Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Filipenses 1:1-30

  • Qillqay qallarisqanmanta (1, 2)

  • Diosta Pablo agradecekusqanmanta hinaspa mañakusqanmata (3-11)

  • Sasachakuykuna kachkaptinpas sumaq willakuy aswan willasqa kasqanmanta (12-20)

  • Cristorayku kawsakunamanta, wañuspapas allinninchikpaq wañukunamanta (21-26)

  • Sumaq willakuyman hina kawsakuymanta (27-30)

1  Cristo Jesusta serviq ñuqa Pablom, Timoteopiwan qillqamuykiku Filipos llaqtapi Cristo Jesuspa qatiqnin Diospa llapallan runankunaman*, qillqamunikutaqmi iñiqkunamanta nanachikuqkunamanpas* hinaspa iñiqkunapi punta apaqkunapa yanapaqninkunamanpas*:  Qamkunapaqyá kachun taytanchik Diospa hinaspa señorninchik Jesucristopa ancha kuyakuynin chaynataq hawkayayninpas.  Qamkunamanta yuyarispaymi Diosta agradecekuni  sapa kuti tukuy sunquymanta mañakuspay. Sapa kutim kusikuywan qamkunapaq ruegakuni,  chaytaqa ruwani qallariymantapacha kunankama sumaq willakuy willasqa kananpaq yanapakusqaykichikmantam.  Ñuqaqa manam iskayrayanichu qamkunapi allin kaq ruwayta qallarichiq Diosqa, Cristo Jesuspa punchawninpi chay ruwayta lliwta tukunanmanta.  Llapallaykichikmanta chayna piensasqayqa allinpunim sunquypi kasqaykichikrayku. Qamkunaqa yanapawarqankichikmi presochasqa kaptiypas, yanapawarqankichiktaqmi sumaq willakuyta autoridadkunapa leyninwan respetachinaypaq hinaspa defiendenaypaqpas, chaynapim qamkunapas hinaspa ñuqapas Diospa ancha kuyakuyninwan yanapachikunchik.  Diosqa yachanmi llapallaykichikmanta llakikuspa Cristo Jesus hina tukuy sunqumanta kuyasqayta.  Ñuqaqa hinallam mañakuchkani qamkunapa kuyakuynikichik allin yachaywan hinaspa allin yuyaywan aswan-aswanraq wiñananpaq, 10  chaynapi imakuna aswan allin kasqanmanta yachanaykichikpaq, hinaspa Cristopa punchawninkama mana faltayuq kanaykichikpaq chaynataq pitapas ama urmachinaykichikpaq, 11  mañakuchkanitaqmi Jesucristo yanapasuptikichik allinkunata aswan-aswan ruwanaykichikpaq, chaynapi Dios hatunchasqa hinaspa alabasqa kananpaq. 12  Wawqi-panillaykuna, kayta yachanaykichiktam munani: Tukuy ima pasawasqanqa sumaq willakuy aswan willasqa kananpaqmi karqa. 13  Chaywanmi Roma nacionpi kamachiqta cuidaq soldadokuna hinaspa hukkunapas yacharunku Cristorayku preso kasqayta. 14  Chaymantapas, señorta serviq yaqa llapallan wawqi-panikunam preso kasqayta qawaspanku kallpanchasqa tarikurqaku, aswan kallpanchasqataqmi kachkanku Diospa palabranmanta mana manchakuspa willakunankupaqpas. 15  Chiqaptapunim wakinkuqa envidiakuspa hinaspa contrapi kaspanku Cristomanta willakuchkanku, wakinkum ichaqa allin sunquwan willakuchkanku. 16  Allin sunquwan Cristomanta willakuqkunaqa kuyakuq kasqankuraykum willakuchkanku, paykunaqariki yachankum sumaq willakuyta defiendenaypaq churasqa kasqayta. 17  Chay envidiakuqkunam ichaqa willakuchkanku atipanakuyta munaspanku, manam allin sunquwanchu, paykunaqa munachkankum presochasqa kasqaypi sasachawayta. 18  Ichaqa manam imananchu. Chay willakuqkuna allin sunquwan utaq mana allin sunquwan willakuptinkupas runakunaqa hinallam Cristomanta willakuyta uyarichkanku. Chaymi ñuqaqa kusikuni hinaspapas astawanraqmi kusikusaq, 19  ñuqaqa yachanim mañapuwasqaykichikwan hinaspa Jesucristoman Diospa qusqan espiritupa yanapawasqanwan salvakunayta. 20  Ñuqaqa suyachkanim hinaspapas manam iskayrayanichu imapipas mana pinqaypi kanaymantaqa, suyachkaniqa mana manchakuspa rimaq kasqaywan Cristota hatunchaytam, chaytaqa ruwasaq ñawpaqpi hatunchasqayman hinam. Ñuqaqa* hatunchasaqmi kawsaspaypas utaq wañusqaña kaspaypas. 21  Kawsaspayqa-kawsani Cristoraykum, wañuspañataqmi-wañusaq allinniypaq. 22  Sichum kay pachapiraq* kawsasaq hinaspayqa llamkaspaymi astawanraq ruwasaq, chaywanpas imam akllakunaytaqa manam willakunichu. 23  Chay iskayninmantaqa manam mayqintapas akllakuyta atinichu, ñuqaqa munanim librasqa kaspay Cristowan kayta, chaymi aswan allinqa. 24  Chaywanpas aswan allinmi qamkunarayku kay pachapiraq kayniyqa. 25  Chaykunamanta mana iskayrayaspaymi yachani kay pachapiraq kanaymanta hinaspa llapallaykichikwanraq kanaymantapas, chayqa kanqa ñawparinaykichikpaq hinaspa iñisqaykichikmanta kusikunaykichikpaqmi, 26  chaynapi Cristo Jesuspa qatiqnin kasqaykichikrayku qamkunawan kaqmanta kuska kaptiy ancha kusisqa ñuqarayku kanaykichikpaq. 27  Cristomanta sumaq willakuyman hinayá kawsakuychik, chaynapi qamkunaman hamuspaypas utaq mana hamuspaypas qamkunamanta ima willakuytapas uyarinaypaq, uyarisaqchá sumaq willakuypi iñispaykichik huk sunqulla llamkaspa allin takyasqaykichikmanta, chullalla piensaq kasqaykichikmanta hinaspa huk runa hinalla kasqaykichikmanta, 28  amayá contraykichikpi kaqkunataqa manchakuychikchu. Tukuy chaykunam qawachin paykuna chinkachisqa kanankuta, qamkunañataq salvasqa kanaykichikta, chayqa Diosmantam hamun. 29  Qamkunaqa manam Cristopi iñinallaykichikpaqchu yanapasqaqa karqankichik, aswanqa payrayku ñakarinaykichikpaqwanmi. 30  Qamkunaqa yachankichikmi imakunawan peleasqayta, chaykunallawanmi qamkunapas peleachkankichik, uyarichkankichiktaqmi hinalla peleasqaymantapas.

Willakuykuna

“Diospa llapallan runankunaman”, utaq: “Llapallan chuya runakunaman”.
Utaq: “Iñiqkunata cuidaqkunamanpas”.
Qaway: Palabrakuna entiendenapaq listata.
Kaypiqa nichkan: “Cuerpoywan”, nispam.
Kaypiqa nichkan: “Cuerpopiraq”, nispam.