2 Timoteo 1:1-18

  • Qillqay qallarisqanmanta (1, 2)

  • Timoteopa iñisqanmanta Pablopa Diosta agradecekusqan (3-5)

  • Diospa qusqanta ninata ratachichkaq hina kawsachinamanta (6-11)

  • Allin yachachikuyman hapipakunamanta (12-14)

  • Pablopa amistadninkunamanta hinaspa enemigonkunamanta (15-18)

1  Ñuqa Pablom Diospa munasqanman hina Cristo Jesuspa apostolnin kani, imaynam kawsakuy quwananpaq Diospa prometewasqanman hina, chaytaqa prometewarqa Cristo Jesuspa qatiqnin kasqayraykum.  Qanmanmi qillqamuyki kuyasqay churiy Timoteo: Qampaqyá kachun taytanchik Diospa hinaspa señorninchik Cristo Jesuspa ancha kuyakuynin, llakipayakuynin chaynataq hawkayaynin.  Diostam allin concienciayuq hinaspa ñawpa abueloykuna hina servichkani, tuta-punchaw ruegakuspaymi tukuy tiempo qamta yuyarispay Diosta agradecekuni.  Waqasqaykita yuyarispaymi qanwan tupaykuyta anchata munachkani, chaynapi llumpay kusisqa kanaypaq.  Chiqap iñiyniyuq kasqaykitam yuyarini, puntataraqmi chayna iñiyniyuq karqaku abuelayki Loida hinaspa mamayki Eunice, chaymi ñuqaqa mana iskayrayanichu qampas chayna iñiyniyuq kasqaykimantaqa.  Chayraykum kayta yuyarichiki: Makiyta hawaykiman churaykuptiymi Diospa qusqanta chaskirqanki, chay chaskisqaykitayá hinalla kawsachiy ninatapas ratachichkawaq hina.  Diosmi espiritunta quwarqanchik ichaqa manam manchakunanchikpaqchu aswanqa kallpayuq, kuyakuyniyuq hinaspa allin yuyayniyuq kananchikpaqmi.  Chaynaqa, amayá ñuqamantaqa pinqakuychu nitaq señorninchikmanta willakuytapas, payraykum ñuqaqa preso kachkani, aswanqa listollañam kanayki Diospa atiyninpi hapipakuspa sumaq willakuyrayku ñakarinaykipaq.  Paymi salvawarqanchik hinaspa qayawarqanchik chuya runa kananchikpaq, chayqa karqa munasqanman hina chaynataq hatun kuyakuyninman hinam, ichaqa manam imapas ruwasqanchikraykuchu. Ñuqanchikqa Cristo Jesusnintakamam ñawpaqmantaraq Diospa ancha kuyakuyninta chaskirqanchik. 10  Chaymi kunan chayna kuyakuynin chaskisqanchikqa sutilla qawakun salvawaqninchik Cristo Jesuspa rikurimusqanwan, paymi wañuyta chinkarachin hinaspam sumaq willakuywan riqsiykachiwanchik mana tukuq kawsakuyta imayna chaskinamanta. 11  Ñuqaqa nombrasqam karqani chay sumaq willakuymanta willakuq kanaypaq, apostol kanaypaq chaynataq yachachiq kanaypaq. 12  Chayraykum kaynata ñakarichkani, ichaqa manam pinqakunichu. Ñuqaqa riqsinim piman iñisqaytaqa, manataqmi iskayrayanichu cuidananpaq makinpi churasqayta juicio punchawkama pay waqaychananmanta. 13  Hinallayá kawsakuy ñuqamanta uyarisqayki qatipakunapaq allin yachachikuyman hina, qawachiytaq Cristo Jesuswan huklla kasqaykirayku iñiyniyuq hinaspa kuyakuyniyuq kasqaykitapas. 14  Ñuqanchikpi kaq chuya espiritupa* yanapakuyninwanyá allinta waqaychay chaskisqayki allin yachachikuyta. 15  Yachasqaykipi hinapas Asia provinciamanta kaqkunaqa llapallanmi saqiruwanku, saqiruwantaqmi Figelowan Hermogenespas. 16  Onesiforopa aylluntayá señorninchik llakipayariykuchun, payqa achka kutipim kallpanchaykuwarqa, manataqmi cadenasqa kasqaymantapas pinqakurqachu. 17  Aswanqa Roma llaqtaman chayaramuspanmi tariwanankama suma-sumaqta maskawarqa. 18  Señor Jehova* Diosyá juicio punchawpi payta kuyapayarichun. Yachasqaykipi hinapas payqa Efeso llaqtapi kachkaspanmi tukuy imapi yanapakurqa.

Willakuykuna

Utaq: “Diospa atiyninpa”. Qawaytaq: Palabrakuna entiendenapaq listata.
Qaway: Palabrakuna entiendenapaq listata.