Yachachikuypa kasqanman rinapaq

Yachachikuyman rinapaq

Jehova Diospa testigonkuna

Rimaynikita akllay Quechua (Ayacucho)

1 Corintios 7:1-40

  • Mana casarasqakunapaq hinaspa casarasqakunapaq yachachikuykunamanta (1-16)

  • Imayna tarikuchkaptin Dios qayasqanman hinalla kawsanankumanta (17-24)

  • Mana casarasqakunamanta hinaspa viudakunamanta (25-40)

    • Mana casarasqa kay allin kasqanmanta (32-35)

    • Señorpi iñiqllawan casarakunamanta (39)

7  Qillqamusqaykichikmantaqa kaytam nikichikman: Allinmi kanman warmita qari mana llapchayninqa*,  ichaqa achkallaña huchapakusqankuraykuyá* sapakama warmiyuq kachunku, warmipas sapakamayá qusayuq kachunku.  Qusaqa warminmanyá imam qunanta quchun, chaynallataqyá warmipas qusanman imam qunanta quchun.  Warmiqa manañam cuerponpa dueñonñachu aswanqa qusanñam, chaynallataqmi qusapas manaña cuerponpa dueñonñachu aswanqa warminñam.  Warmikichikwan utaq qusaykichikwan kaytaqa amayá neganakuychikchu, negaspaqa-neganakuychik huk tiempollayá iskaynikichik tanteanakuspa, chaynapi Diosta mañakunaykichikpaq, chaymantaqa kaqllayá kakuychik, yanqañataq mana controlakuptikichik satanas huchallichisunkichikman.  Kaytaqa niyllam-nichkaykichik manam kamachichkaykichikchu.  Chaywanpas munaymanmi llapallanku ñuqa hina kanankuta. Ichaqa sapakamam Diosmanta regalota chaskin, wakinmi casado kanankupaq wakinñataqmi soltero kanankupaq.  Allinmi kanman mana casarasqakunapa hinaspa viudakunapa ñuqa hina kayninkuqa, chaynatam paykunata nini.  Ichaqa mana controlakuyta atispankuqa casarakuchunku, casarakuymi aswan allinqa, qaripas warmita utaq warmipas qarita munapayaspan purinanmantaqa. 10  Casarasqakunatam rimapayani: Warmikunaqa amayá qusankumanta rakikuchunchu, chaytaqa manam ñuqachu nini aswanqa señormi. 11  Rakikuruspanqa amayá hukwanqa casarakuchunchu, mana chayqa qusanwanyá amistachun. Qusapas manam warmintaqa saqinanchu. 12  Wakinkunatam ichaqa nini, manam señorninchikchu: Huk kaq wawqipa warmin mana iñiq kachkaspan paywan qipakuyta munaptinqa amayá warminta saqichunchu. 13  Chaynallataqyá warmipas qusan mana iñiq kachkaspan paywan qipakuyta munaptinqa ama qusanta saqichunchu. 14  Mana iñiq qusaqa warminraykum chuyanchasqa kachkan, chaynallataqmi mana iñiq warmipas Diospi iñiq qusanrayku chuyanchasqa kachkan. Mana chayna kaptinqa wawa-churinkunam Diospaq mana chuyachu kanmanku, paykunaqariki kachkanku chuyanchasqañam. 15  Mana iñiq warmi utaq qusa pasakuyta* munaspanqa ripukuchun, wawqiqa utaq paniqa manam obligasqachu kachkan mana iñiqwan kuska kananpaqqa. Diosqa hawkayaymanmi qamkunataqa qayasurqankichik. 16  Qam qusa, ¿imaynataq yachanki warmikita mana salvanaykita? Qampas warmi, ¿imaynataq yachanki qusaykita mana salvanaykita? 17  Dios qayasuptikichik imayna tarikusqaykichikman hinallayá kawsaychik sapakamaman Jehova* Diospa qusqanman hina. Chaynatam nini llapallan iñiqkunata*. 18  ¿Qari kayninpi señalasqa kachkaspanchu pipas qayasqa karqa? Chaynaqa hinallayá kachun. ¿Mana señalasqa kachkaspanchu pipas qayasqa karqa? Chaynaqa amayá señalachikuchunchu. 19  Qari kayninta señalasqa utaq mana señalasqa kaypas manam imananchu, Diospa kamachisqankunata kasukuymi ichaqa aswan allin. 20  Imayna tarikuchkaptin qayasqa kasqankuman hinallayá sapakama kawsakuchunku. 21  ¿Sirviente kachkaspachu qayasqa karqanki? Chaynaqa amayá llakikuychu, sichu librakuyta atinki hinaspaqa librakuruyá. 