Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

1 Tesalonicenses 4:1-18

  • Mana huchapakunapaq rimapayasqanmanta (1-8)

  • Aswan mastaraq kuyanakunamanta (9-12)

    • Hukpa vidanman mana chapukunamanta (11)

  • Cristopa qatiqnin kachkaspa wañukuqkuna puntata kawsarimunankumanta (13-18)

4  Chaynaqa wawqi-panillaykuna, qamkunatam yachachirqaykiku Diospa munasqanman hina imayna kawsanaykichikpaq, chaynatamá qamkunaqa kawsachkankichik. Ñuqaykuqa señor Jesuspa sutinpim ruegakuspa mañakuykiku aswanraq chaynata kawsanaykichikpaq.  Qamkunaqa yachankichikmi señor Jesuspa sutinpi kamachikuykuna qusqaykutaqa.  Diosqa munan chuya kanaykichiktam hinaspa mana huchapakunaykichiktam*.  Sapakamayá cuerpoykichikta kamachiychik chuya kanaykichikpaq hinaspa Diospa chaskisqan kanaykichikpaq.  Amayá Diosta mana riqsiq huk law nacionniyuq runakuna hinaqa qariwan utaq warmiwan puñuy munapayaywanqa aysachikuychikchu.  Amataqyá pipas iñiqmasintaqa mana allintaqa ruwachunchu nitaq contranpiqa imatapas ruwachunchu, Jehova* Diosqa tukuy chay mana allin ruwaykunamantam castiganqa. Ñam chaykunamantaqa willarqaykikuña hinaspapas chunkay-chunkaytam nirqaykikuña.  Diosqa manam millakuypaq kaqkunata ruwananchikpaqchu qayawarqanchik, aswanqa chuya kananchikpaqmi.  Kay kamachikuykuna mana kasukuqqa manam runatachu qipanchachkan aswanqa chuya espiritu* qusuqnikichik Diostam.  Wawqi-panintin hina kuyanakuymantaqa manañam necesitankichikchu qillqamunaykutaqa, qamkunaqa imayna kuyanakunaykichikpaq Diospa yachachisqanmi kankichik. 10  Chaynatapunim ruwachkankichik Macedonia lawpi llapallan iñiqkunawan, chaywanpas wawqi-panillaykuna ruegakamuykikum aswan mastaraq kuyanakunaykichikpaq. 11  Kallpanchakuychikyá hawkalla kawsakunaykichikpaq, amataqyá runapa vidanmanqa chapukuychikchu, chaymantapas imayna kamachisqaykuman hinayá makikichikwan anchata llamkaychik, 12  chaynapi Diosta mana riqsiq runakunapa respetasqan kawsakunaykichikpaq chaynataq imapas mana pisipusunaykichikpaq. 13  Wawqi-panillaykuna, munachkanikutaqmi wañuqkunapa imayna kanankumanta yachanaykichiktapas, chaynapi mana suyakuyniyuqkuna hina ama llakikunaykichikpaq. 14  Sichu ñuqanchik iñinchik Jesuspa wañukusqanpi hinaspa kawsarimusqanpipas, hinaspaqa iñinchiktaqmi Jesuspa qatiqnin kachkaspa wañukuqkunata Jesuswan kuska kananpaq Dios kawsarichimunanpipas. 15  Kaykunataqa nikiku Jehova Diospa palabranman hinam: Señorninchik chayaramuspan kaypi kanan* tiempokama kawsaqkunaqa, manam imaraykupas wañuqkunamanta puntataqa hanaq pachamanqa risunchu. 16  Kikin señorpunim hanaq pachamanta uraykamunqa kamachikuqpa qapariyninwan, angelkunata kamachiqpa qayakuyninwan hinaspa Diospa cornetillanpa waqayninwan, hinaptinmi Cristopa qatiqninkunamanta wañuqkuna puntata kawsarimunqaku. 17  Chaymantañataqmi ñuqanchik manaraq wañuqkunaqa paykunawan kuska puyukunapa kasqanman huqarisqa kasunchik señorwan altopi tupananchikpaq, hinaspam señorwan kuska wiñaypaq kasunchik. 18  Chaynaqa, ama qunqaspayá kay palabrakunawan kallpanchanakuychik.

Willakuykuna

Kayqa, qari kayninwan utaq warmi kayninwan millakuypaq kaqkunata ruwaymi. Qawaytaq: Palabrakuna entiendenapaq listata.
Qaway: Palabrakuna entiendenapaq listata.
Utaq: “Diospa atiynin”. Qawaytaq: Palabrakuna entiendenapaq listata.
Griego rimaypiqa: “Parousia”, ninmi. Chay ninanqa: “Ladonpi tarikuy”, ninanmi. Qawaytaq: Palabrakuna entiendenapaq listata.