1 Timoteo 3:1-16

  • Iñiqkunamanta nanachikuq imayna kanankumanta (1-7)

  • Iñiqkunapi punta apaqkunapa yanapaqninkuna imayna kanankumanta (8-13)

  • Diosta serviyqa pakasqa hina kasqanmanta (14-16)

3  Chiqapmi kayqa: Iñiqkunamanta nanachikuq* kananpaq pipas kallpanchakuqqa, allin llamkaytam munachkan.  Iñiqkunamanta nanachikuqqa* kanan: Mana pipapas anyananmi, huk warmiyuqlla, imapipas controlakuq, allin yuyaywan imapas ruwaq, mana ukunpi-hawanpi imapas ruwaq, samaykachikuq*, yachachinanpaqpas allin preparasqa,  mana sinkakuq, peleollapi mana puriq, entiendeq, mana atipanakuq, qullqilla mana kuyaq  hinaspa wasinpi kaqkunata allinta kamachiq, churinkunapas kananku tukuy imapi kasukuq hinaspa allin kawsakuqmi.  (Wasinpipuni kamachiyta mana atispanqa, ¿imaynamá Diospi iñiqkunamantaqa* nanachikunman?).  Iñiqkunamanta nanachikuyta* munaqqa manam chayllaraq iñikuqqa kananchu, yanqañataq hatun tukuruspan diablo hina juzgasqa kanman.  Chaynallataqmi mana iñiq runakunapapas respetanan kanan, chaynapi pinqaypi mana kananpaq hinaspa diablopa tuqllanman mana wichiykunanpaq.  Iñiqkunapi punta apaqkunapa yanapaqninkunapas* chaynallataqmi kananku: Allin respetana, mana iskay-kimsa rimaq hinaspa vinota mana llumpay tomaq, paykunaqa manataqmi imapas ganakuyllataña munaqchu kananku.  Paykunaqa chuya concienciayuq kaspankum Diospa kaq pakasqa kaqkunaman hapipakunanku, chay pakasqa kaqqa iñiymi. 10  Chaymantapas servinankupaq allin utaq mana allin kasqantayá puntataqa qawaychik, imamantapas hukkunapa mana tumpasqan kaspanqa iñiqkunata serviqyá kachun. 11  Chaynallataqmi warmikunapas kananku allin respetana, runamasinpa contranpi mana rimaq, imapipas controlakuq hinaspa tukuy imapi Diosman sunqu. 12  Iñiqkunapi punta apaqkunapa yanapaqninkunaqa* kananku huk warmiyuqllam hinaspa wasinpi kaqkunatawan churinkunata allintapuni kamachiqmi. 13  Allintapuni llamkaspan serviqkunaqa hukkunapa allin qawasqan kanankupaqmi kallpanchakuchkanku, kallpanchakuchkankutaqmi Cristo Jesuspi iñiymanta mana recelaspa rimanankupaqpas. 14  Kaykunatam qillqamuchkayki, ichaqa chayllam qanman watukaykamuyta munachkani. 15  Sichum unaramuptiyqa* imaynam Diospa wasinpi allin kawsayta yachanaykipaqmi qillqamuchkayki, chay wasiqa kawsaq Diospi iñiqkunam*, paykunaqa chiqap kaqtam takyachin hinaspa defiendenku. 16  Mayna hatunmi tukuy sunquwan Diosta serviyqa, chayqa pakasqa kaqmi, chay pakasqa kaqqa kaymi: ‘Jesusmi runaman tikrakururqa, espiritu cuerpoyuq rikuriruspanmi allin ruwaqpaq qawasqa karqa, payqa angelkunamanmi rikuriykurqa, paymantaqa llapallan nacionkunapim willakurqaku, paypim runakuna iñirqaku, payqa hatunchasqam hanaq pachapipas chaskisqa karqa’.

Willakuykuna

Utaq: “Iñiqkunata cuidaq”.
Utaq: “Iñiqkunata cuidaqqa”.
Utaq: “Allin runa”.
Utaq: “Diospa congregacionninmantaqa”. Qawaytaq: Palabrakuna entiendenapaq listata.
Utaq: “Iñiqkuna cuidayta”.
Qaway: Palabrakuna entiendenapaq listata.
Qaway: Palabrakuna entiendenapaq listata.
Utaq: “Demoramuptiyqa”.
Utaq: “Diospa congregacionninmi”.