22  Señorpa mayqin qatiqninpas sirviente kachkaspa qayasqa kaspanqa libreñam, hinaspanmi señorpaña. Chaynallataqmi libre kachkaspan qayasqa kaqpas Cristopa sirvientenña rikurirun. 23  Qamkunaqa preciowanmi rantisqa karqankichik, amañayá runapa sirvientenqa kaychikchu. 24  Wawqi-panillaykuna, imayna tarikuchkaspa qayasqa kasqaykichikman hinayá Diospa qayllanpi chaynalla kaychik. 25  Mana casarasqakunapaqmi* ichaqa mana ima kamachikuytapas señorninchikmantaqa chaskirqanichu. Ichaqa chullalla rimaq kanaypaq señorpa llakipayasqan kaspaymi piensasqayta nikichik. 26  Sasallaña tiempopi kasqanchikraykum ñuqamantaqa allin kanman casarasqa kaqpas utaq soltero kaqpas imayna kasqanman hinalla kayninku. 27  ¿Warmiyuqchu kachkanki? Chaynaqa amayá rakikuytaqa munaychu. ¿Mana warmiyuqchu kachkanki? Chaynaqa amayá warmitaqa maskaychu. 28  Chaywanpas casarakuspaykiqa manam huchallikunkichu. Mana casarasqakuna casarakuspankupas manam huchallikunkuchu. Casarakuqkunam ichaqa aychankupi ñakarinqaku. Ñuqam ichaqa ñakarinaykichikmanta harkaykichik. 29  Chaymantapas wawqi-panillaykuna kaytam nikichik: Pisillañam tiempo kachkan, kunanmantaqa warmiyuqkunapas mana warmiyuqpas kanman hinayá kachunku, 30  waqaqkunapas mana waqaq hinayá kachunku, kusisqa kaqkunapas mana kusisqa kaqkuna hinayá kachunku, rantiqkunapas mana kaqniyuq hinayá kachunku, 31  kay pachapi kaqkunata servichikuqkunapas yaqapas mana servichikuqkuna hinayá kachunku, kay pachapi tukuy imakunaqariki manam chaynallachu kachkan. 32  Chiqaptapuniqa munani mana llakiyuq kanaykichiktam. Mana casarasqa qariqa señorninchikpaq llamkaypim afanakun señorpa chaskisqan kananpaq. 33  Casarasqa qarim ichaqa kay pachapi kaqkunamanta afanakun warminta kusichinanpaq, 34  hinaspanmi payqa rakinasqa kachkan. Mana casarasqa warmiqa utaq sipasqa señorninchikpaq llamkaypim afanakun cuerponpipas hinaspa yuyayninpipas chuya kananpaq. Casarasqa warmim ichaqa kay pachapi kaqkunapi afanakun qusanta kusichinanpaq. 35  Kaytaqa nikichik qamkunapa allinnikichikpaqmi manam harkakuspaychu, nikichikqa allin kaqkunata ruwanaykichikpaqmi hinaspa huk ruwaykunawan mana harkachikuspa señorninchikta hinalla servinaykichikpaqmi. 36  Sichu pipas mana casarasqa kaspan mana atinchu cuerpon controlayta, pasarunñataq mozo-sipasyasqan waytariy tiempotapas, hinaspaqa munasqanta ruwachun manam huchallikunchu, casarakuchun. 37  Ichaqa sichu pipas sunqunpi sumaqta tanteakun mana casarakunanpaq chaynataq musyakun casarakuy mana necesitasqanta, chaymantapas controlakuytataq atin, hinaspanqa allintam ruwan. 38  Chaynaqa, pipas casarakuqqa allintam ruwan, mana casarakuqmi ichaqa aswan allintaraq ruwan. 39  Qusan kawsanankamaqa warmiqa qusanpa makinpim kachkan. Qusan wañukuptinmi ichaqa libreña piwanpas munasqanwan casarakunanpaq, ichaqa señorpi iñiqllawanmi casarakunan. 40  Piensasqayman hinaqa, aswan kusisqam kanman imayna tarikusqanman hinalla kaspanqa, ñuqaqa piensanim ñuqapipas Diospa espiritun kasqanta.

Willakuykuna

Kaypiqa rimachkan warmi-qari puñuymantam.
Kayqa, qari kayninwan utaq warmi kayninwan millakuypaq kaqkunata ruwaymi. Qawaytaq: Palabrakuna entiendenapaq listata.
Utaq: “Rakikuyta”.
Qaway: Palabrakuna entiendenapaq listata.
Utaq: “Congregacionkunata”. Qawaytaq: Palabrakuna entiendenapaq listata.
Kaypiqa rimachkan solterakunamanta hinaspa solterokunamantam.