Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Hechos 14:1-28

  • Iconio llaqtapi iñiqkunapa yapakusqanmanta hinaspa chay llaqtapi runakuna harkakusqankumanta (1-7)

  • Taytachakunawan Listra llaqtapi pantarusqankumanta (8-18)

  • Pablota rumiwan chuqaparuptinku mana wañusqanmanta (19, 20)

  • Iñiqkunata Pablo kallpanchasqanmanta (21-23)

  • Antioquia llaqtaman kutisqankumanta (24-28)

14  Iconio llaqtapim Pablowan Bernabeyqa judiokunapa yupaychananku wasiman* yaykuruspanku sumaqllataña rimarqaku, chaymi achkallaña judiokuna hinaspa griego nacionniyuqkuna iñikurqaku.  Mana iñikuq judiokunam ichaqa huk law nacionniyuq runakunata umacharqaku hinaspa hikutarqaku iñiqkunapa contranpi hatarinankupaq.  Chayraykum Jehova* Dios kamachiptin paykunaqa mana manchakuspa unay tiempo Diospa ancha kuyakuyninmanta willakurqaku, chay willakusqanku chiqap kasqanta qawachinankupaqñataqmi Diosqa paykunata yanaparqa milagrokunatawan admirakuypaq kaqkunata ruwanankupaq.  Llaqtapi runakunañataqmi iskayman rakinakururqaku, wakinmi judiokunaman sayapakurqaku, wakinñataqmi apostolkunaman.  Judiokunawan kamachiqninkunam huk law nacionniyuq runakunapiwan Pablotawan Bernabeyta trataparuyta munarqaku, munarqakutaqmi rumiwan chuqaparuytapas.  Chayta willaykuptinkum paykunaqa ayqikurqaku Listra hinaspa Derbe llaqtakunaman, chay llaqtakunaqa Licaonia lawpim karqa, ayqikurqakutaqmi chay llaqtakunapa muyuriqninkunamanpas.  Chaypim paykunaqa sumaq willakuymanta hinalla willakurqaku.  Listra llaqtapim nacesqanmantapacha mana haykapipas puriq suchu runa tiyachkarqa.  Paymi Pablopa rimasqanta uyarichkarqa hinaptinmi Pabloqa allinta qawaykuspan musyakururqa sanoyananpaq iñiyniyuq kasqanmanta, chaymi 10  kallpawan nirqa: “¡Sayariy!”, nispa. Hinaptinmi payqa hukta pawarispan sayarirurqa hinaspam puriyta qallaykurqa. 11  Pablopa chay ruwasqanta llapa runakuna qawaykuspankum Licaonia nisqa rimaypi kallpawan nirqaku: “¡Dioskunam runaman tikrakuruspanku ñuqanchikman uraykaramunku!”, nispa. 12  Paykunam Bernabeyta suticharqaku Zeus nispa, Pablotañataqmi aswan rimasqanrayku Hermes nispa. 13  Chaymi Zeus diospa sacerdoten torokunatawan waytamanta ruwasqa coronakunata chay llaqtapa punkunman aparqa, hinaspam llapa runakunawan kuska paykunapaq animalkunata wañuchiyta munarqa, Zeuspa templonqa llaqtaman yaykunapim karqa. 14  Apostol Bernabeywan apostol Pablo chayta yacharuspankum pachankutapas llikikuspanku llapa runapa chawpinman apurawman pasaykurqaku hinaspam kallpawan rimaspanku 15  nirqaku: “Qarikuna, ¿imanasqataq kaykunata ruwachkankichik? Ñuqaykupas qamkuna hina runallam kaniku. Ñuqaykuqa sumaq willakuytam willachkaykiku, chaynapi kay yanqa kaqkunamanta kawsaq Diosman kutirikunaykichikpaq, paymi unancharqa hanaq pachata, kay pachata, lamar quchata hinaspa chaykunapi tukuy kaqkunatapas. 16  Kawsaq Diosqa ñawpaq tiempokunapim llapallan nacionniyuq runakunata consienterqa munasqankuman hina kawsanankupaq, 17  chaywanpas payqa allinkunata ruwaspam riqsichikurqa pim kasqanta: Qamkunapaq parachimuspan hinaspa tiempollanpi chakrakunata ruruchispan, chaynapim mikunaykichikpas chaninninpi kachkan hinaspa sunquykichikpas kusisqallaña kachkan”, nispa. 18  Chaynakunata nispankupas ñaka-ñakaytam harkakurqaku llapa runakuna paykunapaq animalkunata wañuchipunankuta. 19  Antioquia hinaspa Iconio llaqtamantam judiokuna chayaramurqaku hinaspam runakunata umacharqaku Pablopa contranpi hatarinankupaq. Pablota rumiwan chuqaparuspankuñataqmi wañurusqanta piensaspanku llaqtamanta hawaman aysarurqaku. 20  Pablom ichaqa llapa iñiqkuna muyuriqninpi huñunakuruptinku hatarirurqa hinaspam llaqtaman yaykurqa, paqarinnintin punchawñataqmi Bernabeywan Derbe llaqtamanña rirqa. 21  Chay llaqtapi sumaq willakuymanta willakuruspanku hinaspa achka runakunata iñikunankupaq yanaparuspankum kutirqaku Listraman, Iconioman chaynataq Antioquiaman. 22  Chay llaqtakunapim paykunaqa iñiqkunata yanaparqaku iñiyninkupi hinalla allin kanankupaq, hinaspam kaynata kallpancharqaku: “Achka sasachakuykunawan ñakarispam Diospa munaychakuyninmanqa* yaykunanchik”, nispanku. 23  Chaymantapas sapa sitiopi huñunakuq iñiqkunapaqmi* punta apaqkunata* akllapurqaku, chaymantam ayunaspa Diosta mañakurqaku hinaspam iñiqkunapi chay punta apaqkunata* Jehova Diospa makinman churarqaku paypi iñikusqankurayku. 24  Chaymantam paykunaqa Pisidia lawninta rispanku Panfilia lawman chayarurqaku, 25  Perga llaqtapi Diospa palabranmanta willakuruspankum uraykurqaku Atalia llaqtaman. 26  Chaymantam buquepi rirqaku Antioquia llaqtaman, chay llaqtapim iñiqkuna ñawpaqtaraq Diosta mañakurqaku chay tukuramusqanku llamkaypi paykunata yanapaykunanpaq. 27  Chay llaqtaman chayaruspankum iñiqkunata* huñururqaku hinaspankum willarqaku paykunata servichikuspa Diospa tukuy ima ruwasqanmanta, willarqakutaqmi huk law nacionniyuq runakunapas iñikunankupaq Dios punkuta kichaykusqanmanta. 28  Chaypim iñiqkunawan kuska unay tiempo karqaku.

Willakuykuna

Kaypiqa nichkan: “Sinagoga”, nispam. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Gobiernonmanqa”. Qawaytaq: Palabrakuna entiendenapaq listata.
Utaq: “Congregacionkunapaqmi”. Qawaytaq: Palabrakuna entiendenapaq listata.
Utaq: “Ancianokunata”. Qawaytaq: Palabrakuna entiendenapaq listata.
Utaq: “Ancianokunata”.
Utaq: “Congregacionta”.