Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

2 Corintios 1:1-24

  • Qillqay qallarisqanmanta (1, 2)

  • Sasachakuykunapi kaptinchik sunqunchikta Dios tiyaykachisqanmanta (3-11)

  • Viajananpaq Pablo tanteachkaspanpas mana risqanmanta (12-24)

1  Diospa munayninpi Cristo Jesuspa apostolnin ñuqa Pablom, wawqinchik Timoteopiwan kay cartata qillqamuykichik. Qillqamuykichikqa Corinto llaqtapi Diospi iñiqkunamanmi* hinaspa enteron Acaya lawpi Diospa llapallan runankunamanmi*:  Qamkunapaqyá kachun taytanchik Diospa hinaspa señor Jesucristopa ancha kuyakuynin chaynataq hawkayayninpas.  Hatunchasqayá kachun señorninchik Jesucristopa taytan Diosqa, payqa llumpay llakipayakuq taytam hinaspa tukuy imapi sunqu tiyaykachiq Diosmi,  paymi tukuy sasachakuyninchikpi sunqunchikta tiyaykachin, chaynapi ñuqanchikpas tukuy ima sasachakuypi kaqkunata Diospa kallpanchawasqanchikman hina sunqunkuta tiyaykachinanchikpaq.  Imaynam Cristorayku tukuy ima ñakariykunapi kanchik, chaynallataqmi Cristontakama tukuy imapipas sunqunchik tiyaykachisqa kachkan.  Chaynaqa, ñuqaykupa ñakarisqaykuqa kallpanchasqa hinaspa salvasqa kanaykichikpaqmi, llakipi kaspayku kallpanchasqa kasqaykupas qamkuna llakipi kaspa kallpanchasqa kanaykichikpaqmi, chaynapi ñuqayku hina qamkunapas ñakarispaykichik hinalla takyanaykichikpaq.  Ñuqaykuqa manam iskayrayanikuchu qamkuna allinta takyanaykichikmantaqa, imaynam ñuqayku hina ñakarichkankichik chaynataqmi ima llakikichikpipas ñuqayku hina kallpanchasqa kankichik.  Wawqi-panillaykuna, Asia provinciapi ñakarisqaykumanta yachanaykichiktam munaniku. Chaypim hatu-hatun sasachakuypi karqaniku manaña kallpaykupas kanankama, manañam kawsaytapas piensarqanikuñachu.  Arí, ñuqaykuqa wañukuytañam piensarqaniku. Chayqa karqa mana kikillaykupi hapipakunaykupaqmi, aswanqa wañuqkuna kawsarichiq Diosllapiña hapipakunaykupaqmi. 10  Paymi chayna wañuymanta libraykuwarqaku, qipa punchawtapas librawanqakum, ñuqaykuqa manam iskayrayanikuchu librawanankumantaqa. 11  Qamkunapas yanapawankikumanmi ñuqaykupaq Diosta tukuy sunquykichikwan mañakuspaykichik, chaynapim yanapakuy chaskisqaykumanta achka runakuna Diosta agradecekunqaku, yanapakuy chaskisqaykuqa achka runakuna ñuqaykupaq Diosta mañakusqankuraykum. 12  Alabakunikuqa chuya sunqu kasqaykumanta hinaspa Dios kuyawaptinku mana engañakuq kasqaykumantam, chaynatam kawsarqaniku runakunapa qayllanpi, aswanqa qamkunapa qayllaykichikpi, chaynataqa kawsarqaniku manam runakunapa yachachisqankuman hinachu aswanqa Diospa ancha kuyakuyninman hinam, chayna kasqanmantam concienciayku willakun. 13  Ñuqaykuqa qillqamuchkaykiku entiendesqallaykichikmanta hinaspa leey atisqallaykichikmantam, ñuqaqa munanim kaykunamanta hinalla lliwta entiendenaykichikta, 14  imaynam wakinta entiendesqaykichikman hina. Ñuqaykuqa qamkuna alabakunaykichikpaqmi kaniku, chaynallataqmi qamkunapas señorninchik Jesuspa punchawninpi ñuqaykupa alabakunaykupaq kankichik, chaykunamantam wakinta entiendenkichik. 15  Chaymi qamkunamanta mana iskayrayaspay puntata qamkuna watukuq hamuyta munarqani chaynapi kaqmanta kusikunaykichikpaq. 16  Arí, Macedonia lawman riq hinam qamkuna watukamuyta munarqani, Macedoniaman chayaruspaypas qamkunamanmi kutimuyta munarqani, chaynapi Judeaman aviawanaykichikpaq. 17  Yachasqaykichikpi hinapas qamkunaman hamuyta munaspayqa manam yanqallachu nirqaykichik. Icha, ¿runakunapa piensasqanman hinachu imatapas tanteachkani “arí” nichkaspay “manam” nirunaypaq? 18  Diospi hapipakuychik chiqap rimasqaykumanta, ñuqaykuqa manam “arí” nichkaspaykuqa “manam” niymankuchu. 19  Chaymantapas, Silvanopa, Timoteopa hinaspa ñuqapa qamkunaman willasqayku Diospa churin Jesucristoqa manam “arí” nichkaspanqa ninmanchu “manam” nispanqa. Paypa “arí” nisqanqa chaynapunim. 20  Diospa rimasqankunaqa haykaña kaspanpas lliwmi Cristopi cumplikun*, chaymi paynintakama “amen” ninchik, chaynapi Dios hatunchasqa kananpaq. 21  Ichaqa Diosmi garantizawanchik qamkunapas chaynataq ñuqaykupas Cristopa kasqanchikta, Diostaqmi ñuqanchiktaqa sapaqchawarqanchik. 22  Paytaqmi sellowan marcawarqanchik, quykuwanchiktaqmi chaskinanchik kaqmanta garantiatapas, chayqa sunqunchikpi chuya espiritum*. 23  Diospa ñawpaqninpim vidayrayku juraspay nini: Ñuqaqa qamkunata astawan mana llakichinayraykum Corinto llaqtamanqa manaraq hamurqanichu. 24  Ñuqaykuqa manam iñiynikichikmanta munaychakuqchu kaniku, aswanqa kusisqa kanaykichikpaq yanapakuqllam, qamkunaqa iñiynikichikraykum allinta sayachkankichik.

Willakuykuna

Utaq: “Diospa congregacionninmanmi”. Qawaytaq: Palabrakuna entiendenapaq listata.
“Diospa llapallan runankunamanmi”, utaq: “Llapallan chuya runakunamanmi”.
Kaypiqa nichkan: “Arí”, nispam.
Utaq: “Diospa atiyninmi”. Qawaytaq: Palabrakuna entiendenapaq listata.