Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Juan 20:1-31

  • Sepulturapi manaña Jesuspa kasqanmanta (1-10)

  • Maria Magdalenaman Jesuspa rikuriykusqanmanta (11-18)

  • Qatiqninkunaman Jesuspa rikuriykusqanmanta (19-23)

  • Tomaspa iskayrayasqanmanta hinaspa creerusqanmanta (24-29)

  • Wankusqa qillqa imapaq kasqanmanta (30, 31)

20  Semanapa qallariynin punchawpim* Maria Magdalena* manaraq achikyamuchkaptin tutapaytaraq rirqa sepulturaman, hinaspam sepultura tapasqanku rumita asurichisqataña tarirurqa.  Chaymi kallpaylla* rirqa Simon Pedroman hinaspa Jesuspa kuyasqan qatiqninman, hinaspam paykunata nirqa: “Señortam sepulturamanta hurqurusqaku, manam yachanikuchu mayman churarusqankuta”, nispa.  Hinaptinmi Pedrowan Jesuspa huknin qatiqninqa sepulturaman rirqaku.  Iskayninkum kallpayta* qallaykurqaku, ichaqa hukninmi Pedrota llalliruspan puntataraq sepulturaman chayarurqa.  Hinaspam kurkuykuspan rikururqa linomanta tela chaypi wischurayachkaqta, ichaqa manam yaykurqachu.  Simon Pedropas qipantam chayarurqa hinaspam payqa sepulturaman yaykururqa, rikururqataqmi linomanta tela chaypi wischurayachkaqta.  Jesuspa umanpi kaq llampu telam ichaqa sapaqpi wankusqa kachkasqa, manam wakin telakunawan kuskachu.  Sepulturaman punta chayaq Jesuspa huknin qatiqninpas yaykuruspanmi rikururqa hinaspam chayraq creerqa.  Paykunaqariki manaraqmi entienderqakuchu wañusqanmanta Jesus kawsarimunanta Diospa qillqanpi nisqantaqa. 10  Chaymantam qatiqninkunaqa wasinkuman kutikurqaku. 11  Mariam ichaqa sepulturapa hichpallanpi waqastin qiparurqa, hinaspam wiqi ñawintin kurkuykurqa sepultura ukuta qawananpaq. 12  Chaypim yuraq pachayuq iskay angelkunata rikururqa, huknintam rikururqa Jesuspa cuerpon churasqankupa uman lawpi tiyachkaqta, huknintañataq haytan lawpi tiyachkaqta. 13  Chay angelkunam nirqaku: “Mamáy, ¿imanasqataq waqachkanki?”, nispanku. Payñataqmi nirqa: “Señorniytam hurqurusqaku, manam yachanichu mayman churarusqankutapas”, nispa. 14  Chaynata niruspanmi payqa qipata qawarispan Jesusta sayachkaqta rikururqa, ichaqa manam musyakurqachu Jesus kasqantaqa. 15  Jesusñataqmi nirqa: “Mamáy, ¿imanasqataq waqachkanki? ¿Pitataq maskachkanki?”, nispan. Mariañataqmi huerta cuidaq kasqanta piensaspan nirqa: “Señor, qam aparuspaykiqa niykuwayá mayman churaramusqaykita hinaptinmi rispay hurquramusaq”, nispa. 16  Jesusñataqmi nirqa: “¡Maria!”, nispan. Chaymi muyuriykuspan Mariaqa hebreo rimaypi nirqa: “¡Rabboni!”, nispa. (Chay ninanqa: “Yachachikuq”, ninanmi). 17  Jesusñataqmi nirqa: “Ama hapipakuwaychu, ñuqaqariki manaraqmi taytayman riniraqchu, aswanqa wawqiykunaman rispayá kaynata nimuy: ‘Richkanim taytayman hinaspa qamkunapapas taytaykichikman, Diosniyman hinaspa qamkunapapas Diosnikichikman’”, nispa. 