Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

1 Pedro 2:1-25

  • Diospa palabranmanta yachayta maskanamanta (1-3)

  • Kawsaq rumikuna hina pirqasqa kaspanku chuya espiritupa yanapakuyninwan hatarichisqa wasi kanankumanta (4-10)

  • Diosta mana riqsiq runakunawan forasterokuna hina kawsanamanta (11, 12)

  • Kasukunamanta (13-25)

    • Qatipakunanchikpaq Cristo kasqanmanta (21)

2  Chaynaqa, saqiychikyá tukuy mana allin ruwaykunata, llullakuyta, iskay uya kayta, envidianakuyta hinaspa pimantapas mana allin rimayta.  Chayllaraq naceq wawakuna ñuñuta maskachkaq hinayá qamkunapas astawan yachayta munaychik Diospa chiqap palabranmanta, chaywan wiñaspa salvasqa kanaykichikpaq, Diospa palabranqa mana imawanpas yapasqa leche hinam.  Qamkunaqariki yachankichikmi señorpa sumaq sunqu kasqantaqa.  Qamkunaqa señorninchikmanmi asuykurqankichik, payqa kawsaq rumi hinam, paytam runakuna wischupakurqaku, Diospaqmi ichaqa akllasqa ancha valorniyuq rumi.  Señorman asuykuspaykichikmi kawsaq rumikuna hina pirqasqa kachkankichik. Pirqasqaqa kachkankichik chuya espiritupa yanapakuyninwan hatarichisqa wasi kanaykichikpaqmi, chaynapi chuya sacerdotekuna kanaykichikpaq hinaspa chuya espiritupa yanapakuyninwan Jesucristorayku munasqanman hina ofrendakunata Diosman qunaykichikpaq.  Chayraykum Diospa qillqan nin: “Ñuqam Sion nisqapi cimientopaq churani wasi pirqapa esquinanpi hapiq kuyayllapaq akllasqa rumita, pipas chay rumipi iñiqqa manam haykapipas pesakunqachu*”, nispa.  Chaynaqa iñisqaykichikraykum chay rumiqa qamkunapaq ancha valorniyuq, mana iñiqkunapaqmi ichaqa kayna qillqasqa kachkan: “Pirqaqkunapa wischupakusqanku rumiqa wasi pirqapa esquinanpi hapiq rumiñam rikurirun”, niq.  Qillqasqataqmi kachkan: “Chay rumiqa mitkana rumim hinaspa purina ñanpi urmanapaq hatun rumim”, niqpas. Paykunaqa Diospa palabranta mana kasukusqankuraykum mitkanku, chaynam kananku karqa.  Qamkunam ichaqa kankichik: Akllasqa ayllukuna, sacerdote kachkaspa kamachiqkuna, chuya llaqta hinaspa Diospaq sapaqchasqa runakuna, chaynapi Diospa alli-allin kasqanmanta tukuy hinastinpi willakunaykichikpaq, paymi tutayaymanta qayasurqankichik admirakuypaq achkiyninpi kanaykichikpaq. 10  Ñawpaqtaqa manam Diospa llaqtanchu karqankichik, kunanmi ichaqa Diospa llaqtanña kachkankichik. Ñawpaqtaqa mana llakipayasqam karqankichik, kunanmi ichaqa llakipayasqaña kachkankichik. 11  Kuyasqallaykuna, huk law llaqtayuqta hinaspa forasterokunata hinam ruegakuykichik, aychaykichikpa mana allinkuna munasqantaqa amayá ruwaychikchu, chaykunaqa contraykichikpim peleachkan. 12  Diosta mana riqsiq runakunapa qayllanpiyá allinta kawsaychik, chaynapim hucha ruwaqmanta hina contraykichikpi rimachkaspankupas, allin ruwasqaykichikta qawaspanku cuenta mañaq hamusqan punchawpi Diosta yupaychanqaku. 13  Señorninchikraykuyá kasukuychik runapa churasqan autoridadkunata, kasukuychikyá kamachiqkunatapas, paykunaqa aswan munayniyuqmi kanku. 14  Kasukuychiktaqyá kamachikuqpa churasqan autoridadkunatapas, paykunaqa churasqam kachkanku mana allin ruwaqkunata castiganankupaq hinaspa allin ruwaqkunatañataq hatunchanankupaq. 15  Diosqa munan allin kaqta ruwaspa mana entiendeq runakunapa yanqakuna rimasqanta upallachinaykichiktam. 16  Libre kaq runakuna hinayá kawsaychik, amataqyá libre kasqaykichikraykuqa mana allinkunataqa ruwaychikchu, aswanqa Diosta serviq runakuna hinayá kawsaychik. 17  Llapallan runakunata respetaychik, llapallan iñiqmasikichikta kuyaychik, Diostapas hatunchaychik, kamachikuq runatapas respetaychik. 18  Sirvientekunapas patronninkutayá respetaspa tukuy imapi kasukuchunku, amayá entiendeqkunallatachu nitaq allin patronkunallatachu, aswanqa kasukuchunkuyá imapas ruwasqankuwan mana contentakuq kaqkunatapas. 19  Ancha allinmi, Diospaq allin concienciayuq kayta munaspa sasachakuykunata aguantaspan pipapas mana kaqmanta ñakarisqanqa. 20  Ichaqa, ¿imapaqtaq valen huchallikusqaykichikrayku maqapasqa kasqaykichikta aguantasqaykichikqa? Allin ruwasqaykichikmanta sasachakuykunapi kaspa aguantasqaykichikmi ichaqa Diospaqqa allinpuni. 21  Chaypaqmi qamkunaqa qayasqa karqankichik, Cristopas qamkunaraykum ñakarirqa hinaspam qatipakunaykichikpaq hina kawsakurqa, chaynapi imayna kasqanta allintapuni qatipakunaykichikpaq*. 22  Payqa manam ima huchatapas ruwarqachu nitaqmi pitapas engañarqachu. 23  Waknataña trataptinkupas* manam kutipakurqachu, ñakarichiptinkupas manam amenazarqachu, aswanqa payqa derechonpi juzgaq juezpa makinmanmi churakuykurqa. 24  Paymi qirupi* warkusqa kaspan huchanchikta cuerponpi aparqa, chaynapi huchamanta librasqa kananchikpaq hinaspa allinkuna ruwanapaqña kawsananchikpaq. “Paypa heridasqa kasqanwanmi sanoyachisqaña kachkankichik”. 25  Qamkunaqa chullaruq ovejakuna hinam purirqankichik, kunanmi ichaqa kutirunkichik michiqman hinaspa vidaykichik cuidaqman.

Willakuykuna

Kaypiqa nichkan: “Pinqaypiqa qipanqachu”, nispam.
Kaypiqa nichkan: “Yupinta, rastronta qatinaykichikpaq”, nispam.
Utaq: “Kamiptinkupas”.
Utaq: “Kaspipi”. Qawaytaq: Palabrakuna entiendenapaq listata.