Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Hebreos 4:1-16

  • Yanqataq Diospa samanan punchawman mana yaykuchwanchu (1-10)

  • Diospa samanan punchawman yaykunapaq kallpanchakunamanta (11-13)

    • Diospa palabranqa kawsaq kasqanmanta (12)

  • Jesusqa ancha riqsisqa sacerdotekunapa jefen kasqanmanta (14-16)

4  Diospa samanan punchawman yaykunapaq promesa hinallaraq kachkaptinqa rikchan-rikchanllayá kasun, yanqañataq mayqinnikichikpas chay punchawman mana yaykunaykichikpaq hina kawaqchik.  Abuelonchikkunaman sumaq willakuyta willasqankuman hinam ñuqanchikmanpas willawarqanchik. Chay uyarisqanku palabrakunatam abuelonchikkunaqa mana kasukurqakuchu, kasukuq runakunapa iñisqankuman hina mana iñisqankurayku.  Ñuqanchik iñiyniyuqkunaqa samana punchawmanmi yaykunchik. Paykunamantam* ichaqa Diosqa kaynata nirqa: “Piñakuyniypim jurarqani: ‘Samanay punchawmanqa manam yaykunqakuchu’”, nispay. Chaynatam nirqa ruwasqankunata tukuruspan runakuna rikurimusqanmantapacha* samachkaspanpas.  Diospa qillqanpa huk kaqnin partenpim qanchis kaq punchawmanta kaynata nirqa: “Qanchis kaq punchawpim tukuy ruwasqanmanta Dios samarqa”, nispa.  Chaymantapas nirqam: “Samanay punchawmanqa manam yaykunqakuchu”, nispa.  Chaynaqa, kachkanraqmi wakin runakunapas samana punchawman yaykunankupaq tiempo, chaymantapas sumaq willakuymanta punta uyariqkunaqa mana kasukusqankuraykum mana yaykurqakuchu, chaymi  unay tiempomanta Davidpa qillqasqan salmopi Dios nirqa: “Kunan rimasqayta uyarispaqa, amayá sunquykichikta rumiyarachiychikchu”, nispa. Chaymantaqa ñawpaqtaraqmi kay cartapi rimamuchkani. Chaymi Diosqa kaqllamanta “kunan” nispa sutichasqa tiempomanta riman.  Sichu Josuey paykunata yaykuchinman karqa chay samananku punchawman, hinaptinqa manañachiki huk punchawmantaqa Diosqa rimanmanñachu karqa.  Chaynaqa, kachkanraqmi Diospa llaqtanpaq samana punchawqa. 10  Diospa samanan punchawman yaykuq runaqa llamkayninmantapas samarunñam, ruwasqankunamanta Diospa samasqanman hina. 11  Chaynaqa, tukuy atisqanchiktayá ruwasun Diospa samanan punchawman yaykunapaq, chaynapi mana kasukuqkunapa ruwasqanta pipas mana qatipakunanpaq. 12  Diospa palabranqa kawsachkanmi hinaspa atiyniyuqmi. Iskay lawnin filoyuq espadamantapas aswan kuchukuqraqmi. Runapa ukunkama yaykuspanmi runapa sunqunpi hinaspa hawanpi imayna kasqantapas riqsichin, yaykuntaqmi tullunkama hinaspa chilinankama, chaymantapas piensasqankunatawan sunqunpa munapayasqankunatam riqsichin. 13  Imapas unanchasqa kaqkunaqa manam Diosmantaqa pakasqachu kachkan, aswanmi tukuy imapas paypa qawasqallan kachkan, paypaqqa tukuy imapas sutillam kachkan, paymanmi cuentata qusunchik. 14  Ancha riqsisqa sacerdotekunapa jefen Diospa churin Jesusmi kapuwachkanchik, paymi hanaq pachaman yaykurqa, chayraykuyá paypi iñisqanchikmanta hinalla willakusun. 15  Kapuwaqninchik sacerdotekunapa jefenqa manam pantaq kasqanchikmanta mana llakipayakuqchu, payqa ñuqanchik hinam tukuy imapi ñakarichisqa karqa, ichaqa manam huchallikurqachu. 16  Chaynaqa, ancha kuyawaqninchik Diospa kamachinanpaq tiyananmanyá* asuykusunchik, hinaspayá mana recelaspa payta mañakusunchik chaynapi yanapakuyta necesitasqanchik tiempopi llakipayasqa hinaspa kuyapayasqa kananchikpaq.

Willakuykuna

Kaypiqa rimachkan mana kasukuq judiokunamantam. Qaway Salmo 95:8.
Kaypiqa rimachkan Adanpawan Evapa wawa-churinkunamantam.
Utaq: “Trononmanyá”.