Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Efesios 4:1-32

  • Cristopa cuerponpi huklla kaymanta (1-16)

    • Runakuna regalo hina churasqa kasqankumanta (8)

  • Ñawpa vidanchikmanta hinaspa musuq runaña kasqanchikmanta (17-32)

4  Señorninchikrayku preso kaq ñuqa Pablom, qamkunata ruegakamuykichik akllasqa kasqaykichikman hina allinta kawsakunaykichikpaq.  Kawsakuychikqa: Humillakuspa, llampu sunqu kaspa, pacienciakuspa, kuyakuywan aguantanakuspa,  hawkalla kaspa hinaspa chuya espiritupa* yanapakuyninwan huk sunqulla kanaykichikpaq anchata kallpanchakuspa.  Chaymantapas, imaynam Diospa quwananchikpaq suyasqanchik premiopas chullalla, chaynam cuerpopas chullalla, chullallam espiritupas,  chullallam señorpas, iñiypas, bautismopas*,  chullallataqmi llapallanchikpa taytanchik Diospas, payqa llapallantam kamachin, llapallanta servichikuspanmi imatapas ruwan, llapallanpitaqmi atiyninpas kachkan.  Diosqa sapakamamanmi ancha kuyakuyninta qawachiwanchik, chayqa sutillatam qawakun regalota hina Cristo imayna aypuwasqanchikpi.  Chaymi Diospa qillqan nin: “Altoman rispanmi presokunata aparikurqa, runakunatam churarqa regalo hina kanankupaq”, nispa.  Hinaptinqa, ¿imatataq niwachkanchik ‘hanaq pachamanmi rirqa’ nispanqa? Kaywanqa niwachkanchikmi puntata kay pachaman uraykamusqanmanta. 10  Kikin uraykamuqmi cielokunapa hawankamaraq rirqa, chaynapi tukuy imata cumplichinanpaq. 11  Chay churasqan runakunamanta wakinmi karqa apostolkuna, wakintaq Diosmanta willakuqkuna*, wakinñataq sumaq willakuymanta willakuqkuna, hukkunañataq iñiqkunata michiqkuna hinaspa yachachiqkuna. 12  Paykunatam churarqa Diospa runankunata* allin ñanpi purichinankupaq, iñiqkunata servinankupaq hinaspa Cristopa cuerponta* wiñachinankupaq. 13  Chaynaqa kanqa iñiyninchikpi llapallanchik huklla kananchikkamam hinaspa Diospa churinmanta allintapuni yachananchikkamam, chaynapi allin yuyayniyuq runaña kananchikpaq. Arí, imayna kasqanchikpi Cristo hina cabal runa kananchikpaq. 14  Chaynaqa, amañayá wawakuna hinañachu kasunchik llulla yachachiq runakunapa yachachisqanta uyarispanchik, chaynapi lamar quchapi olakuna hinaspa wayrapa apakachasqan botekuna hina mana kananchikpaq, chay llulla runakunaqa sumaqllataña rimaspankum hukkunata pantachinku. 15  Aswanqa chiqap kaqtam rimananchik hinaspapas kuyanakunanchikmi, chaynapim tukuy imapi wiñasunchik umanchik Cristoman rikchakunapaq. 16  Payraykum, enteron cuerpo kikin cuerpota yanapan wiñananpaq hinaspa kuyakuypi allinta takyananpaq. Cuerpopa sapa partenkunam sumaq hukllawasqa kachkan, cuerpopa partenkunaqa yanapanakunkum ankukuna allinta takyachiptin, ruway atisqanman hinataqmi cuerpopa sapa partenkunaqa imam ruwananta ruwan. 17  Chaynaqa kaytam nikichik, kay nisqaymantataqmi señorninchikpa sutinpipas willakuni: Amayá qamkunaqa huk law nacionniyuqkuna hinaqa kawsaychikchu, paykunaqa kawsanku mana valeq piensasqankuman hinam. 