Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

2 Tesalonicenses 3:1-18

  • Tukuy tiempo Diosta mañakunamanta (1-5)

  • Mana allin kawsaqkunamanta karunchakunamanta (6-15)

  • Tukunallanpaqña qillqasqanmanta (16-18)

3  Wawqi-panillaykuna, chaynaqa ñuqaykupaqyá Diosta mañakuychik, chaynapi Jehova* Diospa palabran apurawman chiqinanpaq hinaspa chaskisqaykichikman hina ancha respetowan chaskisqa kananpaq.  Mañakuychiktaqyá mana allinniykuta munaqkunamanta hinaspa mana allin runakunamanta librasqa kanaykupaqpas, manamiki llapallankuchu iñiyniyuqqa kanku.  Señorninchikqa rimasqantam cumplin, payqa kallpanchasunkichikmi hinaspapas satanasmantam* harkaykusunkichik.  Chaymantapas señorninchikpa qatiqnin kasqaykuraykum qamkunamanta mana iskayrayanikuchu imam kamachisqayku ruwasqaykichikmanta hinaspa hamuq punchawkunapi ruwanaykichikmantapas.  Señoryá sunquykichikta yanapachun Diosta kuyanaykichikpaq hinaspa Cristorayku tukuy imata aguantanaykichikpaq.  Wawqi-panillaykuna, señor Jesucristopa sutinpim kamachimuykiku, mana allin kawsaq wawqi-panikunamanta karunchakunaykichikpaq, paykunaqa manam qamkunaman yachachisqaykuman hinachu kawsachkanku.  Qamkunaqa yachankichikmi ñuqayku hina imayna kawsaytaqa. Ñuqaykuqa qamkunawan kaspaykupas allintam kawsakurqaniku.  Manam pipa mikuynintapas denvaldellaqa mikurqanikuchu, aswanqa sudorniykupa suturisqanmi tuta-punchaw llamkarqaniku pitapas mana gastachinaykupaq.  Qamkunapas ñuqayku hina kanaykichikta munaspaykum ñuqaykuqa imapas mañakunaykupaq derechoyuq kachkaspaykupas mana imatapas mañakurqanikuchu. 10  Qamkunawan kachkaspaykupas kaynatam kamachirqaykiku: “Pipas mana llamkay munaqqa amataqyá mikuchunchu”, nispayku. 11  Ñuqaykuqa uyarichkanikum qamkuna ukupi wakinqa mana allin kawsasqankumanta, paykunas mana imapipas llamkaspanku runakunapa vidanman chapukuchkanku. 12  Chay runakunatam señorninchik Jesucristopa sutinpi kamachimuniku hinaspa anyamuniku hawkalla llamkanankupaq hinaspa kikinkupa llamkasqankuwan mikunankupaq. 13  Wawqi-panillaykuna, qamkunayá ichaqa ama amiychikchu allinkuna ruwaytaqa. 14  Sichum kay cartapi nimusqaykuta pipas mana kasukuptinqa, chay runamanta cuidakuychik* hinaspa ama hukllawakuychikchu chaynapi pinqakunanpaq. 15  Ichaqa ama enemigota hinachu qawaychik, aswanqa hinallayá rimapayaychik iñiqmasikichikta hina. 16  Hawkayay qukuq señorninchikyá tukuy tiempo hinaspa tukuy imapipas hawkayayta qusunkichik. Señorninchikyá llapaykichikwan kachun. 17  Ñuqa Pablom makiywanpuni kuyakuyniyta qillqamuykichik, kayna qillqamusqa hinaspa kayna letrakunawanmi llapallan cartaykuna qillqasqa kachkan. 18  Señor Jesucristopa ancha kuyakuyninyá llapallaykichikwan kachun.

Willakuykuna

Qaway: Palabrakuna entiendenapaq listata.
Kaypiqa nichkan: “Mana allinmantam”, nispam.
“Chay runamanta cuidakuychik” nispanqa: “Chay runa suti riqsiylla kachun”, ninantam nichkan.