Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Juan 12:1-50

  • Jesuspa chakinman aceitetaMaria tallisqanmanta (1-11)

  • Jerusalenman Jesuspa yaykusqanmanta (12-19)

  • Wañukunanmanta Jesuspa willakusqan (20-37)

  • Willakuypa nisqanman hinajudiokuna mana iñiyniyuq kasqankumanta (38-43)

  • Llapa runakunata salvananpaq Jesuspa hamusqanmanta (44-50)

12  Suqta punchawllaña pascua* fiesta chayamunanpaq kachkaptinmi Jesusqa Betania llaqtachaman chayarurqa, chaypim Lazarotaqa wañusqanmanta kawsarirachirqa.  Chaypi kachkaptinmi Jesusta cenachirqaku, Martam atienderqa, Lazaroñataqmi mikuqkunawan* kuska Jesuswan kachkarqa.  Hinaptinmi Mariaqa miski asnaq aceiteta yaqa medio litrota hapiykuspan Jesuspa chakinman talliykurqa*, hinaspam chukchanwan chakichirqa, chay aceiteqa karqa achka qullqipa chanin legitimo nardo nisqam. Chay aceitepa miski asnayninwanmi wasipas huntarurqaraq.  Hinaptinmi Jesuspa qatiqninkunamanta traicionananpaqña kaq Judas Iscariote nirqa:  “Wak miski asnaq aceitetaqa kimsa pachak denario* nisqa qullqimanchiki rantikuchwan* karqa, wakchakunaman aypunapaq”, nispan.  Chaynataqa nirqa manam wakchakunata llakipayaspanchu, aswanqa suwa kaspanmi. Paypa makinpim karqa qullqi waqaychananku cajacha, chaymi payqa chayman churasqanku qullqita suwakuq.  Chaymi Jesus nirqa: “Hinayá chaytaqa ruwachun pampakunay punchawpaq cuerpoyta alistaspan.  Wakchakunaqa qamkunawanmi tukuy tiempo kachkan, ñuqam ichaqa mana tukuy tiempochu qamkunawanqa kasaq”, nispa.  Judiokunañataqmi Betaniapi Jesus kasqanta yacharuspanku chayman achkallaña rirqaku, manam Jesusraykullachu rirqakuqa aswanqa wañusqakunapa kasqanmanta kawsarichisqan Lazarota qawanankupaqwanmi. 10  Riqsisqa sacerdotekunañataqmi rimanakururqaku Lazarotapas wañurachinankupaq, 11  payrayku achkallaña judiokuna Betaniaman rispa Jesuspi iñisqankurayku. 12  Paqarinnintin punchawtañataqmi fiestaman hamuq achkallaña runakuna yacharurqaku Jerusalenman Jesuspa risqanta. 13  Hinaspankum palmera sachapa kallmankunata aparikuspanku Jesus hamuptin taripaq* lluqsirqaku, hinaspam kallpawan nirqaku: “¡Dioslláy ama hina kaspaykiyá salvaykuy! ¡Bendecisqayá kachun Jehova* Diospa sutinpi hamuq Israelpa kamachiqninqa!”, nispanku. 14  Jesusmi asnochata tariruspan sillakuykurqa. Chayqa karqa kayna qillqasqa kasqanman hinam: 15  “Ama manchakuychu Sion llaqta. ¡Qawaychik! Malta asnochapi sillakuykuspam kamachiqninchik hamuchkan”, nispa. 16  Runakunapa chayna ruwasqankutaqa manam qallariypiqa qatiqninkunaqa entienderqakuchu, Jesus hatunchasqa karuptinmi ichaqa yuyarirurqaku Jesusta chayna ruwasqankuqa qillqasqaña kasqanmanta. 17  Chaymantapas, sepulturamanta Lazarota Jesus kawsarichisqanta qawaq runakunam rikusqankumanta hinalla willakurqaku. 18  Chay milagro ruwasqanmanta uyariruspankutaqmi chay achkallaña runakunaqa Jesus hamuptin taripaq* lluqsirqaku. 19  Chaymi fariseokuna* ninakurqaku: “Qawasqanchikman hinapas manam imallatapas ruwayta atinchikchu. Llapa runakunam qayllanchikpiraq payta qatichkanku”, nispanku. 20  Diosta yupaychanankupaq chay fiestaman riqkunamanta wakinmi karqa Grecia nacionmanta. 21  Paykunam Galilea lawpi Betsaida llaqtayuq Felipeman asuykurqaku hinaspam ruegakuspanku nirqaku: “Taytáy, Jesustam qawaykuyta munaniku”, nispanku. 22  Hinaptinmi Felipeqa Andresman asuykuspan willarqa. Andresñataqmi Felipewan kuska Jesusman asuykuspanku willarqaku. 23  Jesusmi ichaqa paykunata nirqa: “Horam chayaramun runapa churin* hatunchasqa kananpaq. 24  Chiqaptapunim nikichik: Allpaman wichiq trigopa muhun mana chinkaspanqa* manam rurunchu, muhu chinkaruspanmi ichaqa achkallataña rurunqa. 25  Pipas vidallan* kuyaqqa vidantam pierderunqa, pipas kay pachapi vidan chiqniqmi ichaqa vidanta waqaychanqa wiñay kawsayniyuq kananpaq. 26  Pipas serviwayta munaspanqa qatiwachunyá, payqa maymi kasqaypipas serviqniymi kanqa. Pipas serviwaqniytaqa taytaymi hatunchanqa. 