Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Apocalipsis 12:1-17

  • Warmimanta, qari wawamanta hinaspa manchakuypaq hatu-hatun culebramanta (1-6)

  • Manchakuypaq culebrawan Miguelpa peleasqanmanta (7-12)

    • Manchakuypaq culebra kay pachaman wischumusqa kasqanmanta (9)

    • Pisi tiempoyuqllaña kasqanta diablo yachakusqanmanta (12)

  • Manchakuypaq culebra warmita qatikachasqanmanta (13-17)

12  Chaymantam mana haykapipas rikusqayta hanaq pachapi rikururqani: Rikurqanim intiwan pachasqa warmita, chay warmim saruchkasqa killata, umanpiñataqmi kachkasqa chunka iskayniyuq lucerokunamanta corona,  chay warmim wiksayuq kachkasqa hinaspam wachakunanpaq nanaynin hapiptin dolorwan qaparkachachkasqa.  Kaqmantam rikurqani mana haykapipas rikusqayta: Rikurqanim nina kaqllaña colorniyuq mancharikuypaq hatu-hatun culebrata. Chay culebraqa kasqa qanchis umayuq hinaspa chunka waqrayuqmi, umankunapipas kasqa qanchis coronakunam,  chupanwanpas hanaq pachapi yaqa parten* lucerokunata aysaspanmi kay pachaman wischuykamurqa. Hinaspapas unqukunanpaqña kaq warmipa ñawpaqninpim suyachkarqa warmipa wawan naceruptin mikurunanpaq.  Chay warmim qari wawata wachakurqa, chay wawam michichkaq hina llapallan nacionkunata fierromanta tanuwawan kamachinqa. Chay wawam kamachinanpaq tiyananpi* kaq Diospa qayllanman chaylla apasqa karqa.  Warmiñataqmi Diospa sapaqchapusqan chunniqman ayqikurqa, chaypi waranqa iskay pachak suqta chunkan punchaw mikuchisqa kananpaq.  Chaymantam hanaq pachapi guerra karurqa, Miguelmi* angelninkunapiwan manchakuypaq culebrapa contranpi pelearqa, manchakuypaq culebrapas angelninkunapiwanmi pelearqa  ichaqa vencerachikurqakum, manataqmi hanaq pachapi sitiopas paykunapaqqa karqañachu.  Chaynapim chay manchakuypaq culebraqa kay pachaman wischumusqa karqa. Payqa diablowan hinaspa satanaswan sutichasqa ñawpaqmantaraq kaq culebram. Paymi kay pachapi llapallan runakunata pantachichkan. Paymá angelninkunapiwan kay pachaman wischumusqa karqa. 10  Chaymantam hanaq pachapi kayna qayakuqta uyarirqani, nirqam: “¡Kunanmi Diosqa runakunata salvaykun, atiyniyuq kasqanpas sutillam kachkan, kamachiytapas qallaykunñam, Cristopas atiynintam servichikuchkanña, Cristoqariki Diospam. Iñiqmasinchikkunata Diospa qayllanpi tuta-punchaw tumpaqqa ñam hanaq pachamanta wischurachikamunña! 11  Iñiqmasinchikkunaqa malta carnerowan sutichasqapa yawarninwanmi hinaspa willakusqanku palabrawanmi vencerunku, paykunaqa wañuypa patanpiña kaspankupas manam wañuytaqa manchakurqakuchu. 12  Chayraykuyá, ¡cielokuna kusikuychik, kusikuychiktaqyá chaypi yachaqkunapas*! ¡Ay imaynaraq kanqa kay pachawan lamar quchaqa! Diabloqa llumpa-llumpayta piñakuspanmi qamkunaman uraykaramun, payqariki yachakunmi pisi tiempoyuqllaña kasqanta”, nispa. 13  Chay manchakuypaq culebram kay pachaman wischumusqa kasqanta musyakuruspan qari wawa wachakuq warmita qatikacharqa. 14  Warmimanmi ichaqa quykurqaku ankapa iskaynin rapranta, chaynapi Diospa sapaqchapusqan chunniqman pawananpaq, chaypi culebramanta karu-karupi huk tiempo, iskay tiempo hinaspa parte tiempo mikuchisqa kananpaq. 15  Chay culebrañataqmi siminmanta aqtuykamurqa mayu hina achka-achka yakuta chay warmita hiqiparachinanpaq. 16  Ichaqa kay pacham warmita yanapaykurqa, hinaspam kay pachaqa siminta kichariykuspan manchakuypaq culebrapa aqtusqan mayuta millpururqa. 17  Hinaptinmi chay manchakuypaq culebraqa warmipa contranpi piñakuruspan warmipa wakin wawankunapa contranpi peleaqña rirqa, warmipa chay wawankunaqa Diospa kamachikuyninkunatam kasukunku, hinaspapas Jesusmanta willakunankupaqmi kamachisqa kachkanku.

Willakuykuna

Kaypiqa nichkan: “Kimsa kaq partenta”, nispam.
Utaq: “Trononpi”.
“Miguel” ninanqa: “¿Pitaq Dios hina kanman?”, ninanmi.
Utaq: “Tiyaqkunapas”.