1 Corintios 3:1-23

  • Corintopi kaqkuna aychaman hinalla piensaq kasqankumanta (1-4)

  • Dios wiñachiq kasqanmanta (5-9)

    • Diospa llamkaqmasinkunamanta (9)

  • Ninapa mana rupanan kaqkunawan ruwanamanta (10-15)

  • Diospa templon kasqankumanta (16, 17)

  • Runakunapa yachaynin Diospaq mana valeq kasqanmanta (18-23)

3  Wawqi-panillaykuna, ñuqaqa manam Diospa espiritunpa yanapasqan runakunata hinachu rimapayarqaykichik, rimapayarqaykichikqa aychaman hinalla piensaq runakunata hinam, arí Cristota qatisqanpi wawallaraq kaqkunaman hinam rimapayarqaykichikqa.  Lechellatam qurqaykichikqa, manam mikuytachu manaraq mikunaykichikpaq hina kasqaykichikrayku. Kunanpas manamá mayqinnikichikpas mikunaykichikpaq hinaraqchu kachkankichik  aychaman hinallaraq piensasqaykichikrayku. Envidianakuspa chaynataq lirianakuspa kawsaspaqa, ¿manachu aychaman hinallaraq piensachkankichik? ¿Manachu runakunapa ruwasqanman hinallaraq kawsachkankichik?  “Ñuqaqa kani Pablopam”, “ñuqaqa kani Apolospam” nispaykichikqa, ¿manachu wakin runakuna hinallaraq kachkankichik?  ¿Pimá Apolosqa? ¿Pimá Pabloqa? Ñuqaykuqa señorninchikpa quwasqanku llamkaypi llamkapakuqllam kaniku, iñinaykichikpaq yanapakuqkunalla.  Ñuqam tarpurqani, Apolosñataqmi parqurqa*, Diosmi ichaqa wiñachirqa.  Chaynaqa, tarpuqwan parquqpas* manam imachu, aswanqa wiñachiq Diosllam.  Tarpuqwan parquqqa* hukllam kanku, ichaqa llamkasqankuman hinam sapakama pagonkuta chaskinqaku.  Ñuqaykuqa Diospa llamkaqmasinmi kaniku, qamkunañataqmi kankichik Diospa llamkanan chakra, Diospa ruwasqan wasi. 10  Ancha kuyakuyninta Dios qawachiwasqanraykum ñuqaqa obrapi llamkaq allin maestro hina cimientota churarqani ichaqa huk kaqmi chay cimiento churasqaypa hawanpi pirqachkan, chaywanpas hinallayá sapakama allinta qawachun chay cimientopa hawanpi imayna pirqasqanta. 11  Manam pipas churayta atinmanchu ña churasqa cimientopa hawanman huk cimientotaqa, chay churasqa cimientoqa Jesucristom. 12  Cimiento churasqapa hawanpiqa pipas ruwanmanmi wasita quriwan, qullqiwan, alhaja rumiwan, maderawan, ichuwan* hinaspa pajawan, 13  ichaqa prueba punchawpim sapakamapa ruwasqan imayna kasqan qawachisqa kanqa, chay punchawpim nina qawachinqa sapakamapa ruwasqan imayna kasqanta. 14  Chay cimientopa hawanpi pipapas ruwasqan mana imanakuptinqa premiotam chaskinqa. 15  Pipapas ruwasqan kañasqa kaptinqa lliwtam chinkarachinqa, kikinmi ichaqa salvakunqa, salvakunqaqa ninamanta ayqichkaq hinam. 16  ¿Manachu qamkunaqa yachankichik Diospa templon kasqaykichikta, hinaspa Diospa espiritun qamkunapi kasqanta? 17  Pipas Diospa templonta tuñirachiptinqa Diosmi paytapas chinkarachinqa, Diospa templonqariki chuyam, qamkunam chay temploqa kankichik. 18  Amayá pipas kikillanqa engañakuchunchu: Qamkunamanta pipas kay tiempopi* yachayniyuq kasqanta piensaspanqa mana yachayniyuq kasqanpaqyá hapikuchun, chaynapi yachayniyuq kananpaq. 19  Runakunapa yachayninqariki Diospaqqa mana valeqmi, qillqasqamiki kachkan: “Diosmi kikinkupa tuqllankupi yachaysapakunata wichiykachin”, niq. 20  Chaymantapas nintaqmi: “Jehova* Diosqa yachanmi runakunapa yachaynin mana valeq kasqanta”, nispa. 21  Chaynaqa amayá pipas alabakuchunchu runakunapa ruwasqanmantaqa, tukuy imamiki qamkunapa, 22  Pablopas, Apolospas, Pedropas*, runakunapas, kawsakuypas, wañuypas, kunan kaqkunapas hinaspa hamuq kaqkunapas, tukuy imakunam qamkunapa. 23  Qamkunañataqmi kankichik Cristopa, Cristoñataqmi Diospa.

Willakuykuna

Utaq: “Qarparqa”.
Utaq: “Qarpaqpas”.
Utaq: “Qarpaqqa”.
Utaq: “Henowan”.
Qaway: Palabrakuna entiendenapaq listata.
Qaway: Palabrakuna entiendenapaq listata.
Kaypiqa nichkan: “Cefas”, nispam. Chaynam Pedropa huknin sutin. Qawaytaq Juan 1:42.