18  Paykunaqa yuyayninkupim tutayaypi kachkanku, karupitaqmi kachkanku Diosmanta hamuq kawsakuymantapas, chaynaqa kachkanku Diosmanta mana yachayta munasqankuraykum. Arí, chaynam kachkanku sunqunku rumiyarusqanrayku. 19  Paykunaqa manaña imaniraqllapas pinqakuq rikuriruspankum mana pinqakuspa mana allin ruwaymanña* qukurunku, chaynapi imaymana millakuypaq kaqkunata ruwanankupaq, aswan-aswanraqmi chayna kawsaytapas munachkanku. 20  Qamkunam ichaqa mana chaynatachu Cristomanta yacharqankichik. 21  Sichu Cristota uyarirqankichik hinaspa paypa yachachisqan karqankichik hinaspaqa allintam chaymanta yachankichik, Jesuspi chiqap yachachikuy kasqanrayku. 22  Qamkunaqa yachachisqam karqankichik ñawpa vidaykichikta saqinaykichikpaq, chayna kasqaykichikqa kachkan ñawpaqpi imayna kawsasqaykichikman hinam, ñawpa vidaykichikqa engañasuqnikichik mana allin munaykunawanmi astawan aswanyachkan. 23  Hinallayá imayna piensasqaykichikta musuqyachiychik, 24  chaymantapas musuq pachawan pachakuchkaq hinayá musuq runaña kaychik, chayna kawsakuyqa kachkan Diospa munayninman hina allin ruwaypi hinaspa chiqap iñiypi takyachisqam. 25  Qamkunaqa ñam llullakuyta saqirunkichikña, chaynaqa sapakamayá amaña llullakuspa chiqapta runamasikichikwan rimaychik, ñuqanchikqa llapallanchikmi kanchik huk cuerpopa partellan. 26  Piñasqa kaspaykichikpas amataqyá huchallikuychikchu, amayá inti siqaykunankamaqa piñasqaqa kaychikchu. 27  Amayá imamanpas diablo wichiykachisunaykichikpaqqa imatapas chaypaq hinaqa ruwaychikchu. 28  Pipas suwakuqqa amañayá suwakuchunchu, aswanqa anchata llamkachun imapas allin ruwayman qukuspa, chaynapi mana imayuqkunaman imallantapas haywaykunanpaq. 29  Amayá simikichikmantaqa qacha* rimaykunapas lluqsichunchu, aswanqa necesitakusqanman hinayá kallpanchanapaq allin rimaykunallata rimaychik, chaynapi uyariqnikichikkunapa allinninpaq kananpaq. 30  Chaymantapas, amayá Diospa chuya espirituntaqa llakichiychikchu, chay espirituwanmi sellowan churasqa hina karqankichik chaynapi librakunaykichik punchaw chayamuptin librasqa kanaykichikpaq. 31  Qamkunaqa saqiychikñayá: Rabiakuyta, piñakuyta, qaqchakuyta, sientikuqlla kayta, hukkunapa contranpi mana allin rimayta chaynataq tukuy mana allin kaqkunatapas. 32  Aswanqa sumaq sunquyá kaychik, sunqumanta llakipayakuq, hinaspayá tukuy sunqumanta pampachanakuychik imaynam Diospas Cristorayku chaynata pampachasusqaykichikman hina.

Willakuykuna

Utaq: “Diospa atiyninpa”. Qawaytaq: Palabrakuna entiendenapaq listata.
Utaq: “Yakupi challpukuypas”.
Utaq: “Profetakuna”. Qawaytaq: Palabrakuna entiendenapaq listata.
“Diospa runankunata”, utaq: “Chuya runakunata”.
“Cristopa cuerponta” nispanqa iñiqkunamantam rimachkan.
Qaway: Palabrakuna entiendenapaq listata.
Utaq: “Qanra”. Kaypiqa nichkan: “Ismusqa”, nispam.