27  Kunanqa llumpay hukmanyasqam kachkani, ¿ima nisaqtaq? Taytalláy, salvaykuway kay ñakariy horamanta, ichaqa kay ñakariy horamanmi hamurqani. 28  Taytalláy, sutikita hatunchay”, nispa. Hinaptinmi hanaq pachamanta kayna rimay uyarikamurqa: “Hatuncharuniñam, chaywanpas huktawanraqmi hatunchasaq”, niq. 29  Chaypi kaq llapa runakunam chayta uyariruspanku nirqaku rayo tuqyarusqanta. Wakinñataqmi nirqaku: “Angelmi paytaqa rimapayaramun”, nispa. 30  Jesusñataqmi nirqa: “Chayna rimayqa uyarikurqa manam ñuqaraykuchu, aswanqa qamkunaraykum. 31  Kunanmi kay pacha juicioman yaykuchkan, kay pacha kamachiqpas kunanmi hawaman wischusqa kanqa. 32  Ñuqam ichaqa warkusqa kaspay tukuy rikchaq runakunata ñuqaman pusamusaq”, nispa. 33  Chaynataqa rimarqa imayna wañukunanta qawachinanpaqmi. 34  Chaymi runakuna payta nirqaku: “Ñuqaykuqa Moisespa leyninman hinam yachaniku Cristoqa wiñaypaq kananmanta. Hinaptinqa, ¿imaynamá qamqa ninki ‘runapa churinqa warkusqam kanqa’ nispaqa? ¿Pitaq chay runapa churinqa?”, nispanku. 35  Chaymi Jesusqa paykunata nirqa: “Achkiqa manam unayñachu qamkunawanqa kanqa. Qamkunawanraq achki kachkaptinyá puriychik tutayay mana hapirusunaykichikpaq. Pipas tutayaypi puriqqa manam yachanchu mayman risqanta. 36  Achki qamkunawan kachkaptinqa chay achkipiyá iñiychik, achkipa churinkuna kanaykichikpaq”, nispa. Kaykunata rimaruspanmi Jesusqa pasakurqa hinaspanmi paykunamanta pakakururqa. 37  Paykunapa qayllanpi achkallaña milagrokunata ruwachkaptinpas paykunaqa manam paypiqa iñirqakuchu, 38  chaynapim cumplikurqa Diosmanta willakuq* Isaiaspa kayna nisqan: “Jehova Dioslláy, ñuqaykum willakurqaniku ichaqa, ¿pimá iñirqa willakusqaykupiqa? ¿Pimantaq Jehova Diosqa brazonta riqsichikurqa?”, niq. 39  Imanasqa mana creenankumantam Isaiasqa kaynatawanraq nirqa: 40  “Paymi ñawinkuta tutayarachin hinaspa sunqunkutapas rumiyarachin chaynapi ñawinkuwan mana qawakunankupaq chaynataq sunqunkupi mana entiendenankupaq hinaspa sanoyachinaypaq ñuqaman mana kutirimunankupaq”, nispa. 41  Isaiasqa tukuy kaykunataqa nirqa Cristopa hatunchasqa kayninta rikuspanmi, chaymi paymantaqa chaynata nirqa. 42  Chaywanpas, Jesuspiqa iñirqakutaqmi achkallaña kamachikuqkunapas. Ichaqa fariseokunaraykum mana libretachu willakurqaku chaynapi yupaychana wasimanta* mana qarqusqa kanankupaq. 43  Chay kamachikuqkunaqariki Diospa alabasqan kanankumantaqa runakuna alabanankutam astawanqa munaqku. 44  Jesusñataqmi kallpawan nirqa: “Pipas ñuqapi iñiqqa manam ñuqallapichu iñin aswanqa kachamuwaqniypipas iñinmi. 45  Pipas rikuwaqniyqa rikuntaqmi kachamuwaqniytapas. 46  Ñuqaqa achki hinam runakunaman hamurqani pipas ñuqapi iñiqqa tutayaypi manaña kananpaq. 47  Pipas uyariwaspan mana kasukuqtaqa manam juzganichu. Ñuqaqa hamurqani manam llapa runakunata juzganaypaqchu aswanqa llapa runakunata salvanaypaqmi. 48  Mana uyariwaspan nisqaykunata mana kasukuqpaqqa kachkanmi juzgaqnin. Rimasqaykunam tukupay punchawpi paytaqa juzganqa. 49  Ñuqaqa manam kikillaymantachu rimarqani, aswanqa kachamuwaqniy taytaymi kamachiwarqa imam ninayta chaynataq imam rimanaytapas. 50  Yachanitaqmi kamachikuyninqa wiñay kawsay qukuq kasqanta. Chayraykum imam nisqaykunataqa rimani taytaypa niwasqanman hina”, nispa.

Willakuykuna

Qaway: Palabrakuna entiendenapaq listata.
Utaq: “Mesapi tiyaqkunawan”.
Utaq: “Hichaykurqa”.
Huk denario nisqa qullqiqa huk punchaw llamkaypa pagonmi karqa. Qawaytaq: Palabrakuna entiendenapaq listata.
Utaq: “Vendechwan”.
Utaq: “Haypaq”.
Qaway: Palabrakuna entiendenapaq listata.
Utaq: “Haypaq”.
Qaway: Palabrakuna entiendenapaq listata.
Qaway: Palabrakuna entiendenapaq listata.
Kaypiqa nichkan: “Mana wañuspanqa”, nispam.
Utaq: “Almallan”. Qawaytaq: Palabrakuna entiendenapaq listata.
Utaq: “Profeta”. Qawaytaq: Palabrakuna entiendenapaq listata.
Kaypiqa nichkan: “Sinagoga”, nispam. Qawaytaq: Palabrakuna entiendenapaq listata.