Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Colosenses 3:1-25

  • Ñawpa vidanchikmanta hinaspa musuq runaña kananchikmanta (1-17)

    • Cuerpopa mana allin ruway munasqankunata chinkachinamanta (5)

    • Huklla kanapaq kuyakuy yanapawasqanchikmanta (14)

  • Iñiq ayllukunapaq yachachikuykunamanta (18-25)

3  Qamkunaqa Cristowan kuskam kawsarichisqa karqankichik, chaynaqa hanaq pachapi imapas kaqkunatayá maskaychik, hanaq pachapim Cristoqa Diospa alliqninpi* tiyachkan.  Amayá kay pachapi kaqkunapiqa piensaychikchu, piensaychikqa hanaq pachapi kaqkunallapiyá.  Qamkunaqa wañurunkichikñam, chaymantapas vidaykichikqa Diospa munayninman hinam Cristopa makinpiña kachkan.  Kawsakuyninchikqa Cristom, pay rikurimuptinmi qamkunapas paywan kuska kancharichkaq rikurimunkichik.  Cuerpoykichikpa mana allin ruway munayninkunatayá chinkachiychik*, chinkachiychikyá: Huchapakuyta*, millakuypaq ruwaykunata, qariwan utaq warmiwan puñuy munapayayta, mana allin ruway munayta hinaspa imatapas llumpayta munapayayta, imatapas munapayayqa taytacha-mamacha yupaychay hinam.  Tukuy chaykunaraykum Diospa piñakuynin hamunqa.  Qamkunapas ñawpa vidaykichikpiqa chaykunata ruwaspam kawsarqankichik.  Kunanqa manañam kanaykichikchu: Rabiakuqqa, piñakuqqa, mana allin ruwaqqa, runa insultaqqa nitaq qacha* simiqa.  Amataqyá llullanakuychikchu. Saqiychikyá ñawpa vidaykichikta hinaspa tukuy mana allin ruwasqaykichikta, 10  hinaspayá musuq runaña kaychik aswan-aswan musuqyachikuq chiqap yachachikuywan, chayna runa kayqa Diospa imayna kayninmanmi rikchakun. 11  Musuq runaña kaypiqa manam kanchu: Grecia nacionniyuq kaypas, judio kaypas, qari kayninpi señalasqa utaq mana señalasqa kaypas, huk law nacionniyuq kaypas, Escita* nisqa llaqtayuq kaypas, sirviente kaypas utaq mana sirviente kaypas, Cristomiki tukuy imapas, paywantaqmi hukllapas kachkanchik. 12  Kuyasqallaykuna, qamkunaqa kankichik Diospaq akllasqa runakunam, chaynaqa pachawan churakuchkaq hinayá kaykunawan pachakuychik: Tukuy sunqumanta llakipayakuqllaña kaywan, sumaq sunqu kaywan, mana hatun tukuq kaywan, llampu sunqu kaywan hinaspa pacienciakuywan. 13  Chaymantapas piñanakunaykichikpaq razon kaptinpas hinallayá aguantanakuychik hinaspa tukuy sunqumanta pampachanakuychik. Imaynam Jehova* Diospas tukuy sunqunmanta pampachaykusunkichik, chaynayá qamkunapas pampachanakuychik. 14  Chayna kaspaykichikpas kuyakuywanyá pachakuychik, kuyakuyqa tukuy imapi huklla kanapaqmi yanapawanchik. 15  Chaymantapas Cristopa hawkayayninyá sunquykichikpi munaychakuchun, chulla cuerpollaña kanaykichikpaqmi qamkunaqa chayna hawkayayman qayasqa karqankichik. Agradecekuqtaqyá kaychik. 16  Cristopa yachachikuyninyá tukuy yachayta qususpaykichik qamkunapi achkanpi kachun. Hinallataqyá yachachinakuychik hinaspa kallpanchanakuychik salmokunawan, Diospaq takikunawan hinaspa graciasta quspa yupaychanapaq takikunawan. Chaymantapas tukuy sunquwanyá Jehova Diospaq takiychik. 17  Tukuy imata ruwaspapas utaq rimaspapas señor Jesuspa sutinpiyá ruwaychik, chaykunataqa ruwaychik paynintakama tayta Diosta agradecekuspayá. 18  Warmikuna, qusaykichiktayá tukuy imapi kasukuychik, chaynam kananku Cristopa qatiqninkunaqa. 19  Qusakuna, warmikichiktayá hinalla kuyaychik, amayá qaqchakachariychikchu*. 20  Wawa-churikuna, tukuy imapiyá tayta-mamaykichikta kasukuychik, chayqa señorninchikpa munasqanman hinam. 21  Taytakuna, amayá churikichiktaqa piñachiychikchu, chaynapi sunqunkupi mana hukmanyarunankupaq. 22  Sirvientekuna, patronnikichiktayá* tukuy imapi kasukuychik, ichaqa amayá paykuna qawasuptillaykichikchu, qawasqallaqa kasukunku runakunapa allin qawasqan kayta munaqkunallam, aswanqa Jehova Diosta manchakuspayá tukuy sunquwan kasukuychik. 23  Tukuy imatapas ruwaspaykichikqa tukuy sunquykichikwan hinaspa tukuy kallpaykichikwanyá Jehova Diospaq ruwachkaq hina ruwaychik, amayá runapaq hinachu. 24  Qamkunaqa yachankichikmi Jehova Diosmanta premiota hina herencia chaskinaykichikta. Patronnikichik Cristotayá sirviente hina serviychik. 25  Pipas mana allin ruwaqqa mana allin ruwasqanmantam pagonta chaskinqa, Diosqariki manam pimanpas sayapakunchu.

Willakuykuna

Utaq: “Pañanpi”.
Kaypiqa nichkan: “Wañuchiychik”, nispam.
Kayqa, qari kayninwan utaq warmi kayninwan millakuypaq kaqkunata ruwaymi. Qawaytaq: Palabrakuna entiendenapaq listata.
Utaq: “Qanra”.
“Escita” nispanqa, chakra runakunamantam rimachkan.
Qaway: Palabrakuna entiendenapaq listata.
Utaq: “Piñakuychikchu”.
Utaq: “Kay pachapi patronnikichiktayá”.