Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

1 Pedro 5:1-14

  • Diospa ovejankunata allinta michinamanta (1-4)

  • Humilde hinaspa qawan-qawanlla kanamanta (5-11)

    • Tukuy llakikuyninchikta Diosman qunamanta (7)

    • Diablo leon hina kasqanmanta (8)

  • Tukunallanpaqña rimasqanmanta (12-14)

5  Kunanñataqmi qamkuna ukupi kaq punta apaqkunata* rimapayamuykichik. Ñuqapas iñiqkunapi punta apaqmasikichikmi* kani, rikurqanitaqmi Cristopa ñakarisqankunatapas, chaymantapas llapallanchik hatunchasqa kaptinchikmi akllasqakunawan kuska hatunchasqa kasaq. Qamkunatam ruegakamuni:  Makikichikpi Diospa ovejankunatayá allinta michiychik, qamkunaqa paykunata cuidanaykichikpaqmi kamachisqa kachkankichik, michiychikqa amayá hikutasqallachu, aswanqa Diospaq hinayá sumaqta michiychik. Amataqyá imatapas chaskiyta munaspallachu, aswanqa tukuy sunqumantayá.  Ovejakunataqa michiychik amayá munaychakuq hinachu, aswanqa paykunapa qatipakunanpaq hinayá kaychik, paykunaqa Diospa herencianmi.  Michiqkunapa kamachiqnin rikuriramuptinmi suma-sumaq hinaspa mana tukuq premiota* chaskinkichik.  Chaynallataqyá qamkunapas mozokuna, mayor qarikunata tukuy imapi kasukuychik. Ichaqa ama hatun tukuspayá llapallaykichik kawsakuychik, Diosqariki hatun tukuqkunapa contranpim kachkan, ichaqa ancha kuyakuynintam qawachin mana hatun tukuqkunamanqa.  Chaynaqa, ancha atiyniyuq Diospa makinpiyá* churakuychik, chaynapi tiempo chayaramuptin hatunchasunaykichikpaq,  chaynallataqyá tukuy llakikichiktapas Diospa makinpi saqiychik, payqariki qamkunamantam nanachikun.  Allin yuyayniyuq hinaspa qawan-qawanllayá kaychik, enemigoykichik diabloqa leon hinam muyuriqnikichikpi ñawrawyaspan purichkan pitapas mikurunanpaq.  Paypa contranpiyá qaqa hina sayaychik iñiynikichikpi, yachasqaykichikpi hinapas enteron pachapi lliw iñiqmasikichikkunapas chaynatam ñakarichkanku. 10  Pisi tiempollapas ñakariruptikichikmi ancha kuyawaqninchik Diosqa tukuy imapi yachachisunkichik, payqa wiña-wiñaypaq kanchariyninmanmi Cristowan huklla kasqaykichikrayku qayasurqankinchik. Yanapasunkichikmi qaqa hina sayaq kanaykichikpaq, kallpayuq hinaspa allin takyaq kanaykichikpaq. 11  Diosqa wiña-wiñaypaq atiyniyuqmi. Amen. 12  Silvanowanmi* iskay-kimsa palabrakunata qillqamuchkaykichik, payqa confianza iñiqmasinchikmi, qillqamuchkaykichikqa kallpanchanaypaqmi hinaspa Diospa ancha kuyawasqanchik chiqap kasqanmanta tukuy sunquywan willanaypaqmi. Qamkunaqa Diospa ancha kuyasusqaykichikpiyá allinta takyaychik. 13  Babilonia lawpi qamkuna hina akllasqa kaqmi* kuyakuyninta apachimusunkichik, churiy hina Marcospas allinllachu nimusunkichikmi. 14  Llapallaykichikyá kuyakuywan muchaykanakuspa rimaykanakuychik. Llapallaykichikyá hawkalla kawsakuychik, qamkunaqa Cristowanmi huklla kachkankichik.

Willakuykuna

Utaq: “Ancianokunata”. Qawaytaq: Palabrakuna entiendenapaq listata.
Utaq: “Ancianomasikichikmi”.
Kaypiqa nichkan: “Coronata”, nispam.
Kaypiqa nichkan: “Diospa atiyniyuq makinpiyá”, nispam.
Huknin sutinmi: “Silas”.
Griego rimaypi “akllasqa kaqmi” nispanqa warmimantam rimachkan, chay warmiqa tupachisqam kachkan Babiloniapi iñiqkunawan.