Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Hebreos 10:1-39

  • Animalkunata wañuchispa ofrecesqanku yanqapaq kasqanmanta (1-4)

    • Moisespa leyninqa llantuylla kasqanmanta (1)

  • Cristo huk kutillata wiñaypaq wañukusqanmanta (5-18)

  • Kawsakuyman pusaq musuq ñanmanta (19-25)

    • Huñunakuyman riyta mana saqinamanta (24, 25)

  • Yachachkaspa kikinchikmanta huchaman mana urmaykunamanta (26-31)

  • Aguantanapaq iñiyniyuq hinaspa confiakuq kanamanta (32-39)

10  Moisespa leyninqa hamuq allin kaqkunapa llantuynin hinallam, manam allin kaqkunachu, chaymantapas Moisespa leyninqa manam Diosman asuykuqkunataqa allintaqa chuyanchanchu animalkunata wañuchispa watan-watan qusqankuwanqa.  Runakunapa huchanta chay wañuchisqanku animalkuna chuyanchaptinqa manañachiki animalkunataqa sapa kutiqa wañuchinañachu kanman Diosman qunapaqqa, Diosta serviqkunapas concienciankupichiki manaña huchayuq kanmanku.  Ichaqa chay animalkuna wañuchisqankuqa huchayuq kasqankuta watan-watan yuyarinankupaqmi.  Torokunapa hinaspa chivatokunapa yawarninqa manam atinmanchu hucha chinkachiytaqa.  Chaymi Cristo kay pachaman hamuspan Diosta nirqa: “‘Wañuchisqa animalkunataqa manam munarqankichu nitaq ofrendakunatapas, aswanqa cuerpoytam alistarqanki.  Manataqmi kañasqa animalkunatapas chaskirqankichu nitaq hucharayku ofrendakunatapas’, nispa.  Hinaspam nirqani: ‘Dioslláy, wankusqa qillqapi ñuqamanta qillqasqa kasqanman hinam ñuqaqa hamurqani qampa munaynikita ruwanaypaq’”, nispa.  Puntatam nirqani: “Manam munarqankichu nitaq chaskirqankichu wañuchisqa animalkunata, ofrendakunata, kañasqa animalkunata nitaq hucharayku ofrendakunatapas”, nispa. Chaykunata ruwanapaqmi Moisespa leynin kamachirqa.  Chaynata niruspaymi nirqani: “Hamurqaniqa munasqaykita ruwanaypaqmi”, nispa. Paymi ñawpaq kaqta hurqun qipa kaqta churananpaq. 10  Diospa chayna “munayninman” hinam ñuqanchikqa chuyanchasqa karqanchik, chaynaqa karqanchik Jesucristo cuerponta huk kutillata wiñaypaq qusqanwanmi. 11  Chaymantapas llapallan sacerdotekunam sapa punchaw ruwayninkuta ruwaspanku Diosta serviqku, hinaspapas animalkunata wañuchispam Diosman sapa kuti quqku. Chay ruwasqankuqa manam huchata pasaypaq chinkachiytaqa atirqachu. 12  Jesusmi ichaqa hucharayku ofrecekuspan wiñaypaqña huk kutillata wañukurqa, hinaspam Diospa alliqninpi* tiyaykurqa. 13  Chaymantapacham suyachkan chakinpa sarupakunanta hina enemigonkunata Dios churaykunankama. 14  Chaynatam huk kutillata vidanta qusqanwan Cristoqa wiñaypaq chuyancharun sapaqchasqa kaqkunata. 15  Chuya espiritupas* willawanchikmi kaynata nispan: 16  “Jehova* Diosmi nin: ‘Chay punchawkuna qipatam paykunawan acuerdota* ruwasaq. Kamachikuyniykunatam sunqunkupi churasaq, qillqasaqtaqmi yuyayninkupipas’”, nispa. 17  Nintaqmi: “Huchankutapas manañam yuyarisaqchu nitaqmi mana allin ruwasqankutapas”, nispa. 18  Huchakuna pampachasqaña kaptinqa manañam hucharayku ofrendakunaqa kanñachu. 19  Wawqi-panillaykuna, Jesuspa yawarninwanmi mana manchakuspa chay chuyay-chuyay cuartomanqa yaykunchik. 