas”.
Utaq: “Paña”.
Kaypiqa nichkan: “Yaqa iskay pachak kuchus”, nispam. Qawaytaq: Palabrakuna entiendenapaq listata.
“Kay pachapas” nispanqa rimachkan kay pachapi librokuna waqaychana sitiokunamantam.”