Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

2 Pedro 3:1-18

  • Juicio punchawmanta burlakuq runakunamanta (1-7)

  • Jehova Dios mana unamuq kasqanmanta (8-10)

  • Imayna runa kasqanchikta qawarikunamanta (11-16)

    • Musuq cielomanta hinaspa musuq allpamanta (13)

  • Mana pantachisqa kanapaq cuidakunamanta (17, 18)

3  Kuyasqallaykuna kaywanqa iskay cartatañam qillqamuchkaykichik, qillqamuchkaykichikqa yuyarichispallaymi punta cartaypi hina allin yuyayniyuq kasqaykichikta kallpanchanaypaq.  Qillqamuchkaykichikqa Diospa mana huchayuq willakuqninkunapa* ñawpaqmantaraq willakusqankutam, hinaspapas salvaqninchik señorninchikpa kamachikuyninkunata yuyarinaykichikpaqmi, chay kamachikuyninkunataqa apostolkunamantam chaskirqankichik.  Puntataqa kaytayá yachaychik: Tukupay punchawkunapim rikurimunqa allin ruwaykunamanta asikuq runakuna, paykunaqa munasqallankutam ruwanqaku,  hinaspam ninqaku: “Cristom prometekurqa chayaramuspan kaypi kananpaq*, ¿maytaq chayamunchu? Abuelonchikkunapa wañukusqanmantaraqmi tukuy imapas hina kaqlla kachkan, chaynaqa kachkan runakunata Dios unanchasqanmantapacham”, nispanku.  Paykunaqa llullankutam yuyariyta mana munankuchu ñawpaq tiempopi cielokuna kasqanta, manataqmi yuyariyta munankuchu Diospa rimarisqallanwan kay allpa yakumanta sapaqchasqa kasqanta hinaspa yakupa chawpinpi kasqantapas.  Chaywanmi chay tiempopi runakuna chinkachisqa karqaku kay allpa pachata yaku pamparuptin.  Diospa rimarisqallanwantaqmi kunan kaq cielokunawan kay pachapas ninapaq sapaqchasqa kachkan, hinaspam juicio punchawkama waqaychasqa kachkan chaynataq mana allin runakuna wañuchisqa kanankukama.  Kuyasqallaykuna, kaytaqa amayá qunqaychikchu: Jehova* Diospaqqa waranqa watam huk punchaw hinalla, huk punchawñataqmi waranqa wata hina.  Jehova Diosqa manam runakunapa piensasqanman hinachu unamun prometesqankunata cumplinanpaqqa. Aswanqa qamkunawanmi pacienciakuchkan pipas chinkarunanta mana munaspan, payqa munachkan llapallan runakuna huchankumanta wanakunankutam. 10  Jehova Diospa punchawninqa hamunqa suwa hinam, chay punchawpim cielokuna tunrururuspan chaylla chinkanqa, hanaq pachapi hinaspa kay pachapi kaqkunapas llumpayta rupaspanmi chullunqa, sutilla qawachisqataqmi kanqa kay pachapas chaynataq kay pachapi tukuy ima kaqkunapas. 11  Tukuy kaykuna chayna chulluchisqa kanan kaptinqa, qawarikunaykichikmi imayna kawsasqaykichikta hinaspa imapas ruwasqaykichikta. Qamkunaqa chuyay-chuyaymi kawsakunaykichik hinaspapas Dios serviq kasqaykichiktam ruwasqaykichikwan qawachinaykichik. 12  Chayna kaspaykichikmi Jehova Diospa punchawnin chayamunanta qawan-qawanlla suyanaykichik, amamá chaytaqa qunqarunkichikchu, chay punchawpim cielokuna ninawan chinkachisqa kanqa, chaynataqmi hanaq pachapi hinaspa kay pachapi kaqkunapas llumpay rupaywan chullunqa. 13  Ñuqanchikmi ichaqa suyachkanchik prometewasqanchik musuq cielokunatawan musuq allpata, chaypim ichaqa tukuy imapas Diospa munasqanman hina suma-sumaq kanqa. 14  Chaynaqa kuyasqallaykuna, chaykunata suyachkaspaykichikqa tukuy atisqaykichiktayá ruwaychik chuyay-chuyayta Dios tarimusunaykichikpaq, chaynataq mana huchayuqta hinaspa paywan allinlla kaqta tarimusunaykichikpaq. 15  Chaymantapas amayá qunqaychikchu, señorninchikqa pacienciakuchkan salvakunanchikta munaspanmi. Chaymantam kuyasqa wawqinchik Pablopas Diosmanta yachay chaskisqanman hina qillqamusurqankichik. 16  Paymi llapallan cartankunapi chaykunataqa nimusurqankichikña, qillqamusqankunapa wakinqa sasa entiendenam. Chaykunatam mana yachayniyuqkuna hinaspa iñiyninkupi mana allin kaqkuna qiwichkanku Diospa wakin qillqankunata qiwisqankuman hina, chaytaqa ruwachkanku kikillanku chinkachisqa kanankupaqmi. 17  Chaynaqa kuyasqallaykuna, chaykunamanta ña yachachkaspaqa qawan-qawanllayá kaychik mana kasukuq runakuna mana allin ruwasqankuwan mana pantarachisunaykichikpaq, chaynapi kallpanchakusqaykichikpi mana pisiparunaykichikpaq. 18  Aswanqa hinallayá Diospa ancha kuyakuyninta chaskiychik, hinaspapas hinallayá señorninchik hinaspa salvaqninchik Jesucristomantapas yachaychik. Payyá hatunchasqa kachun kunanpas hinaspa wiñaykamapas. Amen.

Willakuykuna

Utaq: “Profetakunapa”. Qawaytaq: Palabrakuna entiendenapaq listata.
Griego rimaypiqa: “Parousia”, ninmi. Chay ninanqa: “Ladonpi tarikuy”, ninanmi. Qawaytaq: Palabrakuna entiendenapaq listata.
Qaway: Palabrakuna entiendenapaq listata.