3 Juan 1:1-14

  • Qillqay qallarisqanmanta hinaspa Diosta mañakusqanmanta (1-4)

  • Gayo sutiyuq iñiqmasinta alabasqanmanta (5-8)

  • Tukuy ima munaq Diotrefes sutiyuq runamanta (9, 10)

  • Demetriomanta iñiqkunapa allin rimasqanku (11, 12)

  • Watukunanpaq tanteasqanmanta hinaspa tukunallanpaqña qillqasqanmanta (13, 14)

 Kuyasqa wawqilláy Gayo, ñuqa iñiqkunapi punta apaqmi* qillqamuchkayki. Qamtaqa chiqaptapunim kuyayki.  Kuyasqalláy Gayo, Diosninchiktam mañakuchkani allinlla kawsakusqaykiman hina tukuy imapipas allinlla hinaspa sanolla kanaykipaq.  Chiqap yachachikuykunaman hina allin kawsasqaykimantam iñiqmasinchikkuna hamuspanku willakurqaku, chaymi anchata kusikurqani. Qamqa kunankamapas chiqap yachachikuyman hinam kawsachkanki.  Ñuqaqa tukuy imamantapas aswanqa kusikuni churiykuna chiqap yachachikuyman hina kawsakusqankuta yachaspaymi.  Kuyasqay wawqilláy, Diosman sunqu kaspaykim iñiqmasinchikkunata yanapachkanki paykunata mana riqsichkaspaykipas.  Paykunam iñiqkunaman* willakurqaku kuyakuq kasqaykimanta. Ama hina kaspaykiyá viajanankupaq Diospa munasqanman hina yanapaykuy.  Paykunaqa Diospa sutinpi willakunankupaqmi rirqaku mana iñiq runakunamanta imatapas mana chaskikuspanku.  Chaymi ñuqanchikqa paykunata samaykachinapaq kamachisqa kachkanchik, chaynapi chiqap yachachikuykuna willakuypi llamkaqmasin kananchikpaq.  Iñiqkunamanmi* cartata qillqamurqani, ichaqa Diotrefesmi despreciawaspanku mana kasukunchu ima nimusqaykutapas, payqa iñiqkuna kamachiytam munan. 10  Chaymi hamuspayqa contraykupi imaymana rimasqanta qawachisaq. Payqa rimasqanwanpas sunqun mana tiyaptinmi wawqikunatapas respetowanqa mana chaskinchu, hinaspam chaskiykuy munaqkunatapas harkakuspan qamkuna ukumanta* qarquchkan. 11  Kuyasqay wawqilláy, amayá mana allin ruwaqkunapa ruwasqankutaqa qatipakuychu, aswanqa allin ruwaqkunapa ruwasqantayá qatipakuy. Pipas allin ruwaqqa Diosmantam, pipas mana allin ruwaqñataqmi Diostaqa mana riqsinchu. 12  Llapallan iñiqkunam Demetriomanta allinta rimanku, chiqap yachachikuyman hina kawsakusqanpas chaytam qawachin, ñuqaykupas paymantaqa allintam willakuniku, yachasqaykichikpi hinapas ñuqaykupa willakusqaykuqa manam llullachu. 13  Achkaraqmi qanman qillqamunayqa kachkan, ichaqa manam munanichu cartallawan nimuytaqa. 14  Ñuqaqa rimananchikpaqmi qanwan chaylla tupaykuyta munachkani. Qamñayá allinlla. Amistadninchikkunam allinllachu nimusunki. Sutin-sutinyá amistadninchikkunatapas allinllachu niykuy.

Willakuykuna

Utaq: “Ancianom”. Qawaytaq: Palabrakuna entiendenapaq listata.
Utaq: “Congregacionman”. Qawaytaq: Palabrakuna entiendenapaq listata.
Utaq: “Congregacionmanmi”.
“Qamkuna ukumanta” nispanqa: “Congregacionmanta”, ninantam nichkan.