Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Hechos 3:1-26

  • Limosna mañakuq wistu runata Pedro sanoyachisqanmanta (1-10)

  • Salomonpa pilarniyuqkuna corredorninpi Pedro rimasqanmanta (11-26)

    • Tukuy ima allichasqa kananmanta (21)

    • Moises hina Diosmanta willakuq rikurimunanmanta (22)

3  Pedrowan Juanmi Diosta mañakuna horata temploman richkarqaku, chayqa karqa kimsa hora tardem*,  hinaptinmi runakunaqa nacesqanmantapacha wistu* runata apachkarqaku. Paytam sapa punchaw churaqku templopa Sumaq nispa sutichasqa punkupa hichpanpi, chaynapi temploman yaykuqkunamanta limosnata mañakunanpaq.  Kay runam Pedrotawan Juanta temploman yaykuchkaqta rikuruspan limosnata quykunanpaq mañakuyta qallaykurqa.  Pedrom ichaqa Juanwan kuska chay runata qawarispan nirqa: “Qawawayku”, nispan.  Hinaptinmi chay runaqa paykunata qawarayarqa imallatapas quykunankuta suyaspan.  Pedroñataqmi nirqa: “Quriypas nitaq qullqiypas manam kapuwanchu, ichaqa imapas kapuqllaytam qusqayki: ¡Nazaretmanta kaq Jesucristopa sutinpiyá puriy!”, nispa.  Chaynata niruspanmi alliq* makinmanta hapiykuspan aysarirqa, hinaptinmi chay runapa chakinkuna chaylla allinyarurqa,  chaymi pawaspanraq sayariruspan puriyta qallaykurqa, hinaspam paykunawan temploman pawaykachastin yaykurqa hinaspa Diosta hatunchastin.  Llapa runakunañataqmi rikurqaku purichkaqta hinaspa Diosta hatunchachkaqta. 10  Chaymantapas riqsirurqakum, chay runaqa templopa Sumaq punku nispa sutichasqa sitiopi tiyaykuspan limosna mañakuq kasqanta. Paykunaqa chay runata ima pasarusqanwanmi admirasqallaña kaspanku ima niytapas mana atirqakuchu. 11  Chay sanoyaruq runa Pedropa hinaspa Juanpa makinta hapichkaptinraqmi llapa runakuna muspaypi hina kaspanku paykunapa kasqanman utqayllamanña* huñunakaramurqaku, chayqa karqa Salomonpa pilarniyuqkuna corredorninpim*. 12  Chayta rikuspanmi runakunata Pedro nirqa: “Israel llaqtayuq runakuna, ¿imanasqataq kaymantaqa admirasqallaña kachkankichik? ¿Imanasqataq ñuqaykutaqa qawarayawachkankiku yaqapas kikiykupa atiyniykuwan utaq Diosta servisqaykuwan kay runata purirachiymankupas hina? 13  Abuelonchik Abrahanpa, Isaacpa hinaspa Jacobpa Diosninmi serviqnin Jesusta hatuncharun, paytamiki qamkunaqa entregaykurqankichik hinaspam Pilato kachariyta munachkaptinpas qayllanpi negarqankichik. 14  Arí, qamkunaqa chuya runata hinaspa allin ruwaq runatam qipancharqankichik, hinaspam Pilatopa favorninta mañakurqankichik runa wañuchiq runata kacharipusunaykichikpaq. 15  Kawsay qukuq runatañataqmi wañurachirqankichik. Diosmi ichaqa wañusqakunapa kasqanmanta hatarirachimurqa, chaymantaqa testigom kaniku. 16  Chayraykum, kay qawasqaykichik hinaspa riqsisqaykichik wistu* runaqa Jesuspa sutinpi allinyarun sutinpi iñisqaykurayku. Arí, Jesuspi iñisqaykuwanmi kay runaqa qayllaykichikpi sanoy-sanoyña kachkan. 17  Chaywanpas wawqillaykuna, yachanim imaynam qamkunapas chaynataq kamachiqnikichik runakunapas mana yachachkaspa chaykunata ruwasqaykichikmanta. 18  Diosmi ichaqa chaynata cumplirqa Cristo* ñakarinanmanta lliw willakuqninkunawan* ñawpaqmantaraq willakusqanta. 19  Chaynaqa, huchaykichikmantayá wanakuychik hinaspa Diosman kutirikuychik huchaykichik pampachasqa kananpaq, chaynapi Jehova* Dios hawkayay tiempota qamkunaman qusunaykichikpaq, 20  hinaspa qamkunapaq akllasqan Cristota kachamunanpaq, payqariki Jesusmi. 21  Payqa hanaq pachapim hinalla kanan tukuy ima allichasqa kanan tiempokama, chayna kananmantam Diosqa nirqaña ñawpaq tiempopi willakuqninkunawan. 22  Moisespas nirqam: ‘Jehova Diosnikichikmi castaykichikmanta rikurichipusunkichik Diosmanta ñuqa hina willakuqta*. Uyarinaykichikmi paypa tukuy ima nisusqaykichikta. 23  Chiqaptapunim pi runapas* chay hamunanpaq kaq willakuqta mana uyariqqa qamkuna ukumanta pasaypaq chinkachisqa kanqa’, nispa. 24  Diosmanta llapallan willakuqkunaqa* Samuelmantapacham kay punchawkunamantaqa clarota willakurqaku. 25  Qamkunaqa kankichik Diosmanta willakuqkunapa* hinaspa ñawpa abueloykichikkunawan Diospa acuerdo* ruwasqanpa churinkunam, chay acuerdota ruwaspanmi Diosqa Abrahanta nirqa: ‘Miraynikiwanmi kay pachapi llapallan ayllukuna bendecisqa kanqa’, nispa. 26  Diosqa serviqnin Jesusta rikurirachispanmi puntata qamkunaman kachamurqa mana allin ruwasqaykichikmanta sapakamata rakisuspaykichik bendecisunaykichikpaq”, nispa.

Willakuykuna

Jesuspa tiemponpiqa kayqa karqa isqun horam, chaytaqa yupaqku inti lluqsimusqanmantapacham.
Utaq: “Wiqru”.
Utaq: “Paña”.
Utaq: “Apurawllamanña”.
Utaq: “Portalninpim”.
Utaq: “Wiqru”.
Qaway: Palabrakuna entiendenapaq listata.
Utaq: “Profetankunawan”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Profetata”. Qawaytaq: Palabrakuna entiendenapaq listata.
Utaq: “Almapas”. Qawaytaq: Palabrakuna entiendenapaq listata.
Utaq: “Profetakunaqa”.
Utaq: “Profetakunapa”.
Utaq: “Contrato”. Qawaytaq: Palabrakuna entiendenapaq listata.