20  Payqa rakta telata kichaykuspa pasachkaq hinam kawsakuyman pusawaqninchik musuq ñanta kichaykapuwanchik, chay telaqa cuerponmi. 21  Kapuwachkanchiktaqmi Diospa wasinpi ancha riqsisqa sacerdotepas. 22  Hinaptinqa Diosmanyá asuykusun tukuy sunqunchikwan hinaspa iñisqanchikmanta imaniraqllatapas mana iskayrayaspa. Mana allin conciencianchikqa yawarwan challasqa kaspanmi chuyanchasqaña kachkan allin sunquyuqña kananchikpaq, cuerponchikpas chuya yakuwanmi mayllasqaña kachkan. 23  Chaynaqa ama manchakuspayá imam suyasqanchikmanta hinalla willakusun. Prometewaqninchikqa nisqanman hinam ruwanqapuni. 24  Chaynaqa sunqumanta kuyanakuspayá llapallanchik kallpanchanakusun kuyakuq hinaspa allin ruwaq kananchikpaq, 25  wakinkunapa costumbrasqanman hinaqa amayá huñunakuyman riytaqa saqisunchu, aswanqa Diospa punchawnin chaylla chayamunanta yachaspayá llapallanchik astawan kallpanchanakusunchik. 26  Chiqap kaq yachachikuyta imam kaqta yachachkaspaña kikinchikmantapuni huchaman qukuruptinchikqa manañam huchanchikmanta ima ofrendapas kanñachu, 27  aswanqa manchakuywan juicio suyayllañam. Diospa llumpa-llumpay piñakuyninmi chinkachinqa paypa contranpi kaqkunataqa. 28  Moisespa leyninta pipas mana kasukuq runaqa mana llakipayasqam wañun, iskay utaq kimsa testigokuna willakuptin. 29  Hinaptinqa, ¡mayna castigasqaraqchá kanqa, pipas Diospa churinta sarutyaq hinaspa chuyanchaqnin acuerdo* ruwana yawarta mana valorniyuqta qawaq runaqa, chaynataq ancha kuyawaqninchik Diospa espirituntapas mana respetaqqa! 30  Ñuqanchikqa riqsinchikmi, “ñuqam vengakusaq, ñuqataqmi mana allin ruwasqanmanta pagapusaq” niq Diostaqa. Qillqasqataqmi kachkan: “Jehova Diosmi llaqtanta juzganqa”, niqpas. 31  Hinaptinqa, ¡mayna manchakuypaqmi kawsaq Diospa makinman wichiykuyqa! 32  Amayá qunqaychikchu chiqap yachachikuyta chaskisqaykichik punchawkunataqa. Qamkunaqa llumpay ñakariykunapi tarikuchkaspapas allintam sayarqankichik. 33  Wakin kutipiqa llapallan runakunapa qayllanpim kamisqa hinaspa ñakarichisqa karqankichik, wakinpiñataqmi ñakariqkunapa ñakariqmasin karqankichik. 34  Qamkunaqa presochasqa kaqkunamantam llakipayarikurqankichik, chaymantapas imaykichikta qichusuptikichikpas kusikuywanmi aguantarqankichik. Chaynaqa karqankichik qamkunapaq aswan allin hinaspa wiñaypaq kaqkuna kapususqaykichikta yachasqaykichikraykum. 35  Chaynaqa, hinallayá mana manchakuspa rimaychik, chaynapim achka bendicionkunata chaskinkichik. 36  Qamkunaqa hinallam ñakariykunata aguantanaykichik, chaynapi Diospa munasqanta ruwaruspaykichik paypa prometesqankunata chaskinaykichikpaq. 37  “Manapas unaymantam” “hamuqqa chayaramunqa, payqa manam unamunqachu”. 38  “Allin ruwaq runaqa iñiyninraykum kawsanqa” “qipaman kutiptinmi ichaqa mana kusikusaqchu”. 39  Ñuqanchikqa manam chinkachisqa kanankupaq qipaman kutiqkunachu kanchik, aswanqa salvasqa kananchikpaq iñiyniyuqkunam.

Willakuykuna

Utaq: “Pañanpi”.
Utaq: “Diospa atiyninpas”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Contratota”. Qawaytaq: Palabrakuna entiendenapaq listata.
Utaq: “Contrato”.