Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Hechos 12:1-25

  • Santiagota wañuchisqankumanta hinaspa Pedrota presochasqankumanta (1-5)

  • Pedrota angel librasqanmanta (6-19)

  • Herodesta angel castigasqanmanta (20-25)

12  Chay tiempollapim kamachiq Herodes* wakin iñiqkunata* ñakarichiyta qallaykurqa.  Juanpa wawqin Santiagotapas espadawanmi wañurachirqa.  Chay ruwasqan judiokunapa gustonpaq kasqanta qawaspanmi Pedrotapas presochanankupaq kamachirqa. (Chayqa karqa mana levadurayuq tanta nisqa fiesta punchawkunapim).  Pedrota hapirachimuspanmi carcelman churarurqa, hinaspam tawaman rakinasqa chunka suqtayuq soldadokunawan turnonpi cuidachirqa. Pascua* fiesta pasaytam Herodesqa runakunapa qayllanman Pedrota hurqumuyta munarqa.  Pedro carcelpi presochasqa kachkaptinmi iñiqkuna* paypaq tukuy sunqunkuwan Diosta mañakuchkarqaku.  Herodesmi Pedrota runakunapa qayllanman hurqumunanpaq kachkarqa, Pedroñataqmi chay tuta puñuchkarqa iskay soldadokunapa chawpinpi iskay cadenawan watasqa, punkupi kaq soldadokunañataqmi carcelta cuidachkarqaku.  Chaypim Jehova* Diospa angelnin sayachkaq rikurirurqa, carcelpi cuartotapas achkim kanchaykurqa. Chay angelmi Pedrota waqtanmanta kuyuchispan rikcharachirqa, hinaspam nirqa: “¡Utqayman* hatariy!”, nispan. Hinaptinmi makinmanta cadenakuna wichirurqa.  Angelqa nirqataqmi: “Pachakuy hinaspa usutakuy”, nispa. Chaynatamá Pedroqa ruwarqa, hinaptinmi angelqa kaynatawanraq nirqa: “Hawan pachaykita hinakuspayki qatiway”, nispa.  Hinaptinmi Pedroqa chaymanta lluqsispan angelta qatirqa, ichaqa manam musyakurqachu chay pasakusqan chiqap kasqanmantaqa, payqa piensarqam musquyninpi hina qawasqanta. 10  Iskay sitiopim karqa cuidaq soldadokuna, chay iskaynin sitiota pasaruspankum llaqtaman lluqsiq fierro punkuman chayarurqaku, hinaptinmi chay punku kikillanmanta kichakuykurqa. Lluqsiruspankuñataqmi callentakama richkarqaku, hinaptillanmi chay angelqa Pedromanta rakikururqa. 11  Pedroñataqmi imam pasasqanmanta musyakuspan nirqa: “Kunanqa chiqaptapunim yacharuni angelninta Jehova Dios kachamuspan Herodespa makinmanta libraykuwasqanta, yacharunitaqmi imapas pasawananta judiokunapa munasqankumantapas libraykuwasqanta”, nispa. 12  Musyakusqan qipatañataqmi rirqa Mariapa wasinman, Mariaqa karqa Marcoswan sutichasqa Juanpa mamanmi. Chaypim achkallaña runakuna huñunakuruspanku Diosta mañakuchkarqaku. 13  Hawa punkuta Pedro takaykuptinmi Rode sutiyuq sirvienta punku qawaq lluqsirqa. 14  Rimasqanpi Pedro kasqanta musyaruspanmi anchallataña kusikuspan punkutapas mana kichaspan ukuman kallpaylla* yaykurqa, hinaspam willakurqa punkupi Pedro kasqanta. 15  Chaypi kaqkunañataqmi nirqaku: “Locayarunkichá”, nispanku. Payñataqmi yaqaña imanakurqapas “Pedrom” nispan. Hinaptinmi paykunaqa nirqaku: “Angelmi*”, nispanku. 16  Pedroñataqmi punkuta hinalla takapayarqa. Hinaptinmi kichaykurqaku, hinaspam payta rikuruspanku kusikuymanta mana imanakuytapas atirqakuchu. 17  Pedrom ichaqa makinwan señaschaspan upallanankupaq nirqa. Hinaspam carcelmanta Jehova Dios imayna hurquramusqanmanta lliwta willakurqa, nirqataqmi: “Kaykunatayá willamuychik Santiagoman hinaspa llapa iñiqkunamanpas”, nispa. Chaymantañataqmi lluqsiruspan huk lawman pasakurqa. 18  Achikyaruptinñataqmi soldadokuna llumpay chaqwapi karqaku Pedro chinkarusqanmanta tapunakuspanku. 19  Hinaptinmi Herodesqa suma-sumaqta maskarqa, mana tarispanmi soldadokunata alli-allinta tapurqa hinaspam kamachirqa castigasqa kanankupaq, chaymantam Herodesqa Judeamanta Cesareaman rirqa hinaspam huk tiempo chaypi karqa. 20  Kamachiq Herodesqa peleaytam munachkarqa Tiro hinaspa Sidon llaqtakunapa contranpi. Chaymi chay llaqtayuqkunaqa huk sunqulla Herodespata rirqaku, hinaspam wasinmanta cuentallikuq Blasto sutiyuq runata yanapanankupaq arí nirachispanku Herodesta mañakurqaku paykunawan hawkalla kanankupaq, chay llaqtayuqkunaqa Herodespa kamachisqan allpapi wiñaq kawsaytam mikuqku. 21  Huk punchawmi Herodesqa kamachiq kanan pachawan pachakururqa, hinaspam juzgana sitiopi tiyaykuspan llapa runakuna uyarinankupaq rimayta qallaykurqa. 22  Hinaptinmi chaypi kaq huñunasqa llapa runakunañataq qaparispa nirqaku: “¡Diosmi rimachkan manam runachu!”, nispanku. 23  Hinaptinmi Diosta mana hatunchasqanrayku Herodestaqa chay ratollapi Jehova Diospa angelnin castigarurqa, chaymi urukunapa mikusqan wañururqa. 24  Jehova Diospa palabranñataqmi tukuy hinastinpi willakusqa hinaspa chiqichisqa karqa. 25  Bernabeywan Sauloñataqmi Jerusalenmanta kutikurqaku Marcoswan sutichasqa Juanta pusarikuspanku, kutikurqakuqa tukuy imapi yanapakuyta tukuruspankuñam.

Willakuykuna

Qaway: Palabrakuna entiendenapaq listata.
Utaq: “Congregacionpi wakinta”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Congregacionkuna”.
Qaway: Palabrakuna entiendenapaq listata.
Utaq: “Apurawman”.
Utaq: “Raskiylla”.
Kaypiqa nichkan: “Angelninmi”, nispam.