Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Hechos 6:1-15

  • Yanapakunankupaq akllasqa 7 qarikunamanta (1-7)

  • ‘Diospa contranpim mana allinkunata riman’ nispa Estebanta acusasqankumanta (8-15)

6  Chay punchawkunapim Jesuspa qatiqninkuna aswan-aswan yapakuchkarqa. Hinaptinmi griego rimaq judiokuna quejakurqaku hebreo rimaq judiokunamanta, sapa punchaw mikuyta aypuspanku griego rimaq viudakunaman tupaqninkuta mana qusqankumanta.  Chaymi chunka iskayniyuq apostolkuna lliw iñiqkunata qayachispanku nirqaku: “Manam allinchu kanman Diospa palabran yachachiyta saqiruspayku mikuyta aypuyniykuqa.  Chayrayku wawqillaykuna qamkuna ukumanta akllaychik mikuyta aypunankupaq allin respetasqa qanchis qarikunata, paykunaqa kananku chuya espiritupa* huntasqan hinaspa allin yachayniyuqmi,  ñuqaykuñataqmi Diosta mañakuypi hinaspa palabranmanta yachachiyllapiña kasaqku”, nispa.  Paykunapa nisqankum lliw iñiqkunapaq allin karqa, chaymi akllarqaku Estebanta, payqa karqa chuya espiritupa huntasqan ancha iñiyniyuqmi, akllarqakutaqmi Felipeta, Procorota, Nicanorta, Timonta, Parmenasta hinaspa judiokunapa religionninman tikrakuq Nicolasta, payqa karqa Antioquiamantam.  Paykunatam apostolkunaman pusarqaku hinaptinmi apostolkunaqa Diosta mañakuruspanku makinkuta paykunapa hawanman churaykurqaku.  Diospa palabranmi tukuy hinastinpi willakusqa karqa, Jerusalenpi iñiqkunapas aswan-aswanmi yapakuchkarqa, achkallañataqmi sacerdotekunapas iñikurqaku.  Estebanmi Diospa ancha yanapasqan kaspa chaynataq Diospa atiyninwan huntasqa kaspan runakunapa qayllanpi admirakuypaq kaqkunatawan milagrokunata ruwarqa.  Estebanwan atipanakunankupaqmi asuykurqaku Libertos nisqawan sutichasqa runakunapa wakinninku, paykunawan kuskataqmi asuykurqaku Cirenemanta, Alejandriamanta, Ciliciamanta hinaspa Asia lawkunamanta wakin runakunapas. 10  Yachaywan hinaspa chuya espiritupa yanapakuyninwan Esteban rimaptinmi paykunaqa mana ima niytapas atirqakuchu. 11  Chaymi paykunaqa pakallapi qarikunata yachachirqaku kaynata ninankupaq: “Kay runatam uyarirqaniku Moisespa hinaspa Diospa contranpi mana allinkuna rimachkaqta”, nispa. 12  Hinaspankum llaqtapi runakunata, autoridadkunata hinaspa escribakunata* umacharqaku contranpi lliw hatarinankupaq, hinaspam paykunaqa Estebanman pawaykuspa hapirurqaku mana munakuchkaqta hinaspam pusarqaku judiokunapa hatun cortenman*. 13  Chaymantam llullakunankupaq runakunata pusamurqaku, hinaptinmi paykuna nirqaku: “Kay runam templopa hinaspa Moisespa leyninpa contranpi tukuy tiempo mana allinkunata rimachkan. 14  Uyarirqanikum, ‘Nazaretmanta Jesusmi templota tuñirachinqa hinaspam Moisespa saqiwasqanchik costumbrekunata cambianqa’ niqta”, nispa. 15  Hinaptinmi judiokunapa hatun cortenpi lliw tiyaqkuna Estebanta qawarayaspanku rikurqaku angelpa uyan hina uyayuq kasqanta.

Willakuykuna

Utaq: “Diospa atiyninpa”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Kaypiqa nichkan: “Sanedrin”, nispam. Qawaytaq: Palabrakuna entiendenapaq listata.