18  Hinaptinmi Maria Magdalenaqa kutispan chay rikusqanmanta Jesuspa qatiqninkunaman willamurqa: “¡Señortam rikuramuni!”, nispan. Paykunamanqa willarqataqmi Jesuspa ima nisqantapas. 19  Hina chay punchawllam Jesuspa qatiqninkunaqa judiokunata manchakuspanku punkuta llavewan wichqakuruspanku tarde lawta huñunakururqaku, hinaptinmi Jesusqa paykunapa chawpinpi rikuriruspan nirqa: “Hawkallayá kaychik”, nispa. Chay punchawqa semanapa qallariynin punchawmi karqa. 20  Chaynata niruspanmi Jesusqa makinkunatawan waqtanta paykunaman qawachirqa. Hinaptinmi qatiqninkunaqa señorta rikuruspanku kusikurqaku. 21  Chaymi Jesusqa yapatawan paykunata nirqa: “Allinlla kanaykichiktam munani*. Imaynam taytay ñuqata kamachimuwarqa chaynallataqmi ñuqapas qamkunata kamachikichik”, nispan. 22  Chaynata niruspanmi paykunaman pukuykuspan nirqa: “Chuya espirituta* chaskiychik. 23  Pipatapas huchanta pampachaptikichikqa paykunapa huchankuqa pampachasqañam kachkan. Mana pampachaptikichikqa paykunapa huchankuqa mana pampachasqam kachkan”, nispa. 24  Paykunapa chawpinpi Jesus rikuriptinqa manam chaypichu kachkarqa Mellizo sutiyuq Tomasqa, payqa chunka iskayniyuq apostolkunamanta hukninmi karqa. 25  Chaymi Jesuspa wakin qatiqninkuna nirqaku: “¡Señortam rikuruniku!”, nispanku. Tomasmi ichaqa paykunata nirqa: “Sichum ñuqa mana rikusaqchu makinkunapi clavowan takasqankuta, manataq dedoytapas clavokunapa uchkusqanman hinasaqchu nitaq makiytapas waqtanman hinasaqchu, hinaspayqa manapunim creesaqchu”, nispa. 26  Pusaq punchawmantam qatiqninkunaqa kaqlla wasi ukupi kachkarqaku, Tomaspas paykunawanmi chay kutipiqa kachkarqa. Hinaptinmi llavewan punku wichqasqa kachkaptinpas Jesusqa paykunapa chawpinpi rikuriruspan nirqa: “Hawkallayá kaychik”, nispa. 27  Chaymantam Tomasta nirqa: “Kayman dedoykita hinay, hinaspa makiykunata qaway, makikitapas waqtayman hinay, hinaspayá amaña iskayrayaspa creey”, nispa. 28  Chaymi Tomas nirqa: “¡Señorlláy hinaspa Diosnilláy!”, nispan. 29  Jesusñataqmi nirqa: “¿Qawaykuwaspaykichu creerunki? Kusisqam kanku mana rikuchkaspankupas creeqkunaqa”, nispa. 30  Chiqaptapunim Jesusqa achka milagrokunataraq qatiqninkunapa qayllanpiqa ruwarqa, chaykunaqa manam qillqasqachu kachkan kay wankusqa qillqapiqa. 31  Kaykunam ichaqa qillqasqa karqa Jesusqa Diospa churin Cristo* kasqanta creenaykichikpaq, creespaykichikñataq sutinrayku kawsanaykichikpaq.

Willakuykuna

Kunanmi kay punchawta sutichanchik domingo nispa. Judiokunapaqmi domingoqa karqa semanapa qallariynin punchaw.
Utaq: “Magdala llaqtayuq Maria”.
Utaq: “Raskispan”.
Utaq: “Raskiyta”.
Kaypiqa nichkan: “Hawkallayá kaychik”, nispam.
Utaq: “Diospa atiyninta”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.