Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

Apocalipsis 1:1-20

  • Ima ninan kasqanta Jesuswan Diospa willachisqanmanta (1-3)

  • Qanchis hawaqpi huñunakuq iñiqkunaman kuyakuyninta apachisqanmanta (4-8)

    • “Ñuqam kani qallariypas chaynataq tukupaypas”, nisqanmanta (8)

  • Chuya espiritupa yanapakuyninwan señorpa punchawninpi Juan rikurirusqanmanta (9-11)

  • Jesus hatunchasqa kasqantaña qawasqanmanta (12-20)

1  Tukuy kay willakuykunaqa Jesucristopa qawachisqanmi*. Paymi tukuy kaykunataqa Diosmanta chaskirqa imakuna chaylla pasakunanmanta Diospa serviqninkunaman willananpaq, Jesucristom angelninta kachamurqa* Diosta serviq Juanman* hamuq tiempopi imakuna pasakunanmanta musquyninpi hina qawachinanpaq,  Juanñataqmi willakurqa Diospa palabranmanta, Jesucristopa willakusqanmanta chaynataq tukuy ima rikusqanmantapas.  Mayna kusisqam kanku hamuq tiempopi imapas kananmanta willakuykunata kallpawan leeqkunaqa hinaspa uyariqkunaqa, chaynataq kaypi qillqasqa kaqkunata kasukuqkunaqa. Akllasqa tiempoqa hichpallañam kachkan.  Ñuqa Juanmi, Asia lawpi qanchis hawaqpi huñunakuq iñiqkunaman* qillqamuykichik: “Ñawpaq kaq, kunan kaq chaynataq hamuq kaqpa” hinaspa kamachiqpa tiyananpa* ñawpaqninpi qanchis espiritukunapa ancha kuyakuyninwan hawkayayninyá qamkunapaq kachun,  chaynataq Jesucristopapas. Jesusqa “confianapaq allin testigom”, payqa “wañuqkunamanta punta kawsarimuqmi” hinaspa “kay pachapi llapallan kamachiqkunapa kamachiqninmi”. Paymi kuyawaqninchikqa hinaspa kikinpa yawarninwan huchanchikmanta librawaqninchikqa,  paymi churaykuwanchik kamachiqkuna hinaspa sacerdotekuna kaspa taytanta hinaspa Diosninta servinanchikpaq. Payyá wiña-wiñaypaq hatunchasqa hinaspa atiyniyuq kachun. Amen.  ¡Qawaychik! Payqa puyukunawanmi hamuchkan. Llapallan runakunam rikunqa, rikunqakutaqmi payta tuksiqnin runakunapas. Payraykum kay pachapi llapallan castakunapas llakiwan kaspanku qasqunkutapas takakunqaku. Arí, chaynam kanqa. Amen.  Jehova* Diosmi nin: “Ñuqam kani qallariypas chaynataq tukupaypas*, ñuqataqmi kani ñawpaq kaqpas, kunan kaqpas, hamuq kaqpas. Ñuqaqa kani tukuy atiyniyuq Diosmi”, nispa.  Ñuqa wawqikichik Juanmi Jesuspa qatiqnin kasqayrayku kani: Ñakariqmasikichik, kamachiqmasikichik hinaspa sasachakuykunata aguantaqmasikichik, ñuqam Diosmanta hinaspa Jesusmanta willakusqayrayku Patmos sutiyuq islapi karqani. 10  Chuya espiritupa yanapakuyninwanmi señorpa punchawninpi rikuriruspay uyarirqani qipaypi kallpawan rimamuqta, chay rimasqanmi karqa cornetillapa waqaynin hina, 11  nirqam: “Qawasqaykikunata qillqay wankusqa qillqapi, hinaspa apachiy qanchis hawaqpi huñunakuq iñiqkunaman*, paykunaqa kachkanku: Efeso llaqtapi, Esmirna llaqtapi, Pergamo llaqtapi, Tiatira llaqtapi, Sardis llaqtapi, Filadelfia llaqtapi hinaspa Laodicea llaqtapim”, nispa. 12  Hinaptinmi muyuriykurqani rimapayawaqniy pi kasqanta yachanaypaq, chaymi muyuriykuspay rikururqani qurimanta qanchis candelabrokunata*, 13  chay candelabrokunapa* chawpinpiñataqmi kachkasqa runapa churinman rikchakuq, payqa kachkasqa chakinkama pachayuqmi, qasqunñataqmi kasqa qurimanta chumpiwan watasqa. 14  Umanpi chukchanpas yuraq-yuraqmi kasqa, yuraq millwa hina chaynataq riti hina, ñawinpas kasqa rawrachkaq nina hinam, 15  chakinkunapas kasqa hornopi llipipipichkaq fino cobre hinaraqmi, rimasqanpas uyarikurqa hatu-hatun paqchipa* qapariynin hinaraqmi. 16  Alliq* makinpiñataqmi kasqa qanchis lucerokuna, siminmantañataqmi lluqsimusqa iskay lawnin filoyuq ñawchi espada, uyanpas kancharisqam chawpi punchawpi intipa kanchaynin hinaraq. 17  Chaymi rikuruspay ñawpaqninman wañusqa hina wichiykurqani. Hinaptinmi alliq* makinta hawayman churaykuwaspan niwarqa: “Ama manchakuychu, ñuqam kani punta kaqwan hinaspa tukuynin kaqwan sutichasqa, 18  ñuqataqmi kani kawsaqpas, ñuqaqa wañusqam karqani, kunanmi ichaqa wiña-wiñaypaq kawsachkani, ñuqapa makiypim kachkan wañuypa hinaspa sepulturapa* llavenkunapas. 19  Chayraykuyá qillqay kay rikusqaykikunata, qillqaytaqyá kunan imakuna kaqkunamantapas hinaspa hamuq tiempopi imakuna kananmantapas. 20  Alliq* lawniypi rikusqayki qanchis lucerokunawan qurimanta qanchis candelabrokunaqa* Diospa kaq pakasqa kaqkunam, chaykunapa imam ninanqa kaymi: Qanchis lucerokunaqa kanku qanchis hawaqpi huñunakuq iñiqkunapi* willakuqmi, qanchis lamparakunañataqmi kanku qanchis hawaqpi huñunakuq iñiqkuna.

Willakuykuna

Utaq: “Revelasqanmi”.
Utaq: “Mandamurqa”.
Kaypiqa ninmanmi: “Jesucristota serviq Juanman”, nispapas.
Utaq: “Congregacionkunaman”. Qawaytaq: Palabrakuna entiendenapaq listata.
Utaq: “Trononpa”.
Qaway: Palabrakuna entiendenapaq listata.
Kaypiqa nichkan: “Alfa hinaspa Omega”, nispam. Chayqa karqa griego abecedariopi punta hinaspa tukuynin kaq letrakunam.
Utaq: “Congregacionkunaman”.
Utaq: “Achki ratachinata”.
Utaq: “Achki ratachinakunapa”.
Utaq: “Paqchapa”.
Utaq: “Paña”.
Utaq: “Paña”.
Utaq: “Hades”. Qawaytaq: Palabrakuna entiendenapaq listata.
Utaq: “Paña”.
Utaq: “Achki ratachinakunaqa”.
Utaq: “Congregacionkunapi”.