Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

1 Juan 2:1-29

  • Dioswan allinyanachiwananchikpaq Jesuspa wañusqanmanta (1, 2)

  • Diospa kamachikuyninkunata kasukunamanta (3-11)

    • Musuq kamachikuymanta hinaspa ñawpaq kamachikuymanta (7, 8)

  • Imanasqa qillqasqanmanta (12-14)

  • Diosta mana yupaychaq runakunapa imayna kawsasqankuta mana kuyanamanta (15-17)

  • Cristopa contranpi kaqkunamanta cuidakunapaq (18-29)

2  Kuyasqay churillaykuna, kaykunatam qillqamuchkaykichik mana huchallikunaykichikpaq. Chaywanpas, pipas huchallikuruptinqa Dios taytanchikpa qayllanpim kachkan yanapawaqninchik*, payqa allin ruwaq Jesucristom.  Payqa Dioswan allinyanachiwananchikpaqmi huchanchikrayku wañukurqa, wañukurqaqa manam ñuqallanchikpaqchu aswanqa llapallan runakunapaqwanmi.  Kamachikuyninkunata tukuy tiempo kasukuspam yachanchik Cristota riqsisqanchikta.  Pipas “ñuqaqa riqsinim” nichkaspan kamachikuyninkunata mana kasukuspanqa llullakuchkanmi, chay runaqa manam chiqap rimaqchu.  Pipas Cristopa kamachikuyninkunata kasukuspanmi ichaqa sutillata qawachinqa Dios kuyasqanta. Ñuqanchikpas kamachikuyninkunata kasukuspaqa paywan huklla kasqanchiktam qawachichkanchik.  Pipas “paywanmi hukllaña kachkani” niqqa, Cristopa kawsasqanman hinam tukuy tiempo kawsakunan.  Kuyasqallaykuna, manam musuq kamachikuytachu qillqamuchkaykichikqa, aswanqa qallariyninmantapacha yachasqaykichik ñawpaq kaq kamachikuyllatam. Chay ñawpaq kamachikuyqa uyarisqaykichik kamachikuymi.  Chaywanpas, qillqamusqay kamachikuyqa musuqmi, kay kamachikuytaqa Cristopas hinaspa qamkunapas kasukuchkankichikmi. Tutayayqa tukuchkanñam chiqap achkiyñataqmi kanchamuchkanña.  Pipas “achkiypim kachkani” nichkaspan iñiqmasinta chiqniqqa tutayaypiraqmi kachkan. 10  Pipas iñiqmasinta kuyaqqa tukuy tiempom achkipi kachkan, payqa manam imawanpas urmanqachu*. 11  Pipas iñiqmasinta chiqniqmi ichaqa tutayaypi kachkan, payqa manam yachanchu mayman risqantapas tutayay ñawsayarachisqanrayku. 12  Kuyasqay churillaykuna, qamkunamanmi qillqamuchkaykichik Jesuspa sutinpi huchaykichikkunata Dios pampachasusqaykichikrayku. 13  Taytakuna, qamkunamanmi qillqamuykichik qallariymanta kaqta riqsisqaykichikrayku. Mozokuna, qamkunamanmi qillqamuykichik satanasta* vencerusqaykichikrayku. Churillaykuna, qamkunamanmi qillqamuykichik Dios taytanchikta riqsisqaykichikrayku. 14  Taytakuna, qamkunamanmi qillqamuykichik qallariyninmanta kaqta riqsisqaykichikrayku. Mozokuna, qamkunamanmi qillqamuykichik qaqa hina sayasqaykichikrayku, satanasta vencerusqaykichikrayku hinaspa Diospa rimapayasusqaykichik sunquykichikpi kasqanrayku. 15  Amayá kuyaychikchu Diosta mana yupaychaq runakunapa imayna kawsakusqankutaqa nitaq tukuy ima ruwasqankunatapas, chaykunata kuyaqqa manam Dios taytanchiktaqa kuyanchu. 