Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Apocalipsis 9:1-21

  • Pichqa kaq cornetillamanta (1-11)

  • Punta kaq ñakariy pasaruptin iskay ñakariyraq kananmanta (12)

  • Suqta kaq cornetillamanta (13-21)

9  Pichqa kaq angel cornetillanta waqaykachiptinñataqmi rikurqani hanaq pachamanta kay pachaman lucero wichiykamuqta, chay lucerom chaskirqa uku-ukuman chinkaykuq uchkupa llaventa.  Chay lucerom uku-ukuman chinkaykuq uchkuta kichaykurqa, hinaptinmi qusni* lluqsiramurqa hatu-hatun hornomanta lluqsimuchkaq qusni hina. Chay qusnim intitapas hinaspa kay pachapa hawantapas tutayarachirqa.  Chay qusnimantam* aqarway urukuna lluqsiramurqa enteron pachaman, chay aqarway urukunam chaskirqaku atiyta kay pachapi atuq-atuq* urukunapa atiyninta hina.  Chay aqarway urukunaqa kamachisqam karqa kay pachapi pastokunata, plantakunata hinaspa ima sachakunatapas ama imanananpaq, kamachisqaqa karqaku Diospa sellonwan urkunpi mana marcasqa kaq runakunallata kachunankupaqmi.  Chay aqarway urukunaqa manam runakunata wañuchinankupaqchu kamachisqaqa karqaku, aswanqa pichqa killapuni ñakarichinallankupaqmi. Chay ñakarichisqankuqa karqa runata atuq-atuq* uru kachuruptin* nanaywan ñakarisqan hinam.  Chay punchawkunapim runakunaqa wañuyta maskanqaku ichaqa manapunim tarinqakuchu, wañuyta munaspankupas manam wañunqakuchu.  Chay aqarway urukunaqa kasqa guerrapaq alistasqa caballokuna hinam, umankupim kasqa qurimanta coronakuna hina, uyankunañataqmi kasqa runapa uyan hina,  chukchanmi kasqa warmipa chukchan hina, kirunkunañataqmi kasqa leonpa kirun hina,  qasqunku harkachikunanñataqmi kasqa fierromanta qasqu harkachikuna hina. Raprankunapa rapapapasqanpas uyarikurqa guerraman riq caballokunapa aysasqan carretakunapa risqan hinam, 10  chupankunañataqmi kasqa atuq-atuq* urukunapa kachukunan* hina. Chupankunapim kasqa atiynin runakunata pichqa killa kachunanpaq. 11  Chay urukunapa kamachiqninqa kasqa uku-ukuman chinkaykuq uchkupa angelninmi. Chay angelpa sutinmi kasqa hebreo rimaypi Abadon* niq, griego rimaypiñataq Apolion* niq. 12  Punta kaq ñakariymi pasarunña. Ichaqa iskay ñakariykunaraqmi hamuchkan. 13  Suqta kaq angel cornetillanta waqaykachiptinñataqmi huk qayakuyta uyarirqani, chay qayakuyqa uyarikurqa Diospa ñawpaqninpi kaq qurimanta altarpa esquinankunamantam, 14  chay qayakuymi cornetillayuq suqta kaq angelta nirqa: “Eufrates sutiyuq mayupa patanpi watasqa tawa angelkunata kachariy”, nispa. 15  Hinaptinmi chay tawa angelkunaqa kacharisqa karqaku llapa runakunamanta kimsa kaq partenta wañuchinanpaq, paykunaqa alistasqañam karqaku chay horapaq, chay punchawpaq, chay killapaq hinaspa chay watapaq. 16  Chaymantam uyarirqani sillada tropakuna hayka kasqanta, kasqakuqa iskay pachak wara-waranqam. 17  Caballokunata hinaspa sillakuqninkunataqa musquypi hinam rikurqani kaynata: Chay sillakuqkunapa qasqun harkachikunanmi kasqa nina hina pukay-pukay, jacinto sutiyuq alhaja rumi hina azul colorniyuq hinaspa azufre hina qilluniraq, caballokunapa umanñataqmi kasqa leonkunapa umankuna hina, siminkunamantañataqmi lluqsisqa rupachkaq nina, qusni* hinaspa azufre. 18  Runakunamantam kimsa kaq parte wañururqa caballokunapa siminmanta lluqsimuq ninawan, qusniwan* hinaspa azufrewan, chaykunam karqa kimsa castigokuna. 19  Chay caballokunapa atiyninqa kasqa siminpim hinaspa chupanpim, chupanqa kasqa culebra hinaraqmi, hinaspapas umayuqraqmi, chaywanmi runata kachusqa. 20  Chay castigokunawan mana wañuq runakunam ichaqa imapas mana allin ruwasqankumanta mana wanakurqakuchu, paykunaqa hinallam yupaycharqaku demoniokunata hinaspa qurimanta, qullqimanta, cobremanta, rumimanta hinaspa kullumanta taytacha-mamachakunata, chay taytacha-mamachakunaqa mana qawaq, mana uyariq hinaspa mana puriqmi. 21  Chay runakunaqa manataqmi wanakurqakuchu runa wañuchisqankumanta, layqa* ruwasqankumanta, huchapakusqankumanta* nitaq suwakusqankumantapas.

Willakuykuna

Utaq: “Qusñi”.
Utaq: “Qusñimantam”.
Utaq: “Alacran”.
Utaq: “Alacran”.
Utaq: “Ulluruptin”.
Utaq: “Alacran”.
Utaq: “Ullun”.
“Abadon” ninanqa: “Chinkachiq”, ninanmi.
“Apolion” ninanqa: “Chinkachiq”, ninanmi.
Utaq: “Qusñi”.
Utaq: “Qusñiwan”.
Utaq: “Brujeria”. Qawaytaq: Palabrakuna entiendenapaq listata.
Kayqa, qari kayninwan utaq warmi kayninwan millakuypaq kaqkunata ruwaymi. Qawaytaq: Palabrakuna entiendenapaq listata.