Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Juan 14:1-31

  • Diosman asuykunapaqqa Jesuslla kasqanmanta (1-14)

    • “Ñuqam kani ñan, chiqap kaq chaynataq kawsay quqpas”, nispa Jesuspa rimasqanmanta (6)

  • Chuya espirituta kachamunanpaq Jesuspa rimasqanmanta (15-31)

    • Jesusmantaqa taytan aswan atiyniyuq kasqanmanta (28)

14  “Amayá sunquykichikqa hukmanyachunchu, Diospiyá hinalla iñiychik, chaynallataqyá ñuqapipas iñiychik.  Taytaypa wasinpiqa achkam yachanapaq* wasikuna kachkan. Mana chayna kaptinqa manam chaynataqa nikichikmanchu karqa. Qamkunapaq sitiota allichaqmi ñuqaqa richkani.  Chaymantapas, sichum risaq hinaspa qamkunapaq sitiota allichamusaq hinaspayqa kaqmantam hamusaq, hinaspam wasiyman pusasqaykichik maymi kasqaypi qamkunapas kanaykichikpaq.  Qamkunaqa riqsinkichikmi mayman risqay ñantaqa”, nispa.  Tomasñataqmi nirqa: “Señor, manam yachanikuchu mayman risqaykitaqa. Hinachkaspaqa, ¿imaynamá ñantaqa riqsiymanku?”, nispa.  Jesusñataqmi nirqa: “Ñuqam kani ñan, chiqap kaq chaynataq kawsay quqpas. Ñuqantakamallam pipas taytaymanqa asuykun.  Riqsiwaspaykichikqa taytaytapas riqsiwaqchikmi karqa, kunanmantapachaqa riqsirunkichikñam hinaspa rikurunkichikñam”, nispa.  Felipeñataqmi nirqa: “Señor, taytaykitayá qawaykachiwayku hinaptinqa chayllapaqñam kaniku”, nispan.  Hinaptinmi Jesusñataq nirqa: “¿Kaychikan tiempoña qamkunawan kachkaptiychu Felipe manaraq riqsiwanki? Ñuqata rikuwaqniyqa taytaytapas rikurunñam. Hinaptinqa, ¿imaynanpimá niwanki ‘taytaykitayá qawaykachiwayku’ nispaqa? 10  ¿Manachu qamqa yachanki taytaywan huklla kasqayta chaynataq taytaypas ñuqawan huklla kasqanta? Tukuy imata qamkunaman nisqaytaqa manam kikillaymantachu rimani, aswanqa ñuqawan huklla kaq taytaymi imam ruwananta ruwachkan. 11  Creewaychikyá taytaywan huklla kasqayta chaynataq taytaypas ñuqawan huklla kasqanta, mana chayqa ruwasqaykunatayá creeychik. 12  Chiqaptapunim nikichik: Pipas ñuqapi iñiqqa ñuqapa ruwasqaykunatapas ruwanqam, taytayman risqayraykum ruwasqaykunamantapas aswan mastaraq ruwanqa. 13  Chaymantapas, ñuqapa sutiypi imatapas mañakuptikichikqa ruwasaqmi, chaynapi churintakama taytay hatunchasqa kananpaq. 14  Ñuqapa sutiypi imatapas mañakuptikichikqa ruwasaqmi. 15  Kuyawaspaykichikqa kamachisqaykunatam kasukunkichik, 16  ñuqam taytayta mañakusaq hinaptinmi ñuqamanta huk yanapasuqnikichikta qusunkichik chaynapi wiñaypaq qamkunawan kananpaq. 17  Chayqa chiqap kaqmanta willakuq chuya espiritum*, chaytaqa manam runakunaqa chaskinmankuchu mana rikusqankurayku hinaspa mana riqsisqankurayku. Qamkunaqa riqsinkichikmi qamkunawan kasqanrayku hinaspa qamkunapi kasqanrayku. 18  Manam llakisqatachu saqisqaykichikqa, qamkunamanqa hamusaqmi. 19  Manam unayñachu runakunaqa rikuwanqa, qamkunam ichaqa rikuwankichik. Ñuqa kawsasqayraykum qamkunaqa kawsankichik. 20  Chay punchawpim qamkunaqa yachankichik taytaywan huklla kasqayta, yachankichiktaqmi qamkunapas ñuqawan huklla kasqaykichikta hinaspa ñuqapas qamkunawan huklla kasqayta. 21  Kamachisqaykunata yachaspan kasukuqqa kuyawaqniymi. Kuyawaqniytaqa taytaypas kuyanqataqmi, ñuqapas paytaqa kuyasaqmi hinaspam sumaqta riqsichikusaq”, nispa. 22  Judasñataqmi nirqa: “Señor, ¿imanasqataq ñuqaykumanqa sumaqta riqsichikunki, runakunamanñataq mana riqsichikunkichu?”, nispa. Chaytaqa nirqa manam Judas Iscariote kaqchu. 23  Hinaptinmi Jesus nirqa: “Pipas kuyawaspanqa nisqaykunatam kasukunqa, paytaqa taytaypas kuyanqam, taytaywanmi payman hamusaqku hinaptinmi payqa ñuqaykuwan kuska kanqa. 24  Pipas mana kuyawaqniyqa manam nisqaykunataqa kasukunchu, qamkunaman nisqaykunaqa manam ñuqapachu aswanqa kachamuwaqniy taytaypam. 25  Qamkunawanraq kachkaspayraqmi kaykunataqa rimapayarqaykichik. 26  Taytaymi sutiypi kachamunqa* yanapasuqnikichik chuya espirituta, paymi tukuy imata yachachisunkichik hinaspa yuyarichisunkichik tukuy ima rimapayasqaykunata. 27  Hawka kaytam saqikichik, hawkayayniytam quykichik. Kayna hawkayaytaqa manam runakunaqa qusunkichikmanchu. Amayá llakikuychikchu nitaq manchakuychikchu. 28  Nirqaykichikmi: ‘Rispaymi qamkunaman kaqlla kutimusaq’, nispay. Kuyawaspaykichikqa kusikuwaqchikmi taytayman risqaywanqa, taytayqariki ñuqamantaqa aswan atiyniyuqmi. 29  Manaraq chaykuna kachkaptinmi qamkunata nirqaykichik, chaykuna kaptin creenaykichikpaq. 30  Kunanmantaqa manañam qamkunawanqa mastaqa rimasaqñachu kay pachata kamachiq hamusqanrayku. Payqa manam ñuqataqa munaychakuwanchu. 31  Ichaqa taytay kuyasqayta runakuna yachanankupaqmi taytaypa kamachiwasqanman hina imam kaqta ruwachkani. Hatariychik, hakuchikña kaymanta.

Willakuykuna

Utaq: “Tiyanapaq”.
Utaq: “Diospa atiyninmi”. Qawaytaq: Palabrakuna entiendenapaq listata.
Utaq: “Mandamunqa”.