16  Diosta mana yupaychaq runakunapa ruwasqanqa aychapa munapayasqankunam, ñawipa munapayasqankunam hinaspa imapas kapuqniyuq kaspa hatunchakuykunam. Tukuy chaykunaqa manam Dios taytanchikmantachu aswanqa Diosta mana yupaychaq runakunamantam hamun. 17  Diosta mana yupaychaq runakunaqa wañunqakum, tukuy ima munapayasqankunapas chinkanqam. Diospa munayninta ruwaqmi ichaqa wiñaypaq kawsanqa. 18  Kuyasqay churillaykuna, ñam tukupay tiempoña. Cristopa contranpi kaqkuna* hamunanmantaqa ñam uyarirqankichikña, kunanpunipas Cristopa contranpi kaqkunaqa achkallañam rikuriramunku, chaywanmi yachanchik tukupay tiempoña kasqanta. 19  Paykunaqa ñuqanchik ukumantam lluqsirunku ñuqanchikpa partenchik mana kasqankurayku, sichum ñuqanchikpa partenchik kaspankuqa ñuqanchikwanchá kachkanmanku karqa. Manam llapallankuchu ñuqanchik parte kanku, chayta yachananchikpaqmi paykunaqa lluqsirunku. 20  Qamkunaqa Diospa atiynintam chaskirqankichik, llapallaykichikmi chiqap kaqmantapas yachankichik. 21  Qillqamuchkaykichikqa manam chiqap kaqmanta mana yachasqaykichikraykuchu aswanqa yachasqaykichikraykum, hinaspa chiqap kaqmanta ima llullapas mana kasqanraykum. 22  ¿Pitaq llullaqa? “Pipas Jesusqa manam Cristochu*” niqmi llullaqa. Payqa Cristopa contranpi kaqmi*, payqa qipanchanmi hanaq pacha taytatapas chaynataq churintapas. 23  Churita lliw qipanchaqkunaqa manam taytanchikpa chaskisqanchu. Pipas, “churipim iñini” niqmi taytanchikpa chaskisqanqa. 24  Qamkunapa qallariymantapacha uyarisqaykichikqa sunquykichikpiyá tukuy tiempo kachun. Chay uyarisqaykichik sunquykichikpi kaptinqa qamkunapas Dios taytanchikwan hinaspa churinwanmi tukuy tiempo huklla kankichik. 25  Chaymantapas Diosmi niwarqanchik wiñaypaq kawsananchikpaq. 26  Tukuy chaykunataqa qillqamuchkaykichik qamkunata pantachiy munaqkunamantam. 27  Diosmi qamkunataqa espiritunwan akllasurqankichik, chay espiritunñataqmi qamkunapi kachkan, chaynapi pipas hukta mana yachachisunaykichikpaq, qamkunataqa Diosmi akllasqa kasqaykichikrayku tukuy imamanta yachachisuchkankichik, akllasqa kasqaykichikqa chiqapmi manam llullachu. Chaynaqa yachachisusqaykichikman hinayá tukuy tiempo paywan huklla kaychik. 28  Chaynaqa paywanyá huklla kaychik kuyasqay churillaykuna, chaynapim rikuriramuptinqa recelaspaqa mana rimasunchu nitaq chayaramuspan kaypi kasqan tiempopipas pinqakuspaqa karunchakusunchu. 29  Cristo allin ruwaq kasqanta yachaspaykichikqa, yachankichiktaqmi pipas allin ruwaqqa Diospa churin kasqanta.

Willakuykuna

Utaq: “Abogadonchik”.
Ninmanpaschá: “Manam pitapas urmachinqachu”, nispa.
Kaypiqa nichkan: “Mana allinta”, nispam.
Utaq: “Anticristo”. Qawaytaq: Palabrakuna entiendenapaq listata.
Utaq: “Akllasqa runachu”. Qawaytaq: Palabrakuna entiendenapaq listata.
Utaq: “Anticristom”.