1 Corintios 9:1-27

  • Pablo apostol kaspan qatipakunapaq hina kasqanmanta (1-27)

    • Toropa siminta mana watanamanta (9)

    • “¡Ay, imaynaraq kayman sumaq willakuyta mana willakuspayqa!” nispa Pablopa rimasqanmanta (16)

    • Llapallan runakunarayku tukuy imata ruwanamanta (19-23)

    • Kawsakuyta chaskinapaq carrerapi controlakuymanta (24-27)

9  ¿Manachu ñuqaqa munasqayta ruwanaypaq libre kani? ¿Manachu ñuqaqa apostol kani? ¿Manachu ñuqaqa señorninchik Jesustapas rikurqani? ¿Manachu señorta servispay yanapasqaykuna qamkunaqa kankichik?  Hukkunapaq mana apostol kaspaypas, chiqaptapunim qamkunapaqqa apostol kani. Qamkunaqa señorpa apostolnin kasqayta qawachiq sello hinam kankichik.  Defiendekuspaymi juzgawaqniykunata nini:  ¿Manachu ñuqaykuqa derechoyuq kaniku mikunaykupaq hinaspa tomanaykupaq?  ¿Manachu wakin apostolkuna hina, señorninchikpa wawqinkuna hina chaynataq Pedro* hina, iñiq warmiwan casarakuspayku compañachikunaykupaq derechoyuq kaniku?  Mana llamkapakunaykupaq derechoyuq kachkaspaykupas, ¿Bernabeywan ñuqallachu mantienekunaykupaq llamkapakunayku?  ¿Pi soldadotaq kikinpa gastonwan cuartelpi servin? ¿Pitaq uvasta tarpuspan mana rurunta mikunchu? Utaq, ¿pitaq animalkunata michispan mana lechenta tomanchu?  Manamá runakunapa kamachikuyninman hinachu kaykunataqa nichkaykichik, ¿aw? ¿Manachu Moisespa leyninpas kaykunamantaqa riman?  Moisespa leyninpim qillqasqa kachkan: “Erapi eraq* toropa simintaqa amam watankichu”, niq. ¿Kaytaqa tororaykuchu Diosqa nichkarqa? 10  ¿Manachu ñuqanchikrayku chaytaqa nichkan? Arí, ñuqanchikraykumá chayna qillqasqaqa karqa. Yapuqpas hinaspa eraqpas* llamkan chay llamkasqanmanta mikunanpaqmi. 11  Sichu ñuqayku Diosmanta kaqkunata tarpuchkaq hina qamkunaman willarqaykiku hinaptinqa, ¿manachu qamkunamanta cosechachkaq hina ima yanapakuytapas chaskinayku? 12  Hukkunapas yanapanaykichikpaq derechonta qamkunamanta mañakusuchkaptikichikqa, ¿manachu ñuqaykuqa aswan derechoyuq kaniku mañakunaykupaq? Chayna kaptinpas ñuqaykuqa manam mañakuykikuchu, aswanmi tukuy imata aguantaniku Cristomanta sumaq willakuyta mana imawanpas harkanaykupaq. 13  ¿Manachu yachankichik Diospaq llamkaqkunaqa templopi imapas mikunapaq kaqta mikusqankuta? Hinaspapas, ¿manachu yachankichik altarpi llamkaqkunapas altarpi ofrecesqa kaqkunamanta wakinta chaskisqankuta? 14  Chaynataqmi señorninchikpas kamachirqa sumaq willakuyta willakuqkuna willakusqankumanta imapas necesitasqanta chaskinankupaq. 15  Chayna kachkaptinpas manam ñuqaqa imatapas mañakurqaykichikchu. Manataqmi ñuqawan chaynata ruwanaykichikta munaspaychu kaykunataqa qillqamuchkaykichik, ñuqapaqqa wañukuyniymi aswan allinqa kanman sumaq willakuymanta mana imallapaq willakuspa kusikusqayta pipas qichuwananmantaqa. 16  Sumaq willakuymanta willakusqayqa manam hatunchakunaypaqchu, chaytaqa ruwani ruwanaypuni kaptinmi. ¡Ay imaynaraq kayman sumaq willakuyta mana willakuspayqa! 17  Sichu chayta ruwasaq ganasllawanña hinaptinqa kanmi premioy, mana munastin ruwaspaypas ruwasaqmi señorninchikmanta kay llamkayta chaskisqayrayku. 18  Hinaptinqa, ¿imataq premioyqa kanqa? Premioyqa sumaq willakuymanta mana imallapaq willakusqaymi, chaynapi “tukuy imatam mañakun” nispa pipas mana ninanpaq. 19  Mana pipa sirvienten kachkaspaypas llapallanpa sirvientenmi rikuriruni, atisqayman hina achka runakunata yanapanaypaq. 20  Chayraykum judiokunapaq judio hina kani, paykunata yanapanayrayku. Leyta kasukuqkunawanmi leyta kasukuni, leyta mana kasukunay kachkaptinpas, chaynapi leyta kasukuqkunata yanapanaypaq. 21  Diospa chaynataq Cristopa qayllanpi leyniyuq kachkaspaypas mana leyniyuqkunawanmi mana leyniyuq hina kani mana leyniyuqkunata yanapanaypaq. 22  Mana kallpayuqkunawanmi mana kallpayuq hina kani, mana kallpayuqkunata yanapanaypaq. Tukuytam ruwani tukuy rikchaq runata yanapanaypaq, chaynapi tukuy imata ruwaspa wakillantapas salvanaypaq. 23  Tukuy imataqa ruwani sumaq willakuyraykum, chaynapi llapa runakunaman willanaypaq. 24  ¿Manachu yachankichik carrerapi kallpaqkunaqa* llapallanku kallpaspankupas premiota huklla chaskisqanta? Chaynaqa premiota chaskinaykichikpaq hinayá kallpaychik. 25  Chaymantapas carrerapi kallpaq* runaqa tukuy imapim controlakun. Chaynataqa ruwanku tukuruqlla coronata chaskinankupaqmi, ñuqanchikmi ichaqa chaynata kallpanchik mana tukuq coronata chaskinanchikpaq. 26  Ñuqaqa kallpachkani manam ñawsa hinachu, nitaqmi peleachkanipas wayrata takachkaq hinachu, 27  aswanqa cuerpoytam controlani hinaspam sirvienteta hina kamachini, chaynapi hukkunamanpas willakuchkaptiy kikiytapuni Dios mana qipancharuwananpaq.

Willakuykuna

Kaypiqa nichkan: “Cefas”, nispam. Chaynam Pedropa huknin sutin. Qawaytaq Juan 1:42.
Utaq: “Trillaq”.
Utaq: “Trillaqpas”.
Utaq: “Raskiqkunaqa”.
Utaq: “Raskiq”.