Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

2 Pedro 2:1-22

  • Diosmanta yachachiq tukuqkuna rikurimunanmanta (1-3)

  • Diosmanta yachachiq tukuqkuna castigasqa kanankumanta (4-10a)

    • Angelkuna tartaro nisqaman wischusqa kasqankumanta (4)

    • Sinchi paramanta, Sodoma hinaspa Gomorra llaqtamanta (5-7)

  • Diosmanta llulla yachachiqkuna imayna kasqankumanta (10b-22)

2  Chaywanpas Israel runakuna ukupim karqa Diosmanta willakuq tukuqkuna*, chaynam qamkuna ukupipas kanqa yachachiq tukuqkuna. Paykunaqa mana musyayllam iñiynikichik chiriyananpaq rakinakuykunata rikurichinqaku, hinaspam rantiqninku dueñonkutapas qipanchanqaku. Chaynaqa kanqa chaylla chinkachisqa kanankupaqmi.  Chaymantapas, paykunapa mana pinqakuspa mana allin ruwasqankutam achkallaña qatipakunqaku, hinaptinmi paykunarayku Diospa ñanninmantapas mana allinta rimanqaku,  paykunaqa kanku imatapas llumpayta munapayaqkunam, chaymi rimayninkuwan engañasuspaykichik qamkunawanpas munasqankuta ruwanqaku. Juzgasqa kanankupaq ñawpaqmantaraq tanteasqa punchawmi ichaqa chaylla chayaramunqa hinaptinmi chinkachisqa kanqaku.  Diosqa manam pampacharqachu huchallikuq angelkunatapas, aswanmi paykunataqa tartaro* nisqaman wischuykurqa hinaspam juzgasqa kananku punchawkama llumpa-llumpay tutayaypi cadenarurqa.  Chaymantapas Diosqa manataqmi pampacharqachu ñawpaq runakunatapas, sinchi paratam kachaykamurqa mana allin runakunaman, hinaspam Noeytawan qanchis runakunallata amparaspan salvarqa, payqa Dios allin ruwaq kasqanmantam willakurqa.  Sodoma hinaspa Gomorra llaqtakunata uchpayanankama kañaspanmi qawachirqa qipa punchawkunapi mana kasukuq runakunata ima pasananmanta.  Allin ruwaq Lot sutiyuq runatañataqmi libraykurqa, payqa anchatam llakikurqa mana kasukuq runakunapa mana pinqakuspa mana allin ruwasqankuwan.  Lotqa chay mana kasukuq runakunawan yachaspanmi* mana allinkuna ruwasqankuta qawaq hinaspa uyariq, chaymi sapa punchaw llumpayta llakikuq.  Chaynaqa, Jehova* Diosqa yachanmi sasachakuykunamanta serviqninkuna libraytaqa, mana allin ruwaq runakunatañataqmi juicio punchawpi chinkachinanpaq waqaychachkan. 10  Diosqa aswanraqmi chinkachinqa kamachikuqkuna despreciaqkunata hinaspa hukkunata qanra vidaman wichichispan pinqaypi churaqkunataqa. Paykunaqa kanku mana respetakuqkunam hinaspa munasqankuta ruwaqkunam, manataqmi Diospa hatunchasqan runakunatapas respetankuchu. 11  Angelkunam ichaqa aswan atiyniyuq hinaspa aswan munayniyuq kachkaspankupas, Jehova Diosta respetasqankurayku chay llulla yachachiqkunataqa mana kaminkuchu. 12  Chay runakunaqa kanku animalkuna hinam, animalkunaqa nacenku hapirachikuspanku wañuchisqa kanankupaqmi, chay runakunaqa mana yachasqanku kaqkunamantam mana allinkunata rimanku, paykunaqa mana allinta ruwasqankupim wañunqaku. 13  Chaynapim mana allin ruwasqankurayku mana allinpi tukunqaku. Paykunaqa aychankupa munasqanta punchawpi ruwasqankumantam kusikunapaq kasqanta piensanku, paykunaqa kanku runapa pachanpi qacha* hinam chaynataq runapa uyanpi millakuypaq herida hinam, qamkunawan mikuspankupas llulla yachachikuykunawan engañaspankum kusikunku. 14  Paykunaqa anchatam munanku hukwan pierdekuyta*, manataqmi aminkuchu huchallikuytapas, iñiyninkupi mana allin kaqkunatapas sacrellawanñam* engañanku, sunqunkupipas llumpaytam imatapas munapayanku*, paykunaqa ñakasqa churikunam kanku. 15  Allin ñanta saqiruspankum pantaypiña purichkanku, paykunaqa Diosmanta willakuq tukuq* Balaampa ruwasqantañam qatipakuchkanku, Balaamqa Beor sutiyuq runapa churinmi karqa, payqa anchallatañam munarqa mana allin ruwasqanmanta pagon chaskiyta, 16  ichaqa corregisqam karqa allin kaqta mana ruwasqanrayku. Huk asnom mana rimaq kachkaspanpas runa hina rimariruspan Balaam runapa loco hina ruwananta harkarurqa. 17  Chay runakunaqa kanku chaki pukyu hinam, sinchi wayrapa apasqan puyukuna hinam, paykunaqa llumpa-llumpay tutayaypaqñam kachkanku. 18  Rimasqanku suma-sumaqña kaptinpas mana imapaq valeqmi, paykunaqa mana allin runakunamanta chayllaraq karunchakuqkunatam engañanku, chaynatam ruwanku aychapa munasqanwan hinaspa mana pinqakuspa mana allinta ruwasqankuwan. 19  Kikinkupuni huchapa sirvienten kachkaspankupas libre kaytaraqmi prometesunkichik. Pipas vencechikuqqa venceqninpa sirvientenmi rikurirun. 20  Pipas señorninchik hinaspa salvaqninchik Jesucristomanta imam kaqta yacharuspan mana allinkunamanta ayqikuruspaña kaqllamanta chaykunata ruwaqqa hinaspa chaykunawan vencechikuqqa, imayna tarikusqanpim rikurirun qallariypi imayna kasqanmantapas aswan mana allinraq. 21  Chayna runapaqqa aswan allinmi kanman karqa allin ñanta imam kaqta mana riqsiynin, riqsichkaspanña chaskisqan chuya kamachikuykunamanta karunchakunanmantaqa. 22  Paykunapim cumplikurun kayna rimay: “Allquqa aqtusqantam kaqllamanta mikurun, bañasqa kuchiñataqmi mitupi huktawan quchparun”, niq.

Willakuykuna

Utaq: “Profeta tukuqkuna”.
“Tartaro” ninanqa, presochasqa hina chaynataq pinqaypi tarikuymi, chayna kanankupaqmi Noeypa tiemponpi mana kasukuq angelkunata Dios churarqa.
Utaq: “Tiyaspanmi”.
Qaway: Palabrakuna entiendenapaq listata.
Utaq: “Qanra”.
Utaq: “Paykunapa ñawinkupas hukwan pierdekuyllapiñam”.
Utaq: “Yachaysapa kaspankum”.
Utaq: “Sunqunkupas listom kachkan imatapas munapayanankupaq”.
Utaq: “Profeta tukuq”.