Galatas 5:1-26

  • Cristopi iñiqkunaqa manaña sirviente kasqanmanta (1-15)

  • Espiritupa munasqanman hina kawsakuymanta (16-26)

    • Aychapa munasqan ruwaykunamanta (19-21)

    • Chuya espiritu runakunata imayna kawsachisqanmanta (22, 23)

5  Chayna mana sirviente kanapaqmi Cristo librawarqanchik. Chaynaqa allintayá takyaychik, amañayá kutiychikchu sirviente hina sasallaña kawsaymanqa.  Ñuqa Pablom nichkaykichik: Qari kaynikichikta señalachikuptikichikqa Cristopa ruwasqanqa manam imapipas yanapasunkichikchu.  Qari kayninta señalachikuq lliw runakunatam kaqmanta nini, Moisespa llapallan leyninta kasukunankupaq kasqankuta.  Sichu qamkuna leypa nisqanta ruwaspa Diospaq mana huchayuqña kayta munachkankichik hinaspaqa Cristomantam rakisqa kachkankichik, karunchasqataqmi kachkankichik paypa hatun kuyakuyninmantapas.  Ñuqanchikmi ichaqa Diospa espiritunrayku hinaspa iñiyrayku ganasllawanña suyachkanchik Diospaq mana huchayuqña kayta.  Cristo Jesuswan huklla kaqkunapaqqa manam imananchu señalasqa utaq mana señalasqa kaypas, valorniyuqqa iñiyniyuq kaymi, chay iñiyqa kuyakuywan ruwaypim qawakun.  Qamkunaqa allintam kallpachkarqankichik*, hinaptinqa, ¿pitaq sasachasurqankichik chiqap kaqta manaña kasukunaykichikpaqqa?  Chayna yachachikuyqa manam qayasuqnikichik Diosmantachu hamun.  Aslla levaduram tanta ruwana achka masata puquchin. 10  Ñuqaqa manam iskayrayanichu qamkunapa utaq señorninchikwan huklla kaqkunapa ñuqa hina piensanaykichikmantaqa, ichaqa pi kaspanpas merecesqan castigotam chaskinqa sasachasuqnikichik runaqa. 11  Wawqi-panillaykuna, sichu ñuqa hinallaraq willakuyman qari kayninku señalachikunankumanta, hinaptinqa manam qatikachasqachu kayman, manataqmi qirupi* Cristopa wañusqanmanta willakusqaypas runakunataqa piñachinmanchu. 12  Ñuqaqa munaymanmi, qari kayninku señalachikuymanta rimaspa qamkunata urmachiy munaq runakuna qari kayninkuta lliwtapas hurqukurunankuta. 13  Wawqi-panillaykuna qamkunaqa mana sirviente kanaykichikpaqmi qayasqa karqankichik, ichaqa amayá mana sirviente kasqaykichiktaqa servichikuychikchu aychapa munasqankunata ruwanaykichikpaqqa, aswanqa kuyakuywanyá sapakama yanapanakuychik. 14  Moisespa llapallan leyninqa huk kamachikuyllapim hukllawasqa kachkan, chay kamachikuymi nin: “Runamasikitam kuyanayki kikikita hina”, nispa. 15  Ichaqa, sichu kikikichikpura hinalla mana allinta ruwanakuchkankichik hinaspa ñakarichinakuchkankichik hinaspaqa yanqañataq kikikichikpura tukunakuruwaqchik. 16  Chaynaqa, nimuykichikmi: Hinallayá kawsaychik espiritupa munasqanman hina, hinaspaqa manam aychapa ima munasqantapas ruwankichikchu. 17  Aychapa munasqanqa espiritupa contranpim kachkan, espiritupa munasqanñataqmi aychapa contranpi kachkan. Iskayninkum mana tupankuchu, chaymi munasqaykichik ruwaytaqa mana atinkichikchu. 18  Chaymantapas, espirituman hina pusasqa kaspaykichikqa manañam leypa munaychakusqanchu kankichik. 19  Aychapa munasqanman hina ruwaykunaqa sutillam qawakun, chaykunaqa kaykunam: Huchapakuykuna*, millakuypaq ruwaykuna, mana pinqakuspa mana allin ruwaykuna*, 20  taytacha-mamacha yupaychaykuna, layqa* ruwaykuna, chiqninakuykuna, liryanakuykuna, sientichinakuykuna, rabiakuykuna, mana acuerdopi churanakuykuna, rakinakuykuna, runakunapa yachachikuyninkunaman hapipakuykuna, 21  envidianakuykuna, sinkakuykuna, mana pinqakuspa kusirikuykuna hinaspa chaykunaman rikchakuq llapa mana allin ruwaykunapas. Ñawpaqpi nisqayman hinam kunanpas nimuykichik: Chaykuna ruwaqkunaqa manam Diospa munaychakuyninpiqa* kanqakuchu. 22  Chuya espirituqa* runakunatam kawsachin*: Kuyakuqta, kusisqata, hawkallata, pacienciakuqta, sumaq sunquyuqta, kuyapayakuqta, iñiyniyuqta, 23  llampu sunqullata hinaspa controlakuqta. Chaykunapa contranpiqa manam ima kamachikuypas kanchu. 24  Cristo Jesuspa kaqkunaqa aychapa munasqankunata hinaspa aychapa munapayayninkunatam qirupiña* clavowan takarunku. 25  Espirituman hina kawsaspaqa chay espirituman hinataqyá allinta purisunpas. 26  Amayá llallinakuq kanapaqqa pitapas tanqasunchu, amataq envidianakusunchu nitaq hatun tukuqqa kasunchu.

Willakuykuna

Utaq: “Raskichkarqankichik”.
Utaq: “Kaspipi”. Qawaytaq: Palabrakuna entiendenapaq listata.
Kayqa, qari kayninwan utaq warmi kayninwan millakuypaq kaqkunata ruwaymi. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Brujeria”. Qawaytaq: Palabrakuna entiendenapaq listata.
Utaq: “Gobiernonpiqa”. Qawaytaq: Palabrakuna entiendenapaq listata.
Utaq: “Diospa atiyninqa”. Qawaytaq: Palabrakuna entiendenapaq listata.
Kaypiqa nichkan: “Chuya espiritupa rurun”, nispam.
Utaq: “Kaspipiña”.