Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Apocalipsis 5:1-14

  • Wankusqa qillqa qanchis kutikama wichqasqa kasqanmanta (1-5)

  • Wankusqa qillqata malta carnero chaskisqanmanta (6-8)

  • Wankusqa qillqa qanchis kutikama wichqasqa kasqanta malta carnero kichay atisqanmanta (9-14)

5  Kamachinapaq tiyanapi tiyaqpa alliq* makinpiñataqmi rikururqani wankusqa qillqata hawanpipas ukunpipas qillqasqata, chayqa kachkasqa qanchis kutikama alli-allin wichqasqam*.  Rikururqanitaqmi kallpasapa angeltapas, chaymi payqa kallpawan qayakuspan nirqa: “¿Pitaq kanman kay wankusqa qillqata chaynataq qanchis kutikama wichqasqa kasqantapas kichananpaq hinaqa?”, nispa.  Ichaqa manam pipas karqachu hanaq pachapipas, kay pachapipas nitaq allpa ukupipas chay wankusqa qillqata kichay atiqqa nitaq leey atiqpas.  Chaymi ñuqaqa llumpayllataña waqayta qallaykurqani chay wankusqa qillqata kichananpaq hina chaynataq leenanpaq hina mana pipas kaptin.  Chaymi huknin kamachiq* niwarqa: “Amañayá waqaychu. Leonwan sutichasqa Juda ayllumanta kaq kamachiq Davidpa ayllunmi vencerun, vencerunqa wankusqa qillqata hinaspa qanchis kutikama wichqasqa kasqanta kichananpaqmi”, nispa.  Hinaptinmi, chay kamachinapaq tiyanapa* chawpinpi, querubin sutiyuq tawa angelkunapa chawpinpi hinaspa chay kamachiqkunapa* chawpinpi rikurqani sayachkaq malta carnerota, chay carneroqa wañuchisqa hinam kachkasqa, kasqataqmi qanchis waqranpas hinaspa qanchis ñawinpas, chay ñawinkunaqa enteron kay pachaman Diospa kachamusqan qanchis espiritunkunam.  Chay carnerom qunqayllamanta hamuruspan chay wankusqa qillqata chaskiykurqa kamachinapaq tiyanapi* tiyaqpa alliq* makinmanta.  Chay wankusqa qillqata chaskiykuptinñataqmi chay tawa angelkunaqa hinaspa iskay chunka tawayuq kamachiqkunaqa* chay carneropa ñawpaqninpi qunqurakuykurqaku, kamachiqkunaqa sapakamam arpayuqkama hinaspa inciensowan* huntasqa qurimanta tazonniyuqkama kachkasqaku. Inciensoqa Diospa runankunapa* mañakusqankum.  Paykunam musuq takita takispanku ninku: “Qamqa wankusqa qillqata hapiykuspa qanchis kutikama wichqasqa kasqanta kichanaykipaq hinam kanki, qamqariki wañuchisqam karqanki, hinaspapas Diospaqmi runakunata yawarnikiwan rantirqanki llapallan ayllukunamanta, tukuy rikchaq rimaykuna rimaqkunamanta, lliw llaqtakunamanta hinaspa lliw nacionkunamanta. 10  Diosniykupaqmi kamachiqkuna hinaspa sacerdotekuna kanankupaq paykunataqa churaykurqanki, paykunaqariki kay pachatam kamachinqaku”, nispa. 11  Rikurqanitaqmi kamachinapaq tiyanapa* muyuriqninpi achkallaña angelkunata, chaynataq chay tawa angelkunata hinaspa kamachiqkunatapas*, uyarirqanitaqmi paykunapa rimasqankutapas, chay achkallaña angelkunaqa kasqa pachak wara-waranqantin hinaspa millo-millonnintinmi, 12  paykunam kallpawan qayakuspa nirqaku: “Wañuchisqa malta carnerom: Atiyta, Diospa bendicionninta, yachayta, kallpata, respetasqa kayta, hatunchasqa kayta, hinaspa alabasqa kayta chaskinanpaq hinaqa”, nispa. 13  Hanaq pachapi, kay pachapi, allpapa ukunpi hinaspa lamar quchapi tukuy ima unanchasqa kaqkunapa kayna nisqankutam uyarirqani: “Kamachinapaq tiyanapi* tiyaqpaq hinaspa malta carneropaqyá wiña-wiñaypaq kachun alabasqa kay, respetasqa kay, hatunchasqa kay hinaspa atiyniyuq kaypas”, niqta. 14  Chay tawa angelkunañataqmi nichkasqaku: “¡Amen!”, nispanku. Chay kamachiqkunañataqmi* qunqurakuykuspanku Diosta yupaycharqaku.

Willakuykuna

Utaq: “Paña”.
Utaq: “Sellasqam”. Qawaytaq: Palabrakuna entiendenapaq listata.
Utaq: “Anciano”. Qawaytaq: Palabrakuna entiendenapaq listata.
Utaq: “Tronopa”.
Utaq: “Ancianokunapa”.
Utaq: “Tronopi”.
Utaq: “Paña”.
Utaq: “Ancianokunaqa”.
Qaway: Palabrakuna entiendenapaq listata.
“Diospa runankunapa”, utaq: “Chuya runakunapa”.
Utaq: “Tronopa”.
Utaq: “Ancianokunatapas”.
Utaq: “Tronopi”.
Utaq: “Ancianokunañataqmi”.