Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Hebreos 6:1-20

  • Diosta serviypi yuyayniyuqña kanapaq kallpanchakunamanta (1-3)

  • Diospa churinta yapamanta qirupi warkuqkunamanta (4-8)

  • Suyasqanchikta mana iskayrayaspa suyanamanta (9-12)

  • Diospa promesankuna cumplikunanmanta (13-20)

    • Diospa promesan hinaspa juramento ruwasqan mana cambiasqa kasqanmanta (17, 18)

6  Chaynaqa Cristomanta puntapi yachasqanchik yachachikuykunallawanraq manaña kasqanchikraykuyá yuyayniyuqña kasunchik, yapatawanqa amañayá chay yachachikuykunallataqa yachasunchikchu, amañayá huktawanqa yachasunchu mana valeq ruwasqanchikkunamanta wanakuymantaqa, Diospi iñiymantaqa,  bautizakunapaq* yachachikuymantaqa, hukkunapa hawanman makita churaymantaqa, wañuqkuna kawsarimunanmantaqa hinaspa wiñaypaq juiciomantapas.  Dios munaptinqa yuyayniyuqmi kasunchik.  Huk kutipi achkiy chaskiqkuna, hanaq pachamanta regalota chaskiqkuna, chuya espirituta* chaskiqkuna,  chaynataq Diospa sumaq palabranta hinaspa hamuq tiempopi bendicionkunatapas* chaskiqkuna  iñiyninkumanta karunchakuruptinkuqa manañam pipas atinmanñachu huchankumanta wanakunankupaq yanapaytaqa. Paykunaqa Diospa churintam yapamanta qirupi* warkuruspanku pinqayman churachkanku.  Chakrapas para chayamuptinmi Diosmanta bendicionta chaskin, hinaspam kawsayta wiñachin tarpuqninkuna mikunanpaq,  kichkakunata hinaspa kichkasapa qurakunata wiñachimuspanmi ichaqa chakraqa saqisqa, chaymantapas chay chakraqa ñakasqa kananpaqñam kachkan, chaymantañataqmi kañasqa kanqa.  Kuyasqay wawqi-panillaykuna, chaykunata rimachkaspapas iñiyninkuta saqiruq runakunamanta aswan allin kasqaykichikmantaqa manam iskayrayanikuchu, manataqmi iskayrayanikuchu salvasqa kanaykichikpaq tukuy ima ruwasqaykichikmantapas. 10  Diosqa manam mana allin ruwaqchu llamkasqaykichikta hinaspa sutin kuyasqaykichikrayku runankunata* servisqaykichikta qunqarunanpaqqa, kunanpas runankunataqa chaynatam servichkankichik. 11  Ñuqaykuqa munachkanikum qallariymantapacha allin llamkaq kasqaykichikman hina kunanpas kanaykichikta, chaynapi imam suyasqaykichikta mana iskayrayaspa tukupaykama suyanaykichikpaq, 12  chayna kaspaqa manam qillachu kankichik, aswanmi iñiywan hinaspa pacienciawan promesakuna chaskiqkunapa ruwasqanta hina ruwankichik. 13  Abrahanman prometespanmi Diosqa, paymanta aswan munayniyuq mana pipas kasqanrayku kikinpa sutinpi jurarqa. 14  Nirqam: “Bendecisqaykipunim hinaspa mirachisqaykipunim”, nispa. 15  Chaynapim Abrahanqa pacienciawan suyaspan, Diospa prometesqanta chaskirqa. 16  Runakunaqa paykunamanta aswan munayniyuqpa sutinpim juranku, jurasqankum qawachin rimasqankuman hina ruwanankuta, chaymi manaña atipanakunkuchu. 17  Chaynallataqmi Dioswanpas karqa, payqa munaynin mana cambiaq kasqanmanta promesankuna chaskiqkunaman qawachinanpaqmi juraspan garantizarqa, 18  chaynapi haykam Diospi amparakuqkuna paypa promesanwan hinaspa jurasqanwan allin kallpanchasqa kaspanchik suyasqanchikpi allinta hapipakunapaq, Diosqa promesa ruwasqanta hinaspa jurasqanta mana cambiasqanraykum mana haykapipas llullakunchu. 19  Chay suyasqanchikqa ñuqanchikpaqmi* yaqa buqueta sayachiq llasaq fierro hina, mana imapa kuyurichinan hinaspa allin takyasqa kachkan, chay suyasqanchikmi yanapawanchik templopi rakinaq rakta telapa qipanman yaykunapaq, 20  chaymanmi llapanchikmantapas puntata Jesus yaykurun ñanta allichapuwananchikpaq hinaspa kichapuwananchikpaq, payqa wiñaypaqmi Melquisedec hina sacerdotekunapa jefen rikurirun.

Willakuykuna

Utaq: “Yakupi challpukunapaq”.
Utaq: “Diospa atiyninta”. Qawaytaq: Palabrakuna entiendenapaq listata.
Kaypiqa nichkan: “Atiykunatapas”, nispam.
Utaq: “Kaspipi”. Qawaytaq: Palabrakuna entiendenapaq listata.
“Runankunata”, utaq: “Chuya runakunata”.
Utaq: “Almanchikpaqmi”. Qawaytaq: Palabrakuna entiendenapaq listata.