Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Hechos 11:1-30

  • Apostolkunaman Pedropa willasqanmanta (1-18)

  • Saulo hinaspa Bernabey Antioquia llaqtapi kasqankumanta (19-26)

    • Iñiqkunata “Cristopa qatiqnin” nispa chayllaraq sutichasqankumanta (26)

  • Muchuy kananmanta Agabo sutiyuq runapa willakusqan (27-30)

11  Judeapi kaq iñiqkunam apostolkunapiwan uyarirurqaku huk law nacionniyuq runakunapas Diospa palabran chaskikusqankuta.  Hinaptinmi Jerusalenman Pedro siqaruptin, ‘qari kayninkutam señalakunanku’ niq runakuna Pedrowan atipanakuyta qallaykurqaku.  Paykunam nirqaku: “Mana señalasqa runakunapa wasinman yaykuruspaykim qamqa paykunawan mikurqanki”, nispa.  Hinaptinmi Pedroqa tukuy ima pasasqanmanta paykunaman kaynata willarqa:  “Jope llaqtapim Diosta mañakuchkarqani, chaymi musquypi hina qawaspay rikurqani linomanta hatun tela hina tawan puntanmanta warkusqa hanaq pachamanta uraykamuchkaqta, chayqa uraykamurqa ñuqapa kasqaymanpunim.  Chaypa ukunta sumaqta qawaspaymi rikurqani kay pachapi tawa chakiyuq animalkunata, purun animalkunata, qasqunpa puriq animalkunata chaynataq alton pawaq animalkunatapas.  Uyarirqanitaqmi: ‘¡Hatariy Pedro! Chayta nakaspayki mikuy’, nimuwasqantapas.  Ñuqañataqmi nirqani: ‘Manapunim chaytaqa ruwaymanchu señor, ñuqallayqa manam haykapillapas mikurqanichu imapas qachachasqa* kaqkunatawan millakuypaq kaqkunataqa’, nispay.  Hinaptinmi hanaq pachamanta huktawan nimurqa: ‘Diospa chuyanchasqan kaqkunataqa amañayá “qachachasqam*” niyñachu’, nispa. 10  Chaymantapas huktawanraqmi rimamuqta uyarirqani, hinaptinmi lliw chaykunaqa hanaq pachaman kaqlla huqarisqa karqa. 11  Chay ratollam Cesarea llaqtamanta maskaqniy hamuq kimsa qarikuna samapakusqayku wasipa punkunpi sayachkasqaku. 12  Hinaptinmi Diospa espiritun niwarqa ama imamantapas iskayrayaspa paykunawan rinaypaq. Ñuqawantaqmi rirqaku kay suqta wawqikunapas hinaspam llapayku chay runapa wasinman yaykurqaniku. 13  Paymi willawarqaku wasinpi sayachkaq angel rikuriruspan kayna nisqanmanta: ‘Jope llaqtaman qarikunata kachaspaykiyá Pedrowan sutichasqa Simonta qayachimuy, 14  paymi nisunki qampas hinaspa wasikipi lliw kaqkunapas imata ruwaspa salvasqa kanaykichikmanta’, nispa. 15  Rimayta qallaykuptiyñataqmi chuya espiritu* paykunaman huntaykurqa imaynam ñuqanchikmanpas qallariypi huntaykuwasqanchikman hina. 16  Chaymi yuyarirurqani señorninchikpa nisqanta, payqa sapa kutim nirqa: ‘Juanqariki yakuwanmi bautizarqa*, qamkunam ichaqa chuya espirituwan bautizasqa kankichik’, nispa. 17  Jesucristopi iñiqkunaqa chaskirqanchikmi Diospa mana imallapaq qusqanta, paykunapas ñuqanchik hina chaskichkaptinkuqa, ¿pitaq ñuqaqa karqani Diosta harkakunaypaqqa?”, nispa. 18  Chaykunata uyariruspankum paykunaqa acuerdopiña karqaku*, hinaspam Diosta hatunchaspanku nirqaku: “Chaynaqa, ¡Diosqa munanmi huk law nacionniyuq runakunapas huchankumanta wanakuspa kawsanankuta!”, nispanku. 19  Estebanta wañuchisqanku qipata ñakariy kasqanwanmi kayman-chayman chiqichisqa kaqkuna chayarurqaku Feniciakama, chayarurqakutaqmi Chipremanpas hinaspa Antioquiamanpas, paykunaqa judio runakunallamanmi Diospa palabranmanta willakurqaku. 20  Chipremanta hinaspa Cirenemanta wakin iñiqkunam ichaqa Antioquiaman chayaruspanku griego rimaq runakunaman señor Jesusmanta sumaq willakuyta willakurqaku. 21  Chaymantapas Jehova* Diosmi paykunawan karqa, achkallaña runakunapas iñikuspankum señorninchikman kutirikurqaku. 22  Paykunamanta Jerusalenpi iñiqkuna* yacharuspankum Bernabeyta Antioquiakama kacharqaku. 23  Paykunaman Bernabey chayaruspanmi Diospa ancha kuyakuyninta chaskisqankuta qawaspan kusikurqa, hinaspam llapallanta kallpancharqa tukuy sunqunkuwan kallpanchakuspanku señormanta mana rakikunankupaq. 24  Bernabeyqa karqa chuya espiritupa huntasqan iñiyniyuq allin runam. Chayraykum achkallaña runakuna señorman iñikurqaku. 25  Chaymantam Bernabeyqa Tarso llaqtaman rirqa Saulota maskaq. 26  Tariruspanñataqmi Antioquiaman pusarqa. Hinaptinmi paykunaqa iñiqkunawan* watantin huñunakurqaku hinaspam achkallaña runakunata yachachirqaku. Antioquiapim iñiqkunata Diospa yanapakuyninwan “Cristopa qatiqnin” nispa chayllaraq suticharqaku. 27  Chay punchawkunam Diosmanta willakuqkuna* Jerusalenmanta Antioquiaman rirqaku. 28  Hukninpa sutinmi karqa Agabo, paymi sayarispan chuya espiritu yanapaptin willakurqa enteron pachapi muchuy kananmanta. Arí, chaynamá karqa Claudio sutiyuq runapa tiemponpi. 29  Chaymi iñiqkunaqa tantearurqaku sapakama atisqankuman hina Judeapi yachaq* iñiqkunaman yanapakuyta apachinankupaq. 30  Chaynapim yanapakuyninkuta iñiqkunapi punta apaqkunaman* apachirqaku Bernabeywan hinaspa Saulowan.

Willakuykuna

Utaq: “Qanrachasqa”.
Utaq: “Qanrachasqam”.
Utaq: “Diospa atiynin”. Qawaytaq: Palabrakuna entiendenapaq listata.
Utaq: “Yakuwan challpurqa”.
Kaypiqa nichkan: “Upallarurqaku”, nispam.
Qaway: Palabrakuna entiendenapaq listata.
Utaq: “Congregacionkuna”. Qawaytaq: Palabrakuna entiendenapaq listata.
Utaq: “Congregacionwan”.
Utaq: “Profetakuna”. Qawaytaq: Palabrakuna entiendenapaq listata.
Utaq: “Tiyaq”.
Utaq: “Ancianokunaman”. Qawaytaq: Palabrakuna entiendenapaq listata.