Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

1 Tesalonicenses 5:1-28

  • Jehova Diospa punchawnin hamunanmanta (1-5)

    • “Hawkañam, seguroñam kachkanchik” nispa ninankumanta (3)

  • Rikchasqalla kananchikmanta hinaspa yuyaywan kawsakunamanta (6-11)

  • Kallpanchasqanmanta (12-24)

  • Tukunallanpaqña qillqasqanmanta (25-28)

5  Wawqi-panillaykuna, tiempokunamantawan señalasqa punchawkunamanta qillqamunaytaqa manam necesitankichikñachu.  Qamkunaqa allintam yachankichik Jehova* Diospa punchawninqa, tutapi suwa hamuchkaq hina hamunanta.  Runakunam ninqaku: “Hawkañam, seguroñam kachkanchik”, nispanku. Hinachkaptinmi qunqayllamanta paykunapa chinkachisqa kaynin chaylla chayaramunqa, imaynam unqukunanpaq wiksayuq warmipa nanaynin chayaramusqan hina, manapunim lluptinqakuchu.  Wawqi-panillaykuna, qamkunaqa manam tutayaypichu kachkankichik suwata hina chay punchaw hayparamusunaykichikpaqqa.  Qamkunaqa llapallaykichikmi achkipa hinaspa punchawpa churinkuna kankichik, ñuqanchikqa manam tutamantachu nitaq mana achkipa kasqanmantachu kanchik.  Chaynaqa, amañayá wakinkuna hinachu puñusun, aswanqa rikchasqallayá kasunchik hinaspapas yuyaywanyá kawsasunchik.  Puñuqkunaqa tutam puñunku, sinkakuqkunapas tutataqmi sinkakunku.  Punchawmanta kaqkunayá ichaqa yuyaywan kawsasunchik, hinaspayá soldadopa qasqun harkaqwan churakuq hina iñiywan chaynataq kuyakuywan churakusunchik, chaymantapas cascowan hinayá churakusun salvasqa kayta suyasqanchikwan.  Diosqa akllawarqanchik manam piñakuyninta chaskinanchikpaqchu, aswanqa señorninchik Jesucristontakama salvasqa kananchikpaqmi. 10  Paymi ñuqanchikrayku wañukurqa, chaynapi rikchaq hina tarikuspapas utaq puñuypi hina kaspapas paywan kuska kawsananchikpaq. 11  Chaynaqa, hinallayá kallpanchanakuychik hinaspa yanapanakuychik kunan chayna ruwasqaykichikman hina. 12  Wawqi-panillaykuna ruegakamuykichikmi, qamkuna ukupi llamkaqkunapaqyá riqsikuynikichik kachun, paykunaqa consejasuchkankichikmi hinaspapas señorninchikta servispam kamachisuchkankichik, 13  chaymantapas qamkunapaq llamkasqankuraykuyá anchata kuyaychik. Qamkunapurapas hawkallayá kawsakuychik. 14  Wawqi-panillaykuna ruegakamuykikutaqmi mana kasukuqkunata anyanaykichikpaq, hukmanyasqakunatapas kallpanchanaykichikpaq, mana kallpayuqkunatapas yanapaykunaykichikpaq hinaspa llapallanwanpas pacienciakunaykichikpaq. 15  Amayá mayqinnikichikpas mana allinta ruwasuptikichikqa mana allinwanqa kutichiychikchu, aswanqa tukuy tiempoyá allin kaqkunata ruwaychik, chaynatayá llapallanwanpas ruwaychik. 16  Tukuy tiempoyá kusikuychik. 17  Diostayá tukuy tiempo mañakuychik. 18  Tukuy imamantayá Diosman graciasta quychik. Chaykunata ruwanaykichiktam Diosqa munan Cristo Jesuspa qatiqnin kasqaykichikrayku. 19  Amayá Diospa espiritunpa ruwaynintaqa amachaychikchu. 20  Respetaychikyá Diospa qusqan willakuykunata. 21  Tukuy imamantayá allinta yachaychik, chaymantapas allintayá hapipakuychik allin kaqkunaman. 22  Karunchakuychikyá tukuy mana allin kaqkunamanta. 23  Hawkayaypi kaq hinaspa hawkayay qukuq kikin Diosyá suma-sumaqta chuyanchasunkichik. Señor Jesucristo chayaramuspa kaypi kanan* tiempokamayá iñiqkunapa imayna kasqaykichik, vidaykichik* hinaspa cuerpoykichik mana huchayuq hinaspa chuyay-chuyayña kachun. 24  Qayasuqnikichikqa rimasqanta cumpliqmi, chaynatam payqa ruwanqa. 25  Wawqi-panillaykuna, hinallayá ñuqaykupaq Diosta mañakuychik. 26  Llapallan wawqi-paninchikkunatayá muchaykuspa rimakuykuychik. 27  Señorpa sutinpim tukuy sunquywan mañakamuchkaykichik llapallan iñiqkunapaq kay cartata leenaykichikpaq. 28  Señor Jesucristopa ancha kuyakuyninyá qamkunawan kachun.

Willakuykuna

Qaway: Palabrakuna entiendenapaq listata.
Griego rimaypiqa: “Parousia”, ninmi. Chay ninanqa: “Ladonpi tarikuy”, ninanmi. Qawaytaq: Palabrakuna entiendenapaq listata.
Utaq: “Almaykichik”. Qawaytaq: Palabrakuna entiendenapaq listata.