1 Corintios 4:1-21

  • Mayordomo imam ruwananta cumplinanmanta (1-5)

  • Cristopi iñiqkuna humillakuq kanankumanta (6-13)

    • Qillqasqa kasqanman hinalla ruwanamanta (6)

    • Cristopi iñiqkuna actuacionpi qawana runakuna hina kasqankumanta (9)

  • Diospi iñiqkunata churinta hina Pablopa cuidasqanmanta (14-21)

4  Ñuqaykutaqa runakunayá qawawachunku Cristopa serviqninkunata hina, chaynataq Diospa kaq pakasqa kaqkunata qawananpaq kamachisqa runakunata hina.  Chaymantapas kamachisqa runaqa imam ruwanantam ruwanan.  Ñuqataqa manam imanawanchu qamkuna juzgawaptikichikpas utaq juezkuna juzgawaptinpas. Ñuqaqa manam kikiypas juzgakunichu.  Concienciayqa tukuy imamantam limpio kachkan. Ichaqa manam chayraykuchu allin ruwaqña kani, juzgawaqniyqa Jehova* Diosmi.  Chaynaqa señorninchik chayamunankamayá manaraq tiemponpiqa ama pitapas juzgaychikchu, paymi tutayaypi pakasqa kaqkunata achkiman hurqumunqa hinaspam runakunapa sunqunpi munasqanta qawachinqa, hinaptinmi Diospa alabasqan sapakama kanqaku.  Tukuy kaykunatam wawqi-panillaykuna ñuqapas hinaspa Apolospas ruwarqaniku qamkunapa allinnikichikpaq, ruwarqanikuqa “qillqasqa kasqanman hinallam ruwanayki” niq kamachikuyta ñuqaykumanta yachanaykichikpaqmi. Chaynapi qari tukuspa hukninman sayapakuspa hukninpa contranpi ama kanaykichikpaq.  ¿Pitaq qamtaqa wakinmanta aswan allinta ruwasunki? Chiqaptapuniqa, ¿imataq qampaqqa kan mana chaskisqaykiqa? Chaskichkaspaykiqa, ¿imanasqataq alabakunki manapas chaskichkawaqchu hinaqa?  Qamkunapaqqa kachkanñam tukuy munasqaykichikkuna, ¿aw? Apuñam rikurirunkichikpas, ¿aw? Mana ñuqaykuwanmi qamkunaqa kamachiyta qallaykunkichikña, ¿aw? Chiqaptapunipas ñuqapaqqa allinmá kanman kamachiytaña qallaykusqaykichikqa, chaynapi ñuqaykupas qamkunawan kamachiq kanaykupaq.  Piensasqayman hinaqa, ñuqayku apostolkunatam Diosqa qawanapaq actuacionpa tukuyllanpiña churaykuwanku, yaqa wañunanpaq akllasqakunata hina, ñuqaykuqa angelkunapaqpas hinaspa runakunapaqpas actuacionpi qawana runakunam rikuriruniku. 10  Ñuqaykuqa Cristoraykum mana yachayniyuq kaniku, qamkunam ichaqa Cristopi yachayniyuq kankichik. Ñuqaykuqa mana kallpayuqmi kaniku, qamkunañataqmi kallpasapa kankichik. Qamkunaqa runakunapa allin qawasqanmi kankichik, ñuqaykum ichaqa runakunapa chiqnisqan kaniku. 11  Kunankamam kachkaniku yarqaymanta, yakumanta, pachaykumanta ususqa, maqasqa hinaspa mana wasiyuq. 12  Makiykuwan llamkaspaykutaqmi afanllapiña kachkaniku. Runakuna tratapawaptinkum allinllata rimapayaniku, qatikachawaptinkum pacienciakuspa aguantaniku, 13  ñuqaykumanta mana allinta rimaptinkum sumaqllata kutichiniku*, ñuqaykuqa kunankamam runakunapa wischusqan basura hina rikuriruniku, runakunapa wischusqan qanra hinam rikuriruniku. 14  Kaykunataqa manam pinqachinaypaqchu qillqamuchkaykichik, aswanqa kuyasqay churiykunata hina yanapanaypaqmi. 15  Cristota imayna qatinaykichikpaq yachachiqnikichik chunka waranqa runaña kaptinpas, taytaykichikqa manam achkachu, ñuqaqa taytaykichikmi rikuriruni sumaq willakuyta yachachispay hinaspa Jesucristota qatinaykichikpaq yachachispay. 16  Chayraykum ruegakullaykichik ñuqata qatipakuwanaykichikpaq. 17  Chaymi qamkunaman kuyasqay churiy Timoteota kachamuchkaykichik, payqa señorninchiktam tukuy sunqunwan servichkan, paymi yuyarichisunkichik Cristo Jesus serviypi tukuy imata imayna ruwasqayta, arí, yuyarichisunkichikmi tukuy lawpi llapa iñiqkunaman* imayna yachachisqayta. 18  Wakinnikichikqa hatun tukuqllañam kachkankichik, yaqapas qamkunaman manaña hamunayta piensaspaykichik. 19  Jehova Dios munaptinqa manapas unaymantam hamusaq, munachkanim chay hatun tukuqkunata qawaykuyta, ichaqa manam rimasqankuta yachanaypaqchu aswanqa paykunapi Diospa atiynin kasqanta utaq mana kasqanta yachanaypaqmi. 20  Diospa munaychakuyninta* kasukusqanchiktaqa qawachisun manam rimasqanchikwanchu aswanqa ruwasqanchikwanmi, ruwasqanchikkunam qawachin Diospa atiynin ñuqanchikpi kasqanta. 21  ¿Imatataq qamkunaqa munankichik? ¿Garrotewan qamkunaman hamunaytachu icha kuyakuywan hinaspa llampu sunqulla hamunaytachu?

Willakuykuna

Qaway: Palabrakuna entiendenapaq listata.
Kaypiqa nichkan: “Ruegakuniku”, nispam.
Utaq: “Congregacionman”. Qawaytaq: Palabrakuna entiendenapaq listata.
Utaq: “Gobiernonta”. Qawaytaq: Palabrakuna entiendenapaq listata.