1 Pedro 1:1-25

  • Qillqay qallarisqanmanta (1, 2)

  • Imam chaskinankuta mana iskayrayaspa suyanankupaq musuqmanta nacesqanku (3-12)

  • Kasukuq churikuna hina tukuy kawsakuyninchikpi chuya kanamanta (13-25)

1  Jesucristopa apostolnin ñuqa Pedrom qillqamuykichik: Ponto lawpi, Galacia lawpi, Capadocia lawpi, Asia lawpi hinaspa Bitinia lawpi forastero hina chiqisqa kaq akllasqakunaman.  Qamkunataqa tayta Diosmi akllasurqankichik ñawpaqmantaraq tanteasqanman hina, paymi espiritunwan chuyanchasurqankichik kasukunaykichikpaq hinaspa Jesucristopa yawarninwan mayllasqa kanaykichikpaq. Diostam hinalla mañakuchkani ancha-ancha kuyakuyninta qawachisunaykichikpaq hinaspa hawkallata kawsachisunaykichikpaq.  Señorninchik Jesucristopa taytan Diosyá hatunchasqa kachun, paymi ancha llakipayakuyninman hina wañusqakunapa kasqanmanta Jesucristopa kawsarimusqanwan musuqmanta nacechiwarqanchik, chaynapi imam chaskinanchikta mana iskayrayaspa suyananchikpaq.  Nacechiwarqanchikqa prometewasqanchik herenciata chaskinanchikpaqmi, chay herenciaqa mana tukuqmi, chuyay-chuyaymi hinaspapas wiña-wiñaypaqmi, chay herenciaqa qamkunapaqmi hanaq pachapi kachkan.  Qamkunaqa iñiyniyuq kasqaykichikraykum, Diospa atiyninwan amparasqa kachkankichik salvakunaykichikpaq, chay salvakusqaykichikqa tukupay tiempopim sutilla kanqa.  Chayraykum qamkunaqa ancha kusisqa kachkankichik, pisi tiempolla achka sasachakuykunawan ñakarichkaspaykichikpas.  Chayna sasachakuykunapiqa kachkankichik iñiynikichik imayna kasqanta yachanaykichikpaqmi. Sichu iñiyninchik allin kanqa hinaptinqa chay iñiyninchikmi ninapi chulluchisqa kaspan tukuruqlla qurimantapas aswan valorniyuq kanqa. Jesucristopa ruwayninkuna sutilla kaptinmi chayna iñiynikichikqa alabasqa, respetasqa hinaspa hatunchasqa kanqa.  Jesucristotaqa mana rikuchkaspapas kuyankichikmi, kunan mana rikuchkaspapas paypiqa iñinkichikmi, hinaspam anchata kusikuchkankichik, chayna kusikuymantaqa manam ima niytapas atichwanchu hinaspapas chay kusikuyqa admirakuypaqmi.  Chaynataqa kusikuchkankichik iñisqaykichikrayku salvakunaykichikmanta mana iskayrayaspaykichikmi. 10  Diosmanta willakuqkunam* kay salvacionmanta allinta yachanankupaq kallpanchakurqaku, hinaspapas suma-sumaqtam tapukachakurqaku, paykunaqa chaskinaykichikpaq Diospa ancha kuyakuynin qamkunapaq kasqanmantam ñawpaqmantaraq willakurqaku. 11  Diosmanta willakuqkunapi kaq chuya espiritum Cristomanta willakurqa, paykunaqa hinallam yachanankupaq kallpanchakurqaku chuya espiritupa willakusqan maypi hinaspa haykapi cumplikunanmanta, chuya espirituqa ñawpaqmantaraqmi willakurqaña tukuy imapi Cristo ñakarinanmanta hinaspa hamuq tiempopi hatunchasqa kananmanta. 12  Diosmi paykunaman willarqa willakusqanku mana kikillankupaq kasqanmanta, aswanqa qamkunapaq kasqanmanta. Paykunam qillqarqaku qamkunapa uyarisqaykichikmanta, chay uyarisqaykichiktaqa sumaq willakuymanta willakuqkunam kunan willasurqankichik hanaq pachamanta hamuq chuya espiritupa yanapakuyninwan. Chaykunamantaqa angelkunapas allintam yachaykuyta munanku. 13  Chaynaqa, yuyaynikichikpiyá listolla kaychik imapas ruwaynikichikta ruwanaykichikpaq, chaymantapas tukuy tiempoyá qawan-qawanlla kaychik, chaynallataqyá ama iskayrayaspa suyaychik chaskinaykichikpaq kaq Diospa ancha kuyakuynintapas, chaytaqa chaskinkichik Jesucristopa ruwayninkuna sutilla qawachisqa kaptinmi. 14  Kasukuq churikuna hinayá kawsaychikqa, amañayá ñawpa tiempopi mana yachaspa imapas munasqaykichikman hinañachu. 15  Aswanqa, imaynam qayasuqnikichik Diospas chuya, chaynayá qamkunapas tukuy kawsaynikichikpi chuya kaychik. 16  Qillqasqam kachkan: “Chuyam kanaykichik, ñuqapas chuya kasqayrayku”, niq. 17  Chaymantapas, sichum mañakunkichik mana sayapakuspa pitapas ruwayninman hina juzgaq hanaq pacha taytanchikta, hinaspaqa payta manchakuspayá kawsaychik forastero hina kawsanaykichikkama. 18  Qamkunaqa librasqam karqankichik ñawpaq taytaykichikpa mana allin kawsakuy saqisusqaykichikmanta. Yachasqaykichikpi hinapas librasqaqa karqankichik manam tukuruqlla quriwanchu nitaq qullqiwanchu, 19  aswanqa ancha valorniyuq Cristopa yawarninwanmi, chayqa karqa sanoy-sanoy hinaspa allinnin kaq malta carneropa yawarnin hinam. 20  Diosmi Cristota akllarqa manaraq runakuna rikurimuchkaptin*, ichaqa tukupay tiempokunapim qamkunarayku Cristo rikurimurqa. 21  Cristoraykum Diospi iñiyniyuq kachkankichik, Diosmi wañuqkuna ukumanta Cristota kawsarichimuspan hatuncharqa, chaynataqa ruwarqa iñiynikichik hinaspa imapas suyasqaykichik Diosllapiña kananpaqmi. 22  Chiqap yachachikuyta kasukusqaykichikraykum qamkunaqa chuyanchasqa kachkankichik, chaywanmi wawqi-panintin hina sunqumanta kuyakuynikichik kachkanña, chaynaqa sunqumantayá llapallaykichik anchata kuyanakuychik. 23  Qamkunaqa musuqmantam nacerqankichik, ichaqa manam ismuruqlla muhumantachu, aswanqa mana ismuq muhumantam*, qamkunaqa nacerqankichik kawsaq hinaspa wiñaypaq kaq Diospa palabranwanmi. 24  “Llapa runakunaqa qura hinallam, kuyayllapaq kayninkupas purun wayta hinallam. Quraqa chakiruqllam*, waytapas wichiruqllam. 25  Jehova* Diospa rimasqanmi ichaqa wiña-wiñaypaq takyan”. Chay “rimasqanqa” qamkunaman willasusqaykichik sumaq willakuymi.

Willakuykuna

Utaq: “Profetakunam”. Qawaytaq: Palabrakuna entiendenapaq listata.
Kaypiqa rimachkan Adanpawan Evapa wawa-churinkunamantam.
Kaypiqa rimachkan wiñaq muhumantam.
Utaq: “Tawiruqllam”.
Qaway: Palabrakuna entiendenapaq listata.