Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

1 Juan 3:1-24

  • Diospa churinkuna kasqanchikmanta (1-3)

  • Diospa churinkunamanta hinaspa diablopa churinkunamanta (4-12)

    • Diablopa ruwasqankunata Jesuspa chinkachinanmanta (8)

  • Kuyanakunamanta (13-18)

  • Ñuqanchikmantaqa sunqunchikta aswan allinta Dios riqsisqanmanta (19-24)

3  Yachaychikyá, llumpa-llumpaytam Dios taytaqa kuyawanchik chaynapi Diospa churinwan sutichasqa kananchikpaq, ñuqanchikqa churinkunamá kanchik. Chayraykum Diosta mana yupaychaq runakunaqa payta mana riqsisqankurayku mana riqsiwanchikchu.  Kuyasqallaykuna, kunanqa Diospa churinñam kanchik, ichaqa manaraqmi payqa willawanchikchu imayna kananchikmantaqa. Ichaqa yachanchikmi Dios riqsichikuptin payman rikchakuq kananchikta, ñuqanchikqa paytam rikusunpuni.  Pipas paypi hapipakuqqa huchankunamantam chuya kanan chaynapi Dios hina chuya kananpaq.  Pipas huchapi puriqqa Diospa kamachikuyninkunatapas manam kasukunchu. Huchaqa Diospa kamachikuyninkunata mana kasukuymi.  Yachasqaykichikpi hinapas Jesusqa hamurqa huchanchikta chinkachinanpaqmi, payqa mana huchayuqmi.  Pipas paywan huklla kaqqa manam huchapiqa purinchu, pipas huchapi puriqqa manam paytaqa riqsinchu nitaq paypiqa iñinchu.  Kuyasqay churillaykuna, yanqañataq pipas pantachisunkichikman, Diospa munasqanman hina kawsakuq runaqa Jesus hina allin ruwaqmi.  Pipas huchapi puriqqa diablopam, diabloqa qallariymantapunim huchallikurqa. Chayraykum Diospa churinqa rikurimurqa diablopa ruwasqankunata chinkachinanpaq.  Pipas Diospa churin kaspanqa manam huchapiqa purinchu Diospa espiritun* paypi kasqanrayku, payqa manam huchapiqa purinmanchu Diospa churin kasqanrayku. 10  Suti riqsiyllam Diospa churinkunaqa, suti riqsiyllataqmi diablopa churinkunapas. Pipas allinkunata mana ruwaqqa hinaspa runamasinta mana kuyaqqa manam Diospa churinchu. 11  Qamkunaqa qallariymantapacham uyarirqankichik “llapallaykichikmi kuyanakunaykichik” niq willakuyta. 12  Amayá Cain hinachu kasun, payqa satanaspa* churin kaspanmi wawqinta mana llakipayaspan wañurachirqa. ¿Imanasqataq wañurachirqa? Paypa ruwayninkuna mana allin kasqanrayku hinaspa wawqin Abelpa ruwayninkuna allin kasqanraykum. 13  Wawqi-panillaykuna Diosta mana yupaychaqkuna chiqnisuptikichikqa amayá hukmanyaychikchu. 14  Ñuqanchikqa iñiqmasinchikkunata kuyasqanchikraykum wañusqa hina kasqanchikmanta kunanqa kawsachkanchikña. Pipas mana kuyakuqqa wañusqallam kachkan. 15  Pipas iñiqmasinta chiqniqqa runa wañuchiqmi rikurirun. Qamkunaqa yachankichikmi runamasin wañuchiqqa mana wiñay kawsayniyuq kananmanta. 16  Ñuqanchikrayku Jesucristopa wañukusqanwanmi yachanchik imam kuyakuy kasqanta, chaynam ñuqanchikpas kamachisqa kachkanchik iñiqmasinchikkunarayku wañunanchikpaq. 17  Imanpas kachkaptin mana imayuqta iñiqmasinta qawachkaspan pipas mana llakipayaykuqqa, ¿yaqachum Diosta kuyanman? 18  Kuyasqay churillaykuna, ñuqanchikqa manam rimaspallachu utaq simillanchikwanchu kuyanakunanchik, aswanqa imatapas sunqumanta ruwaspam. 19  Chayna kuyakuq kaspam yachasun chiqap kaqmanta kasqanchikta, hinaspam mana iskayrayasunchu Diosninchik kuyawasqanchikmanta, 20  sunqunchik acusawaptinchikpas yuyarinanchikmi ñuqanchikmanta aswan allinta sunqunchikta Diosninchik riqsisqanta, Diosqa lliwtamá yachan. 21  Kuyasqallaykuna, sunqunchik mana acusawaptinchikqa Dioswanmi mana recelaspa rimachwan, 22  imatapas mañakuptinchikqa payqa quwasunmi kamachikuyninkunata kasukusqanchikrayku, chaynataq paypa munasqanta ruwasqanchikrayku. 23  Diosqa kamachiwanchik churin Jesucristopi iñinanchikpaqmi hinaspa kuyanakunanchikpaqmi, chayna kananchikpaqmi kamachiwarqanchik. 24  Chaymantapas kamachikuyninkunata kasukuq runaqa Dioswanmi huklla kachkan, Diospas paywantaqmi huklla kachkan. Quwasqanchik espiritunwanmi yachanchik payqa ñuqanchikwan huklla kasqanta.

Willakuykuna

Kaypiqa nichkan: “Rurun”, nispam.
Kaypiqa nichkan: “Mana allinpa”, nispam.