Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Filipenses 4:1-23

  • Huk sunqulla kanamanta, kusikunamanta hinaspa allin kaqkunallapi piensanamanta (1-9)

    • Imamantapas mana afanakunamanta (6, 7)

  • Filipos llaqtapi iñiqkunapa yanapasqanmanta Pablopa agradecekusqan (10-20)

  • Tukunallanpaqña qillqasqanmanta (21-23)

4  Chaynaqa kuyasqay wawqi-panillaykuna nimusqayman hinayá señorninchik servisqaykichikpi allinta takyaychik, qamkunataqa kuyaykichikmi, llakikuykichikmi chaymantapas qamkunaqa anchatam kusichiwankichik, premioytaqmi* kankichikpas.  Evodia iñiqmasinchikta hinaspa Sintique iñiqmasinchiktam ruegakamuni señorninchikta servisqankupi iskayninku hukllata piensanankupaq.  Qamtapas llamkaqmasilláy, valekuykim chay paninchikkunata hinalla yanapaykunaykipaq. Paykunapas ñuqawan kuskam kallpanchakurqaku sumaq willakuymanta willakuypi, Clementewan hinaspa wakin llamkaqmasiykunawan kuskam chayta ruwarqaku. Paykunapa sutinqa Diospa libronpim* qillqasqa kachkan.  Señorninchikraykuyá tukuy tiempo kusikuychik. Huktawanraqmi nikichik: “¡Kusikuychikyá!”, nispa.  Llapallan runakunayá yachachunku entiendeq runa kasqaykichikta. Señorqa hichpallapiñam kachkan,  amayá imamantapas afanakuychikchu, aswanqa Diosmanyá lliwta willakuychik tukuy tiempo mañakuspaykichik, ruegakuspaykichik hinaspa graciasta quspaykichik,  hinaptinqa Diospa hawkayayninmi sunquykichiktawan yuyaynikichikta Cristo Jesusnintakama waqaychanqa, chay hawkayayqa runapa mana entiendey atinanmi.  Chaynaqa wawqi-panillaykuna, hinallayá piensaychik imapas chiqap kaqkunapi, imapas ancha allin kaqkunapi, imapas allin ruway kaqkunapi, imapas chuya kaqkunapi, imapas kuyanapaq kaqkunapi, imapas respetana kaqkunapi, imapas allin kaqkunapi chaynataq imapas alabanapaq kaqkunapi.  Qamkunaqa ñuqamantam tukuyta yacharqankichik, uyarirqankichik hinaspa rikurqankichik, yachachisqaytapas chaskirqankichikmi, chaykunatayá ruwaychik, hinaptinqa hawkayaypi kaq hinaspa hawkayay qukuq Diosmi qamkunawan kanqa. 10  Señorpim ancha-anchata kusikuni ñuqamanta huktawan preocupakusqaykichikmanta. Qamkunaqa ñamá ñuqamantaqa preocupakurqankichikña, ichaqa manam atirqankichikchu ima ruwaytapas. 11  Kaytaqa nichkani manam imaypas pisipuwasqanraykuchu, ñuqaqa imayna tarikuspaypas yacharunim imapas kapuqllaywan kawsakuyta. 12  Ñuqaqa yachanim mana imayuq kayta chaynataq llapa imayuq kaytapas. Imaynaña tarikuspaypas ñuqaqa yacharunim saksasqa kaytapas hinaspa yarqaymanta kaytapas, yacharunitaqmi tukuy imayuq kaytapas chaynataq mana imayuq kaytapas. 13  Dios kallpata quwaptinmi tukuy imata ruwanaypaq kallpayuq kani. 14  Chaywanpas qamkunaqa allintapunim ruwarqankichik sasachakuyniykunapi yanapaykuwaspaykichikqa. 15  Yachasqaykichikpi hinapas sumaq willakuymanta chayllaraq yacharusqaykichik qipamanqa utaq maypacha Macedonia lawmanta ripukuptiyqa, manam may lawpi iñiqkunapas* yanapawarqachu, manataqmi ñuqapa yanapayniytapas chaskikurqakuchu, aswanqa qamkunallam, qamkunaqa kankichik Filipos llaqtamantam. 16  Qamkunaqa Tesalonica llaqtapi kachkaptiypas pisipuwaqniytam apachimuwarqankichik, ichaqa manam huk kutillatachu aswanqa iskay kutitam. 17  Maskachkaniqa manam imatapas chaskikuytachu, aswanqa anchatam munachkani aswan apu kanaykichikpaq bendicionkuna kananta. 18  Ñuqapaqqa ima pisipuwaqniymantapas aswanraqmi kapuwachkan. Epafrodito iñiqmasinchikwan apachimuwasqaykichikwanmi manaña imaypas pisinñachu. Chay apachimuwasqaykichikqa miski asnaq hinaspa Diospa munasqanman hina sunqunman chayaq ofrendam. 19  Hinaptinqa tukuy kapuqniyuq kuyasqay Diosmi tukuy ima pisipususqaykichikta qamkunamanpas Cristo Jesusnintakama qusunkichik. 20  Dios taytanchikyá wiña-wiñaypaq hatunchasqa kachun. Amen. 21  Cristo Jesuspa qatiqnin Diospa runankunamanyá* llapallanman kuyakuyniyta chayaykachipuwaychik. Ñuqawan kaq iñiqkunapas kuyakuynintaqa apachimusunkichikmi. 22  Diospa llapallan runankunam* kuyakuynintaqa apachimusunkichik, aswanraqmi Roma nacionta kamachiqpa* wasinpi kaqkunaqa. 23  Señorninchik Jesucristopa ancha kuyakuyninyá imayna piensasqaykichikwan kachun.

Willakuykuna

Kaypiqa nichkan: “Coronaytaqmi”, nispam.
Kayqa manam chiqap librochu, aswanqa wiñaypaq kawsakuyta suyaqkunapa sutinta Dios yuyasqanmi.
Utaq: “Congregacionpas”. Qawaytaq: Palabrakuna entiendenapaq listata.
“Diospa runankunamanyá”, utaq: “Chuya runakunamanyá”.
“Diospa llapallan runankunam”, utaq: “Llapallan chuya runakunam”.
Kaypiqa nichkan: “Cesarpa”, nispam. Chaynatam sutichaqku Roma nacionta wakin gobiernaqkunata.